1 Třata n iseggʷusa ḥḍan nitni řhudnet, war din tuɣi amenɣi jar Aram d Israil. 2 Deg useggʷas wiss třata, řami dd-ihwa Yahucafaṭ, ajeǧid n Yahuda, ɣar ujeǧid n Israil, imsar, 3 aqa ajeǧid n Israil inna i imsexxaren nnes: “Ma tessnem aqa Ramut di Jilɛad nneɣ? Ma ittxeṣṣa aneɣ ad neḥḍa řhudnet war ten nettekkes zeg ufus n ujeǧid n Aram?” 4 Xenni inna i Yahucafaṭ “Zeɛma ad kidi teffɣed ɣar umenɣi ɣar Ramut di Jilɛad?” Inna Yahucafaṭ i ujeǧid n Israil: “Necc ad iřiɣ am cek, řgens inu am řgens nnek, iysan inu am yeysan nnek.”

5 Inna Yahucafaṭ ɛawed i ujeǧid n Israil: “Seqsa ɛafak ass-a x wawař n SIDI.” 6 Xenni issmun ujeǧid n Israil inabiyyen, ɛřaḥař arebɛa-mya n yeryazen, uca inna asen: “Ma ad ffɣeɣ ɣar umenɣi ɣar Ramut di Jilɛad niɣ ad t jjeɣ?” Nitni nnan: “Gaɛɛed, maɣar SIDI ad ten iwc deg ufus n ujeǧid.” 7 Maca Yahucafaṭ inna: “Ma war da ca ijj n unabi n SIDI, maḥend ad nzemmar ad t nesseqsa neccin?” 8 Xenni inna ujeǧid n Israil i Yahucafaṭ: “Aqa ɛad da ijj n weryaz i zzayes nzemmar ad nesseqsa SIDI. Maca necc carheɣ t, maɣar netta war d ayi ittnebba ɛemmarṣ s min iṣebḥen, maca mɣir s min iǧan d aɛeffan. Aqa-t d Mixa, mmis n Yimla.” Inna Yahucafaṭ: “War iǧi ammu i ɣa issiweř ajeǧid!” 9 Xenni iřaɣa-dd ujeǧid n Israil i yijj n umsexxar icenɛen, inna: “Deɣya awi-dd Mixa, mmis n Yimla!”

10 Ajeǧid n Israil d Yahucafaṭ, ajeǧid n Yahuda, qqimen din, kuř ijj x řɛarc nnes, yarḍen s warruḍ n ijeǧiden x wazzay ɣar uqemmum n tewwart n tendint n Samarya u marra inabiyyen tuɣa ttnebban zzat i wudem nsen. ^□  ■  

11 Ṣidqiya, mmis n Kanɛana, tuɣa igga i ixef nnes accawen n wuzzař, inna: “Ammu i inna SIDI: ‘S yina i ɣa tessnuqqbed Iramiyyen ař ten ɣa teqḍiḍ.’ ”

12 Marra inabiyyen tuɣa ttnebban kifkif, nnan: “Gaɛɛed ɣar Ramut di Jilɛad, ad tiřid tfeřḥed, minzi SIDI ad ten iwc deg ufus n ujeǧid.”

13 Areqqas wenni tuɣa iṭṭfen abrid ḥima ad iřaɣa i Mixa, issiweř, inna :“Xzar xenni, awařen n inabiyyen axmi dd-ffɣen zeg ijj n uqemmum s řxir ɣar ujeǧid. Ttzawgeɣ ad iřin wawařen nnek amecnaw awařen nsen, siweř min iṣebḥen.”

14 Maca Mixa inna: “S tidett am iddar SIDI, min d ayi ɣa yini SIDI, ad t iniɣ.”

15 Umi dd-yusa ɣar ujeǧid, inna as ujeǧid: “Mixa, ma ad neffeɣ neccin ɣar Ramut di Jilɛad niɣ ad t nejj?” Inna as netta: “Gaɛɛed, ad tiřid tfeřḥed, minzi SIDI ad ten iwc deg ufus n ujeǧid.”

