Dawud ittwadhen am ujeǧid x Yahuda
2
1 Awarni i uya imsar, aqa Dawud isseqsa SIDI, inna: “Ma ad geɛɛdeɣ ɣar icten zi tneddam n Yahuda?” SIDI inna as: “Gaɛɛed!” Uca Dawud inna: “Mani i ɣa geɛɛdeɣ?” Netta inna: “Ɣar Ḥabrun.” 2 Xenni Dawud igeɛɛed ɣar Ḥibrun ak-d tnayen n temɣarin nnes, Axinuɛam zi Yazraɛil, u Abijayil, tamɣart n Nabal zi Karmil. 3 Dawud yarra ad geɛɛden ɛawed iryazen nni tuɣa akides iǧan, kuř aryaz ak-d twacunt nnes, uca nitni uyuren ad zedɣen di tneddam n Ḥabrun. 4 Awarni i uya usin-dd yeryazen n Yahuda ɣar Ḥibrun uca dehnen Dawud dinni d ajeǧid x taddart n Yahuda. Xenni usin-dd ḥima ad xebbaren Dawud, nnan: “Iryazen n Yabic di Jilɛad aqa neḍřen Cawul.” 5 Xenni issekk Dawud ireqqasen ɣar yeryazen n Yabic di Jilɛad, inna asen: “Ad kenniw ibarek SIDI, minzi kenniw teggim i Cawul, sidi nwem, s tmexsiwt icewwaren uca tneḍřem t. 6 Iři ad awem isscen SIDI řexxu tamexsiwt nnes icewwaren d řaman nnes. Uřa d necc ad awem ggeɣ s tcuni minzi aqa kenniw teggim aya. 7 Xenni řexxu, jjem ad ttwasjehden ifassen nwem u iřim tmeḥḥdem, maɣar Cawul, sidi nwem, immut. Uřa d taddart n Yahuda tedhen ayi d ajeǧid xasen.”
Dawud d Icbusat, mmis n Cawul
8 Abnir, mmis n Nir, akumandar n řɛeskar n Cawul, tuɣa yiwi akides Ic-Bucat, mmis n Cawul, ɣar Maḥanayim. 9 Netta igga i-t d ajeǧid x Jilɛad, x Iccuriyyen, x Yazraɛil, x Ifrayim, x Binyamin u x marra Israil.
10 Ic-Bucat, mmis n Cawul, tuɣa ɣares arebɛin n iseggʷusa umi idweř netta d ajeǧid x Israil u netta iḥkem tnayen n iseggʷusa. Mɣir inni n taddart n Yahuda aqa nitni bedden ak-d Dawud.
11 Řqedd n wussan i tuɣa Dawud iḥekkem di Ḥabrun am ujeǧid x taddart n Yahuda, tuɣa sebɛa n iseggʷusa d setta n iyuren. ■
12 Abnir, mmis n Nir, iffeɣ ak-d imsexxaren n Ic-Bucat, mmis n Cawul, zi Maḥanayim ɣar Jibɛun.
13 Uřa d Yuwab, mmis n Ṣaruya, ak-d imsexxaren n Dawud, ffɣen uca nitni mmeřqan ak-d wayawya ɣar uyeřmam n Jibɛun. Dinni qqimen nitni bedden, ijj ɣar uɣezdis-a n uyeřmam u wenneɣni x ujemmaḍ n uyeřmam.
14 Inna Abnir i Yuwab: “Ejj iḥudriyyen ad kkaren ad mmuɣzřen zzatneɣ.” Yuwab inna: “Nitni ad kkaren!”
15 Nitni kkaren, xenni ɛeddun. Aqa ttwaḥesben tenɛac zi Binyamin i Ic-Bucat, mmis n Cawul, u tenɛac zeg imsexxaren n Dawud.
16 Ijj iṭṭef wenneɣni zeg uzeǧif u ijju t s ssif deg uɣezdis n wenneɣni u nitni wḍan s tnayen idsen. S uyenni qqaren as i wemcan nni Ḥalqat-Haṣurim wenni iǧan ɣar Jibɛun.
