Řeḥwic n tzayart n Nabut
21
1 Awarni i tmesřayin-a aqa din min imsaren ak-d Nabut, Ayazraɛili, wenni ɣar iǧa ijj n umarjuɛ n uḍiř di Yazraɛil zzat i řeqṣar n Axab, ajeǧid n Samarya. 2 Axab issiweř ak-d Nabut, inna: “Ewc ayi amarjuɛ nnek n uḍiř ḥima ad ɣari yiři d aftis n řxuḍart, maɣar aqa tudes i taddart inu. Necc ad ac wceɣ deg wemcan nnes ijj n umarjuɛ nneɣni n uḍiř iṣbeḥ xas, niɣ mařa man aya d lemliḥ di tiṭṭawin nnek, ad cek xeǧṣeɣ ttman nnes s ttmenyat n nnuqart.” □ 3 Maca Nabut inna i Axab: “SIDI ad ayi iḥḍa, necc ad ac wceɣ tasɣart n ibabaten inu!” 4 Uca iɛqeb Axab ɣar taddart nnes s řxaḍar ixsaren d ixeyyiqen zi ssibbet n wawař i kides issiweř Nabut, Ayazraɛili, umi inna: “Necc war d ac tticeɣ tasɣart n ibabaten inu.” U netta izzeř x qama nnes, yarra aɣembub nnes ɣar řḥiḍ u war icci aɣrum. 5 Tamɣart nnes Izabal tusa-dd ɣares, tessiweř akides: “Min din ařami řxaḍar nnek ixsar ammu u war tᵉttetted aɣrum?” 6 Netta issiweř akides: “Maɣar necc ssiwřeɣ ak-d Nabut, Ayazraɛili, nniɣ as: ‘Ewc ayi amarjuɛ nnek n uḍiř i ttmenyat n nnuqart, niɣ, mařa texsed ad ac wceɣ ijj n umarjuɛ n uḍiř nneɣni deg wemcan nnes!’, maca netta inna: ‘Necc war d ac tticeɣ amarjuɛ inu n uḍiř!’ ” 7 Tenna as temɣart nnes Izabal: “Ma xenni cek ttegged ixef nnek d ajeǧid x Israil? Kkar, ecc aɣrum u ejj uř nnek ad yiři mliḥ! Necc ad ac wceɣ amarjuɛ n uḍiř n Nabut, Ayazraɛili.” 8 Nettat tura tibratin x yisem n Axab uca tcemmeɛ i-tent s txaḍent nnes n ucemmiɛ u tessekk tibratin i imeqqranen u i tarwa n taṣiřet nni tuɣa izeddɣen ɣar Nabut di tendint nnes. 9 Di tebratin tura, tenna: “Barrḥem s yijj n uẓummi u ssɣimem Nabut ɣar zzat n marra řgens
10 uca ssbeddem tnayen n iryazen, ayt i war isekkwin, qibač nnes ḥima ad xas cehden, ad inin: ‘Cek tceqqfed di AREBBI u deg ujeǧid!’ Sufɣem t xenni ɣar barra u arejmem t ɣares ař d immet.”
11 Iryazen n tendint, imeqqranen d tarwa n taṣiřet nni tuɣa izeddɣen di tendint nnes, ggin ɛlaḥsab tabrat i d asen-dd tumur Izabal, am mammec yurin di tebratin nni tuɣa d asen dd-tessekk.
12 Nitni barrḥen s yijj n uẓummi u ssɣimen Nabut ɣar zzat n marra řgens.
13 Xenni usin-dd tnayen n yeryazen, ayt i war isekkwin, uca qqimen qibač nnes. Iryazen i war isekkwin cehden xas, x Nabut, zzat i řgens, nnan: “Nabut iceqqef di SIDI u deg ujeǧid.” Xenni ssuffɣen t barra i tendint uca arejmen t ařami immut.
