1 Binhadad, ajeǧid n Aram, issmun marra řɛeskar nnes. Tuɣa akides tnayen u-třatin n ijeǧiden s iysan d ikarruten. Netta igeɛɛed, inneḍ i Samarya u imneɣ akides. 2 Xenni issekk netta ireqqasen ɣar Axab, ajeǧid n Israil, daxeř di tendint. 3 Inna as: “Ammu i iqqar Bin-Hadad: ‘Nnuqart nnek d wureɣ nnek inu. Uřa d timɣarin nnek d iḥenjiren nnek icewwaren, aqa aten inu.’ ” 4 Ajeǧid n Israil yarra-dd xas, inna: “Am mammec tennid, a sidi inu ajeǧid. Necc nnek s marra min ɣari.” 5 Ireqqasen usin-dd ict n twařa nneɣnit, nnan: “Ammu issiweř Binhadad, inna: ‘Waxxa necc jjiɣ ad ac inin: Ittxeṣṣa ad ayi tewced nnuqart d wureɣ nnek d temɣarin nnek d iḥenjiren nnek!, 6 maca tiwecca ɣar řweqt-a ad ssekkeɣ imsexxaren inu ɣarek, maḥend nitni ad arzun di taddart nnek u di tudrin n imsexxaren nnek. Ad imsar belli nitni ad ṭṭfen marra min xak iɛizzen di tiṭṭawin nnek s ifassen nsen ad t awyen.’ ”

7 Xenni iřaɣa ujeǧid n Israil x marra imɣaren n temmurt, inna: “Snem xenni u xzarem aqa wanita inwa řɣar, maɣar tuɣa issekk-dd ɣari maḥend ad iksi timɣarin inu d iḥenjiren inu d nnuqart inu d wureɣ inu u necc war d as t teqḍiɛeɣ.” 8 Marra imɣaren d marra řgens nnan as: “War ɣares ttesři u war d as ttic ttesriḥ!” 9 Xenni inna i ireqqasen n Binhadad: “Inim i sidi inu, ajeǧid: ‘Marra umi i tessekked amsexxar nnek ɣar umezwaru ad t ggeɣ, maca tamesřact-a war zemmareɣ ad t ggeɣ.’ ” Ffɣen ireqqasen uca iwyen as-dd awař-a.

10 Xas uca issekk Binhadad ɣares, inna: “Iři ad ayi ggen irebbiten ammu u ad arnin ɛad ktar, mařa taɛejjajt n Samarya tqedd ḥima ad teccur uru n ifassen n marra řgens i yuyuren deg iṣuraf inu!”

11 Yarra-dd ujeǧid n Israil, inna: “Inim as: ‘Wenni ibeysen abyas, war ittcenneɛ ixef nnes am wenni t issarsen.’ ”

12 Umi isřa i wawař-a, imsar, am tuɣa isess ak-d ijeǧiden deg iqiḍan, aqa inna i imsexxaren nnes: “Sbeddem ixef nwem!” U nitni sswejden ixef nsen i umenɣi ḍidd i tendint.

13 U xzar ijj n unabi yusa-dd ɣar Axab, ajeǧid n Israil, inna: “Ammu i issiweř SIDI: ‘Ma tᵉttwařid cek řɣaci aya ameqqran? Xzar ass-a Necc ad t wceɣ deg ufus nnek ḥima ad tessned aqa Necc d SIDI.’ ”

14 Uca Axab inna: “Zi man wen?” Netta inna: “Ammu i iqqar SIDI: ‘S iḥudriyyen n řḥukkam n lɛamalat.’ ” U netta inna: “Man wen i ɣa ibdan amenɣi?” Inna netta: “D cek!”

15 Xas uca isedd netta iḥudriyyen n řḥukkam n lɛamalat. tuɣa aten di mitayen u-tnayen u-třatin. Isedd awarni asen marra řgens. Marra ayt n Israil, tuɣa aten di sebɛa-ařaf n yeryazen.

