1 Imsar awarni i řmewt n Cawul, umi dd-iɛqeb Dawud zi řeɣřeb x Iɛamaliqiyyen, iqqim Dawud tnayen n wussan di Ṣiqlaɣ. ^■   2 Xenni imsar deg wass wiss třata, aqa da, yusa-dd ijj n weryaz zi řmargeḥ n řɛeskar n Cawul s warruḍ icarreg u s ucař x uzeǧif nnes. Umi dd-yiweḍ netta ɣar Dawud, iwḍa ɣar temmurt, yuḍar as. 3 Dawud inna as: “Manis i dd-tusid cek?” Netta inna as: “Necc ssnejmeɣ-dd ixef inu zi řmargeḥ n řɛeskar n Israil.” 4 Dawud inna as: “Min din d řexbar? Ini ayi t!” Netta yarra-dd xas: “Řgens yarweř zeg umenɣi u aṭṭas n řgens i ittwawten, mmuten. Uřa d Cawul d mmis Yunatan mmuten.” 5 Dawud inna i uḥudri nni d as dd-yiwyen řexbar: “Mammec teggid cek tessned, belli Cawul d mmis Yunatan mmuten?” 6 Xenni inna uḥudri i d as dd-yiwyen řexbar: “Necc usiɣ-dd amenni waha ɣar idurar n Jilbuɛa uca ẓriɣ mammec isenned Cawul x lansa nnes u ikarruten n umenɣi d imnayen inni xasen inyin ḍeffaren t břa qeṭṭu. ^□   7 Netta, am dd-inneqřeb, iẓra ayi, iřaɣa ayi-dd u necc nniɣ as: ‘Aqa-yi da!’ 8 Netta inna ayi: ‘Min teɛnid cek?’ Necc nniɣ as: ‘Necc d ijj n Uɛamaliqi.’ 9 Uca inna ayi netta: ‘As-dd ɣari u neɣ ayi, maɣar necc teřqef ayi tuccent, maca waxxa amenni ɛad tudart aqa-tt dayi.’ ^□  

10 Řexdenni necc uyureɣ u nɣiɣ t, maɣar necc ssneɣ, aqa war itteddar awarni i uweṭṭu nnes. Xenni ksiɣ tamrist n weɛzař nni x uzeǧif nnes d tmeqyast i tuɣa ɣares deg uɣiř, iwyeɣ tent-i-dd řexxu da i sidi inu.”

11 Řexdenni iṭṭef Dawud arruḍ nnes, icarreg i-t. Ammu i tt ggin uřa d marra iryazen i tuɣa ɣares iǧan. ^■  

12 Nitni wtin agejdur, run u ẓummen ɣares ař tameddit x Cawul u x mmis Yunatan u x řgens n SIDI u x taddart n Israil, minzi wḍan s ssif.

13 Xenni inna Dawud i uḥudri nni tuɣa i d as-dd yiwyen řexbar: “Zi manis dd-tusid cek?” Netta inna as: “Necc d mmis n ijj n ubarrani, n ijj n Uɛamaliqi.”

14 Dawud inna as: “Mammec teggid, cek war teggʷided ca ad tesswiẓẓḍed s ufus ḥima ad tenɣed amedhun n SIDI?”

15 Xas uca iřaɣa-dd Dawud x ijjen zeg iḥudriyyen, inna: “Qarreb-dd, ḥeyyeḥ xas!” U netta iḥeyyeḥ xas ařami t inɣa.

16 Dawud inna as: “Idammen nnek ad iřin x uzeǧif nnek, maɣar aqemmum nnek iched xak umi tennid: ‘Necc nɣiɣ amedhun n SIDI.’ ”

17 Dawud iɣennej aya n yezři n wecḍan x Cawul u x mmis Yunatan.

18 Netta inna: “Ad řemden ayt n Yahuda Izři n Řqews.” Xzar, ittwari deg Wedlis n Umsegged. ^■  

19 “Talwizt n Israil ittwaneɣ x řegɛudi nnek.

Mammec wḍan ayt n bu-teɣruḍt!

20 War t ttḥajam di Jat, war ttṣiwḍem řexbar deg ibriden n Acqalun,

maḥend yessis n Ifilisṭiniyyen war farrḥent,

maḥend yessis n yinni war ittwaxetnen war ssřiwřiwent. ^■  

21 A idurar n Jilbuɛa, war xawem ittiři nnda niɣ anẓar,

uřa d iyyaren s tewhibin n usgeɛɛed n ṣṣabet,

maɣar din ittwabeqqeḍ s řɛar taseddart n ayt n bu-teɣruḍt,

taseddart n Cawul, axmi netta war iǧi d amedhun s zzect.

22 Zeg idammen n yinni ittwanɣen u zi tadunt n ayt n bu-teɣruḍt,

war d imniɛ řqews n Yunatan

u ssif n Cawul war dd-iɛqib baṭeř.

23 Cawul d Yunatan ttwaɛizzen u iɣřan ɣar iwdan di tudart nsen

u di řmewt nsen war mmsebḍin.

Nitni tuɣa aten fsusen x igidaren d jehden x wayraden.

24 A yessis n Israil, runt x Cawul,

wenni kennint issyarḍen s uzeggʷaɣ, s řeqcuɛ iɣřan,

d wenni iggin ict n telwizt n wureɣ x warruḍ nkent.

25 Mammec i wḍan ayt n bu-teɣruḍt deg umenɣi!

Yunatan ittwaneɣ x řegɛudi nnek.

26 Di ssibbet nnek ttwaḥṣareɣ, a uma inu Yunatan!

Cek tuɣa tᵉttwaɛizzed ɣari aṭṭas.

Tuɣa tayri nnek ɣari d ssar ktar x tayri n temɣarin.

27 Mammec i wḍan ayt n bu-teɣruḍt