16 Inna as ujeǧid: “Mecḥař n twařawin ittxeṣṣa ayi ad cek ssjaǧeɣ, war d ayi tennid mɣir tidett deg Yisem n SIDI?”

17 Netta inna: “Necc ẓriɣ marra Israil ttwabezzɛen x idurar am wuǧi war ɣarsen bu umeksaw. Inna SIDI: ‘Ina war ɣarsen bu isiditen, ejj kuř aryaz ad dd-idweř ɣar taddart nnes di řehna.’ ”

18 Xenni inna ujeǧid n Israil i Yahucafaṭ: “Ma war d ac nniɣ: ‘Netta ittnebba xafi walu n min iṣebḥen, mɣir min iǧan d aɛeffan?’ ”

19 Mixa inna ɛawed: “S uyenni seř i wawař n SIDI. Necc ẓriɣ SIDI iqqim x řɛarc d marra řɛeskar n ujenna ibedd ɣares, ɣar yeffus nnes u ɣar uzeřmaḍ nnes. ^■   20 SIDI inna: ‘Man wen i ɣa iɣwan Axab ɣares ař ɣa igeɛɛed, ad iwḍa di Ramut di Jilɛad?’ Wa inna ammu u win inna ammu. 21 Xenni iffeɣ-dd ijj n buḥbeř, ibedd zzat i wudem n SIDI, inna: ‘Necc ad t ɣwiɣ.’ SIDI isseqsa t: ‘S minzi?’ 22 Netta inna: ‘Necc ad ffɣeɣ u ad dewřeɣ d ijj n buḥbeř issxarriqen deg uqemmum n marra inabiyyen nnes.’ U netta inna: ‘Ad tfeřḥed maḥend ad t teɣwid. Ffeɣ u egg amenni!’ 23 Xenni řexxu, SIDI iwca ijj n buḥbeř issxarriqen deg ufus n marra inabiyyen nwem uca SIDI ibarreḥ xak s řɣar.” 24 Xenni iqarreb-dd Ṣidqiya, mmis n Kanɛana, ɣar Mixa, iwti t ɣar uɣesmir, inna: “Mani xenni tuɣa zzayi iɛdu arruḥ n SIDI ḥima ad kidek issiweř?” 25 Inna Mixa: “Xzar, ad t tẓared deg wass nni di ɣa temhafed zeg ijj n wexxam deg wexxam nneɣni, ḥima ad tessnuffared ixef nnek.” 26 Ajeǧid n Israil inna: “Ṭṭfem Mixa, nedhem t ɣar Amun, azeǧif ameqqran n tendint, u ɣar Yuwac, mmis n ujeǧid. 27 Ad tinid: ‘Ammu i iqqar ujeǧid: Nḍarem wa di řeḥbes u seccem t s weɣrum n řeḥṣaret u s waman n řeḥṣaret ɣares ař dd ɣa ɛeqbeɣ di řehna.’ ” 28 Mixa inna: “Mařa cek tɛeqbed-dd ca n wass di řehna, aqa SIDI war zzayi issiweř!” Netta inna ɛawed: “Sřem, řegnus, marra kenniw!” ^■  

29 Xenni igeɛɛed ujeǧid n Israil ak-d Yahucafaṭ, ajeǧid n Yahuda, ɣar Ramut di Jilɛad. 30 Inna ujeǧid n Israil i Yahucafaṭ: “Necc ad beddřeɣ arruḍ, xenni ad dd-ffɣeɣ ɣar umenɣi. Cek maca tzemmared ad tyarḍed arruḍ nnek!” Ajeǧid n Israil igga arruḍ war iǧi nnes, iffeɣ-dd ɣar umenɣi. 31 Ajeǧid n Aram tuɣa yumur maca i imeqqranen n ikarruten n umenɣi, inni zzaysen ɣares tnayen u-třatin, inna: “Ittxeṣṣa awem war ttmenɣim ak-d umeqqran niɣ ak-d umeẓyan, mɣir ak-d ujeǧid n Israil!” 32 Umi imeqqranen n ikarruten n umenɣi ẓrin Yahucafaṭ, imsar, aqa nitni nnan: “Aqa d wa, ajeǧid n Israil!” Nitni meyyřen xas ḥima akides mmenɣen, maca Yahucafaṭ isɣuyy. 33 Umi ẓrin imeqqranen n ikarruten n umenɣi, aqa netta tuɣa war iǧi d ajeǧid n Israil, imsar, aqa dewřen-dd war t areddfen ɛad.