14 Awarni as jjin ad inin i Izabal: “Nabut ittwarjem u immut.”
15 Umi tesřa Izabal aqa Nabut ittwarjem, immut, imsar, aqa Izabal tenna i Axab: “Kkar, ksi amarjuɛ n uḍiř n Nabut, Ayazraɛili, d řwart, aḥwic i yugin netta ad ac t iwc s ttmenyat n nnuqqart, maɣar Nabut war iddar ca ɛad, maca immut.”
16 Umi isřa Axab, belli Nabut immut, imsar, aqa Axab ikkar maḥend ad ihwa ɣar umarjuɛ n uḍiř n Nabut, Ayazraɛili ḥima ad t iksi d řwart.
17 Xenni yusa-dd wawař n SIDI ɣar Iliya, Aticbi, inna:
18 “Kkar, hwa ḥima ad temmeřqid ak-d Axab, ajeǧid n Israil, wenni iǧan di Samarya. Xzar, netta deg umarjuɛ n uḍiř n Nabut mani ɣar dd-ihwa ḥima ad t iksi d řwart.
19 Ittxeṣṣa ad kides tessiwřed, ad tinid: ‘Ammu i iqqar SIDI: Ma tenɣid u xenni tekksed uřa d tasɣart?’ Ɛawed ittxeṣṣa ad kides tessiwřed, ad tinid: ‘Ammu i iqqar SIDI: Deg wemcan mani řesḥen iṭan idammen n Nabut, ad řesḥen iṭan uřa d idammen nnek, wah d inni nnek!’ ”
20 Inna Axab i Iliya: “Ma tufid ayi cek, a řeɛdu inu?” Netta inna: “Necc ufiɣ cek minzi cek tezzenzed ixef nnek maḥend ad tegged min iǧan d aɛeffan di tiṭṭawin n SIDI. 21 Xzar Necc ad xak ssiwḍeɣ řɣar u ad mḥiɣ min iqqimen nnek. Ad teḥḥiɣ marra wenni t itteggen x řḥiḍ, am wenni ittwaṭṭfen, am wenni umi ijjin di Israil. ■ 22 Necc ad arreɣ taddart nnek am taddart n Yarubɛam, mmis n Nabaṭ, u am taddart n Baɛca, mmis n Axiya, zi ssibbet n wesɛar i zi d ayi tesɛared u umi tarrid Israil ad ixḍa.” ■ 23 Issiweř SIDI uřa x Izabal, inna: “Iṭan ad ccen Izabal ɣar řḥiḍ n zzat n Yazraɛil. ■ 24 Man wen zi Axab i ɣa immten di tendint, ad t ccen iṭan u man wen i ɣa immten deg iyyar ad t ccen ijḍaḍ n ujenna.”
25 Uřa d ijj war iǧi ɛemmarṣ am Axab i izzenzen ixef nnes ḥima ad yegg min iǧan d aɛeffan di tiṭṭawin n SIDI, am t tɛarren temɣart nnes Izabal. ■ 26 Netta igga min iǧan d jjɛifect ař ṭṭarf umi yareddef imeyḍa n l’aṣnam nsen u umi igga ɛlaḥsab marra min iggin Imuriyyen nni tuɣa issuffeɣ SIDI zi řwart zzat i wudem n ayt n Israil.
27 Umi isřa Axab awařen-a, ibda ad icarreg arruḍ nnes, yarḍ ict txancet x arrimet nnes, iẓumm. Ɛawed iṭṭes deg ict n txancet u yuyur s arexwan. 28 Xenni yusa-dd wawař n SIDI ɣar Iliya, Aticbi, inna: 29 “Ma teẓrid mammec issehwa Axab ixef nnes zzat i wudem inu? Minzi issehwa ixef nnes zzat i wudem inu, necc war ssikkʷiḍeɣ řɣar deg wussan nnes, maca deg wussan n mmis ad ssiwḍeɣ řɣar x taddart nnes.”