17 Deg wass nni idweř umenɣi iqseḥ aṭṭas. Abnir d yeryazen n Israil ttwaɣellben zzat i wudem n imsexxaren n Dawud.
18 Tuɣa din třata n iḥenjiren n Ṣaruya, nitni d Yuwab, Abicay d Ɛasayil. Ɛasayil tuɣa ifsus x iḍaren am ijj n iɣayḍen n wezɣar deg iyyar.
19 Ɛasayil iḍfar Abnir u umi tuɣa iggur, war iḥeyyed řa ɣar ḍeffar n Abnir ɣar yeffus uřa ɣar uzeřmaḍ. 20 Uca inneqřeb Abnir, inna: “Ma d cek, Ɛasayil?” U netta inna: “D necc!” 21 Abnir inna as: “Farɣ maca ɣar yeffus uřa ɣar uzeřmaḍ u cebbar deg ijj zeg iḥudriyyen u ksi i yixef nnek min ɣares!” Ɛasayil maca war ixs ad xas iḥeyyed zi ḍeffar nnes. 22 Xenni inna Abnir ɛawed i Ɛasayil: “Ḥeyyed zi ḍeffar inu. Mayemmi cek i ɣa wteɣ ɣar temmurt? Mammec i ɣa ggeɣ xenni ɛad ad xzareɣ i umac Yuwab di tiṭṭawin?” 23 Netta maca yugi ad as iḥeyyed. Xenni ijju as Abnir s yixef aneggaru n lansa nnes deg uɛeddis, ařami dd-issuffeɣ fřitca zi ḍeffar. Netta iwḍa din uca immut deg wemcan nni. Imsar belli marra inni dd-yusin ɣar wemcan mani iwḍa u mani immut Ɛasayil, qqimen bedden. 24 Yuwab d Abicay maca ḍfaren Abnir. Řami dd-iwḍen nitni ɣares ař tawrirt n Amma, tenni zzat i Jiyaḥ, ɣar webrid n řexřa n Jibɛun, teɣři tfuct. 25 Ayt n Binyamin munen deg weḍfar n Abnir uca dewřen d ict n terbiɛt uca ammu i bedden nitni x tqiccet n ict n tewrirt. 26 Abnir iřaɣa-dd x Yuwab, inna: “Ma ad icc ssif i řebda? Ma war tessined cek aqa aya ad indeh ɣar ijj n uqeṭṭu d amerzag? Ař meřmi ɛad war teqqared i řgens nnek ḥima ad dd-iɛqeb zeg weḍfar n aytmatsen?” 27 Yuwab inna: “S tidett am iddar AREBBI, mařa cek war tessiwřed x ijj n umuɣzeř, xenni ad yiři řgens ibedd zi man aya ɣar ṣṣbeḥ, iři kuř aryaz ad issbedd zeg weḍfar n umas!” 28 Xenni iṣuḍ Yuwab deg uyicc n icarri u marra řgens ibedd u war ḍfaren ɛad Israil uca war mmenɣen ɛad ktar.
29 Abnir d yeryazen nnes cuqqen ǧiřet nni marra di Řewḍa u ẓwan L'Urdun, kkin x marra ifri n jjarf n Bitrun uca iwḍen ɣar Maḥanayim. 30 Uřa d Yuwab iɛqeb-dd zeg weḍfar n Abnir u netta issmun marra řgens. Weddaren tseɛṭac n imsexxaren n Dawud uřa d Ɛasayil. 31 Imsexxaren n Dawud maca tuɣa wtin aṭṭas n yeryazen zeg ayt n Binyamin u zeg yeryazen n Abnir. Mmuten teřt-mya u-settin n yeryazen. 32 Nitni ssgeɛɛden Ɛasayil u neḍřen t deg wenḍeř n babas di Bayt-Laḥm. Yuwab d yeryazen nnes uyuren ǧiřet nni marra u řami iwḍen ɣar Ḥabrun, tenqar-dd xasen tfawt.