34 Xenni iɛeyyen ijj n weryaz s řqews s řbař nnes d acemřař uca iřqef ajeǧid n Israil jar wawaḍen x uɣezdis nnes d warruḍ n wuzzař nnes x idmaren. Řexdenni inna wanita i wenni ineddhen akarru: “Qřeb afus nnek, suffeɣ ayi zi řɛeskar, maɣar iyzmeɣ aṭṭas.” 35 Deg wass nni idweř umenɣi yewɛar aṭṭas. Iqqim ujeǧid ibedd deg ukarru deg umenɣi ak-d Iramiyyen, maca ɣar tmeddit immut. Idammen n uyezzim tuɣa uzzřen deg uɛeddis n ukarru. 36 Ɣar uɣeǧay n tfuct jjin ad barrḥen s jjehd di marra řɛeskar, nnan: “Kuř aryaz ad dd-iɛqeb ɣar tendint nnes u kuř aryaz ɣar temmurt nnes!” 37 Immut ujeǧid, iwyen t ɣar Samarya. Nitni neḍřen ajeǧid di Samarya. 38 Ssirden akarru deg uyeřmam n Samarya uca řesḥen iṭan idammen nnes, mani timɣarin n farq-ccɣeř ssirdent dayes, ɛlaḥsab awař n SIDI i tuɣa inna.

39 Imezruyen iqqimen n Axab, d marra min igga d taddart n řɛaj i ibna d marra tineddam i ibna, ma man aya war ittwazemmem ca deg wedlis n imezruyen n ijeǧiden n Israil? 40 Axab ittwassars deg wenḍeř jar řejdud nnes. Mmis Axazya idweř d ajeǧid deg wemcan nnes.

41 Yahucafaṭ, mmis n Asa, idweř d ajeǧid x Israil, deg useggʷas wiss arebɛa n Axab, ajeǧid n Israil. ^■   42 Yahucafaṭ tuɣa ɣares xemsa u-třatin n iseggʷusa, umi idweř d ajeǧid. Netta iḥkem xemsa u-ɛicrin n iseggʷusa di Urcalim. Yemmas qqaren as Azuba, yeǧis n Calxi. 43 Netta yuyur di marra tibridin n babas Asa, war xasent iḥeyyed ca. Netta igga min iǧan nican di tiṭṭawin n SIDI. 44 Řegɛudi maca war ttwakksent. Řgens yiwi ɛad tiɣarṣa d tewhibin n řebxur x řegɛudi. 45 Yahucafaṭ igga řehna ak-d ujeǧid n Israil.

46 Imezruyen iqqimen n Yahucafaṭ, d tmegga nnes imeḥḍen i igga d mammec imneɣ, ma man aya war ittwazemmem ca deg wedlis n imezruyen n ijeǧiden n Yahuda? 47 Netta imḥa imetleyyen iqqimen zi temmurt, inni tuɣa iqqimen zeg wussan n babas Asa. 48 Di Idum war tuɣi din ca n ujeǧid, maca ijj n lwali n ujeǧid. 49 Yahucafaṭ igga iɣarruba n Tarcic ḥima ad nedhen ɣar Ufir ad awyen ureɣ. Maca war dd-ffiɣen ca, maɣar iɣarruba arẓin ɣar Ɛiṣyun-Jabar. 50 Xenni inna Axazya, mmis n Axab, i Yahucafaṭ: “Ejj imsexxaren inu ad nedhen ak-d imsexxaren nnek x iɣarruba!”, maca Yahucafaṭ yugi. 51 Yahucafaṭ ittwassars deg wenḍeř jar řejdud nnes. Netta ittwanḍeř jar řejdud nnes di tendint n babas Dawud. Mmis Yahuram idweř d ajeǧid deg wemcan nnes.

52 Axazya, mmis n Axab, idweř d ajeǧid x Israil di Samarya, deg useggʷas wiss sbeɛṭac n Yahucafaṭ, ajeǧid n Yahuda. Netta iḥkem tnayen n iseggʷusa x Israil. 53 Netta igga min iǧan d aɛeffan di tiṭṭawin n SIDI. Netta yuyur x webrid n babas u x webrid n yemmas u x webrid n Yarubɛam, mmis n Nabaṭ, wenni yarrin Israil ad ixḍa. 54 Netta tuɣa ittsexxar i Baɛl, yuḍar as. Netta isɛar SIDI, AREBBI n Israil, s marra min tuɣa igga babas.