1 Awarni i řmewt n Axab iɣewweɣ Mu’ab x Israil. ^■   2 Iwḍa-dd Axazya s tracca n řkazi n tɣurfet nnes di Samarya uca ihřec. Netta issekk ireqqasen inna asen: “Ruḥem ɣar Baɛal-Zabub, arebbi n Ɛaqrun, maḥend ad tesseqsam ma war d ayi ineqq řehřac-a.”

3 Maca Lmalak n SIDI issiweř-dd ɣar Ilicaɛ, Aticbi: “Kkar, geɛɛed, řqa ireqqasen n ujeǧid n Samarya u siweř akidsen: ‘Ma s tidett war din AREBBI di Israil, ařami kenniw tuyurem ḥima ad tesseqsam Baɛal-Zabub, arebbi n Ɛaqrun?’ 4 S uyenni, ammu i iqqar SIDI: ‘War dd-thekkʷid ca zi tassut i x tgeɛɛded, maca ad temmted řmewt.’ ” Uca xenni iffeɣ Iliya.

5 Řami dd-ɛeqben ireqqasen ɣar Aḥaziya, inna asen i nitni: “Min ixs ad yini man aya, řami dd-tɛeqbem ɛawed deɣya?” ^□   6 Nitni arrin-dd xas: “Ijj n weryaz imsagar akidneɣ, inna aneɣ: ‘Ɛeqbem ɣar ujeǧid wenni kenniw dd-issekken, ad as tinim: Ammu i issiweř SIDI, ma s tidett war ɣarwem zeɛma AREBBI di Israil ařami tessekked ḥima ad tesseqsid Baɛal-Zabub, arebbi n Ɛaqrun? S uyenni war dd-thekkʷid ca zi tassut i x tgeɛɛded, maca ad temmted řmewt.’ ” 7 Netta issiweř akidsen: “Mammec igga waddu n weryaz nni kidwem imsagaren u issiweř akidwem awařen-a?” 8 Nitni arrin-dd xas: “Netta d ijj n weryaz, iceɛɛar, ɣares ijj n webyas n ccark x tejɛinna nnes.” Xenni inna netta: “Wa d Iliya, Aticbi.” ^□  

9 Netta issekk řqebṭan n xemsin s xemsin n yeryazen nnes ɣares. Wanita igeɛɛed ɣares, u xzar, Iliya tuɣa ittɣima x tqiccat n wedrar. U netta issiweř ɣares: “Cek, aryaz n AREBBI, ajeǧid inna ac: ‘Hwa-dd!’ ”

10 Iliya yarra-dd u inna i řqebṭan x xemsin: “Mařa necc aqa d aryaz n AREBBI, ejj ad tewḍa tmessi zeg ujenna, ad cek tecc, cek d xemsin n yeryazen nnek.” Řexdenni tewḍa-dd tmessi zeg ujenna, tecca i-t netta d xemsin n yeryazen nnes.

11 Xas uca issekk ɣares ɛawed ijj n řqebṭan nneɣni x xemsin ak-d xemsin n yeryazen nnes. Wanita iṭṭef deg wawař, inna as: “Cek, a aryaz n AREBBI, ammu i iqqar ujeǧid: ‘Hwa-dd deɣya!’ ”

12 Iliya yarra-dd uca inna asen: “Mařa necc d aryaz n AREBBI, ammu i dd ɣa tewḍa tmessi zeg ujenna, ad cek tecc d yeryazen nnek,” Řexdenni tewḍa-dd tmessi zeg ujenna, tecca i-t netta d xemsin n yeryazen nnes.

13 Issekk ɛawed ijj n řqebṭan x xemsin, i twařa wiss třata, ak-d xemsin n yeryazen nnes. Umi igeɛɛed řqebṭan x xemsin wiss třata uca yiweḍ ɣares, yuḍar netta x ifadden nnes zzat i Iliya uca iḥeccem i-t, inna as: “A aryaz n AREBBI, ejj ad teswa tudart inu d tudart n xemsin n imsexxaren nnek, n xemsin-a, di tiṭṭawin nnek.

14 Xzar timessi tewḍa-dd zeg ujenna, tecca tnayen n řqebṭanat x xemsin ak-d xemsin n yeryazen nsen. Ejj ad teswa řexxu tudart inu di tiṭṭawin nnek!”

15 Uca inna Lmalak n SIDI i Iliya: “Hwa akides, war tteggʷed ca zzat i wudem nnes!” Ikkar netta, ihwa akides ɣar ujeǧid.

16 Uca xenni issiweř akides: “Ammu i iqqar SIDI: ‘Maɣar cek tessekked ireqqasen nnek, ḥima ad sseqsan Baɛal-Zabul, arebbi n Ɛaqrun, axmi war din iǧi s tidett AREBBI di Israil ḥima ad t tesseqsid x wawař nnes, x uyenni war dd-thekkʷid ca zi tassut i x tgeɛɛded, maca ad temmted řmewt.’ ”

17 Ammu i immut ɛlaḥsab awař n SIDI i tuɣa issiweř Iliya. Maɣar netta tuɣa war ɣares bu mmis, idweř Yuram d ajeǧid deg wemcan nnes deg useggʷas wiss tnayen n Yahuram, mmis n Yahucafaṭ, ajeǧid n Yahuda.

18 Imezruyen iqqimen n Axazya, d min igga, ma man aya war ittwazemmem ca deg wedlis n imezruyen n ijeǧiden n Israil?