16 Ffɣen nitni ɣar wazal. Binhadad tuɣa iscar deg iqiḍan, netta d ijeǧiden, tnayen u-třatin n ijeǧiden i d as iwcin afus.

17 Iḥudriyyen n řḥukkam n lɛamalat ffɣen-dd d imezwura. Binhadad tuɣa issekk ca n ibergagen u nitni xebbaren as, nnan: “Aqa iryazen ffɣen-dd zi Samarya.”

18 Netta inna: “Mařa nitni ffɣen-dd i řehna, ṭṭfem ten ddaren u mařa nitni ffɣen-dd i umenɣi, ṭṭfem ten waxxa amenni am ddaren!”

19 Ffɣen-dd iḥudriyyen-a n řḥukkam n lɛamalat zi tendint ak-d řɛeskar i dd-yusin awarni asen. 20 Kuř aryaz iɣřeb x weɣrim nnes ařami arewřen Iramiyyen u Israil iḍfar i-ten, maca Binhadad, ajeǧid n Aram, injem x uyis ak-d ca n imnayen. ^□  

21 Xenni iffeɣ uřa d ajeǧid n Israil u netta iɣřeb x yeysan d ikarruten n umenɣi ařami igga as ict n tecti d tameqqrant i Aram. 22 Xenni yusa-dd unabi ɣar ujeǧid n Israil, inna as: “Uyur, mḥeḍ ixef nnek, Ssen u xzar min ɣarek ad t tegged, maɣar ɣar ubeddu n useggʷas n jdid ad xak iffeɣ ujeǧid n Aram twařat nneɣnit.

23 Imsexxaren n ujeǧid n Aram nnan as: “AREBBI nsen d ijj n arebbi n idurar, s uyenni xaneɣ jehden. Mařa neccin maca nemneɣ akidsen di řwaṭa, xenni ad xasen nejhed nican! 24 Egg min iqqar wawař-a: Kkes kuř ijj zeg ijeǧiden zeg wemcan nnes u ggem lwulat deg wemcan nsen. 25 Smun ammu ijj n řɛeskar am řɛeskar nni tweddared, s yeysan am yeysan nni u s ikarruten am ikarruten nni, uca ejj aneɣ akidsen nemneɣ di řwaṭa. Uct mařa xenni neccin war xasen nejhid!” U netta isřa ɣarsen uca amenni i igga. ^□   26 Ɣar ubeddu n useggʷas n jdid, imsar, aqa Binhadad isedd Aram. Iffeɣ ɣar Afiq i umenɣi ak-d Israil. 27 Uřa d ayt n Israil ttwasedden. Wcin asen řeɛweč u nitni ffɣen i umsagar akidsen. Ayt n Israil wtin iqiḍan nsen ajemmaḍ nsen amecnaw tnayen n tḥimriwin timeẓyanin n iɣayḍen. Inni n Aram maca ɛemmaren tammurt. 28 Yusa-dd ɣarsen weryaz n SIDI, issiweř ak-d ujeǧid n Israil, inna: “Ammu i issiweř SIDI: ‘Minzi inni n Aram innan: SIDI d ijj n arebbi n idurar, war iǧi d ijj n arebbi n tseǧyin!’, x uya i ɣa wceɣ řɣaci aya ameqqran deg ufus nnek, ḥima kenniw ad tɛeqřem, aqa Necc d SIDI.” 29 Tuɣa wtin iqiḍan nsen sebɛa n wussan arendad n wayawya. Deg wass wiss sebɛa, imsar, aqa ikkar umenɣi. Deg ijj n wass nɣin ayt n Israil myat-ařef n yeryazen x iḍaren zi Aram.

30 Inni iqqimen arewřen ɣar tendint n Afiq uca řḥiḍ iwḍa x sebɛa u-ɛicrin-ařef n yeryazen, nni tuɣa iqqimen. Uřa Binhadad tuɣa yarweř uca yudef ɣar tendint, yuyur zeg ijj n wexxam ɣar ijj n wexxam nneɣni. 31 Xenni nnan as imsexxaren nnes: “Xzar, neccin nesřa, aqa ijeǧiden n taddart n Israil d ijeǧiden daysen tamexsiwt icewwaren. Ejj aneɣ ad nebyes s txuncay n wecḍan ɣar webyas u s iseɣwan ɣar izeǧifen nneɣ uca ad neffeɣ ɣar ujeǧid n Israil. Ad taɣ ad cek yejj ad teddared.” ^□   32 Nitni beysen s txuncay n wecḍan u ggin iseɣwan ɣar izeǧifen nsen uca ammu dd-usin nitni ɣar ujeǧid n Israil, nnan: “Amsexxar nnek Binhadad inna: ‘Ejj ad iddar řeɛmar inu!’ ” U netta inna: “Ma netta ɛad aqa t iddar? Netta d uma!” 33 Iryazen fehmen aya d ict n řeɛřamet teṣbeḥ uca arzun deɣya x ca ma aqa man aya nican, uca nnan: “Umac Binhadad ...” Uca netta inna: “Asem-dd, awyem t-i-dd danita.” Xenni iffeɣ Binhadad ɣares u netta issenya t deg ukarru. 34 Inna as Binhadad: “Tineddam nni tuɣa iṭṭef baba zi babac, ad ten arreɣ. Iwa egg i yixef nnek tibridin di Dimacq am mammec igga baba tibridin di Samarya.” Uca Axab inna: “Necc ad ac arxuɣ x ijj n řɛahd.” U netta iqqen akides ijj n řɛahd uca yarxu as.

35 Ijj n weryaz zeg ayt n inabiyyen inna i umqarreb nnes s wawař n SIDI: “Wwet ayi!” Aryaz yugi maca ad t iwwet. 36 Inna as netta: “Minzi cek war tesřid ɣar tmijja n SIDI, xzar, ɣar ad xafi teffɣed, ad cek ineɣ ijj n weyrad.” Umi xas yuyur, iřqef i-t ijj n weyrad u wanita inɣa i-t. 37 Xenni yufa ijj n weryaz nneɣni, inna: “Wwet ayi!” Aryaz nni iwta i-t ammu ařami t iyzem.

38 Yuyur unabi, ibedd ɣar webrid i umeřqi ak-d ujeǧid. Issnuffar ixef nnes s ict n tkettant x tiṭṭawin nnes. 39 Umi dd-iɛdu ujeǧid, imsar, aqa iřaɣa i ujeǧid, inna: “Amsexxar nnek tuɣa iffeɣ ɣar řwest n umenɣi. Uca xzar, aqa din ijj weryaz yusa-dd ɣar uɣezdis, yiwi ayi-dd ijj n weryaz, inna: ‘Ḥḍa aryaz-a, maca mařa iweddar ɣar useddi n řɛeskar, ad yiři řeɛmar nnek deg wemcan nnes niɣ ad txeǧṣed ict n talint n nnuqart.’ ” 40 Řami tuɣa ittceɣeř umsexxar nnek da d diha, imsar, aqa war din iqqim ɛad.” Inna as ujeǧid n Israil: “Wa d řḥukm nnek, tewtid t s yixef nnek!”

41 Netta ikkes deɣya takettant x tiṭṭawin nnes uca iɛqeř i-t ujeǧid n Israil, aqa-t d ijj zeg inabiyyen. 42 Netta inna as: “Ammu i issiweř SIDI: ‘Minzi cek tejjid aryaz nni ḥarrmeɣ necc i uteḥḥi ad injem zeg ufus nnek, ad yiři řeɛmar nnek deg wemcan n řeɛmar nnes u řgens nnek deg wemcan n řgens nnes.” ^■   43 Ajeǧid n Israil yuyur s řxaḍar ixsaren d ixeyyiqen ɣar taddart uca yusa-dd ɣar Samarya.