1 Tuɣa ajeǧid Dawud iwsar u imɣar deg wussan. Ssduriyen t s maltat, maca waxxa amenni war t iřqif ɛad řeḥmu. 2 Nnan as imsexxaren nnes: “Ejj ad arzun i sidi inu, ajeǧid, ict n teḥramt d taɛzarect u ejj i-tt ad tbedd zzat i wudem n ujeǧid, ad dayes tᵉthilla. Ejj i-tt ad tᵉṭṭeṣ ɣar idmaren nnes, ḥima sidi inu, ajeǧid, ad idweř iḥemma.” 3 Arzun nitni di marra tammurt n Israil x ict n tḥarmuct dayes aẓri. Ufin Abicaj, Tacunamit, uca iwyen tt ɣar ujeǧid. ^□   4 Taḥramt tuɣa dayes aẓri aṭṭas u nettat tᵉthilla dayes u tsexxar xas. Ajeǧid war tt issin ca. ^□  

5 Aduniya, mmis n Hajjit, ixs ad issuɛřa ixef nnes, inna: “Necc ad dewřeɣ d ajeǧid.” Netta idebbar ikarruten d imnayen uca izwaren xemsin n yeryazen s tazřa zzat i wudem nnes. ^■   6 Babas tuɣa ɛemmarṣ war xas isseqseḥ x man aya řami d as inna: “Mayemmi i teggid aya?” Ɛawed Aduniya tuɣa ɣares ijj n waddud icna. Yemmas turuw t-i-dd awarni i Abcalum. ^□  ■   7 Issiweř ak-d Yuwab, mmis n Ṣaruya, u ak-d Abyatar, akehhan, uca nitni wcin afus i Aduniya. ^■   8 Maca Ṣaduq, akehhan, d Banaya, mmis n Yahuyadaɛ, d Natan, anabi, d Cimɛi d Riɛi uřa d ayt n bu-teɣruḍt nni iǧan ɣar Dawud, war qqinen ca ixef nsen ɣar Aduniya.

9 Aduniya iɣarṣ i wuǧi d ifunasen d tfunasin d řmař iṣeḥḥen ɣar weẓru n Zaḥifa wenni ɣar tařa n Rujil. Netta iɛarḍ marra aytmas, iḥenjiren n ujeǧid, u marra iryazen n Yahuda, imsexxaren n ujeǧid. ^■  

10 Maca anabi Natan d Banaya d ayt n bu-teɣruḍt d umas Suliman, war ten iɛriḍ ca.

11 Xenni inna Natan i Batcabaɛ, yemmas n Suliman, inna: “Ma war tesřid cek, aqa Aduniya, mmis n Hajjit, idweř d ajeǧid? Aqa Dawud, siditneɣ, war xas yargib?

12 Xenni řexxu, as-dd, ejj ayi ad am wceɣ ccwar, ḥima ad tessnejmed tudart nnem d tudart n mmim Suliman.

13 Uyur, adef ɣar ujeǧid Dawud, ini as: ‘A sidi inu, ajeǧid, ma war tejjuǧed i temsexxart nnek uca tennid: S tidett, mmim Suliman ad yiři d ajeǧid awarni ayi u netta ad iqqim x řɛarc inu? Mayemmi iǧa xenni Aduniya d ajeǧid?’

14 Xzar umi cem dinni tessawařed ɛad ak-d ujeǧid, ad adfeɣ uřa d necc ad kemmřeɣ awařen nnem.”

15 Batcabaɛ tudef ɣar ujeǧid deg wexxam n daxeř. Ajeǧid tuɣa iwsar aṭṭas u Abicaj, Tasunamit, tsexxar xas.

16 Batcabaɛ tesseqwes azeǧif, tuḍar i ujeǧid, uca ajeǧid inna: “Min cem yuɣin?”

17 Nettat tenna as: “A sidi, cek tejjuǧed i temsexxart nnek ɣar SIDI, AREBBI nnek: ‘S tidett, Suliman, mmim, ad yiři d ajeǧid awarni ayi u netta ad iqqim x řɛarc inu!

18 Uca řexxu, xzar, Aduniya idweř d ajeǧid, u řexxu, sidi inu, ajeǧid, cek war xas tessargibed ca.

19 Netta iɣarṣ i waṭṭas n ifunasen d řmař iṣeḥḥen d wuǧi u netta iɛarḍ x marra iḥenjiren n ujeǧid u x Abyatar, akehhan, u x Yuwab, akumandar n řɛeskar, maca amsexxar nnek Suliman, war t iɛriḍ ca. 20 Ɣarek cek, sidi inu, ajeǧid, ɣarek cek xezzarent marra tiṭṭawin n Israil, ḥima cek ad asen tessecned man wen i ɣa iqqim x řɛarc n sidi inu, ajeǧid, awarni as netta. 21 Niɣ ad imsar, mařa sidi inu, ajeǧid, ad igg ad ittwassars deg wenḍeř jar řejdud nnes, aqa necc d mmi Suliman ad ttwaḥesben d ayt n řmuɛṣiyyet.’ ” ^□  

22 U xzar, am tessawař nettat ɛad ak-d ujeǧid, yudef-dd anabi Natan. 23 Xebbaren aya i ujeǧid, nnan: “Xzar, aqa da anabi Natan.” Netta yusa-dd zzat i wudem n ujeǧid, yuḍar i ujeǧid s uɣembub nnes ɣar temmurt. 24 Inna Natan: “Sidi inu, ajeǧid, ma tennid cek: ‘Aduniya ad yiři d ajeǧid awarni ayi u netta ad iqqim x řɛarc inu!’? 25 Maɣar netta ihwa ass-a u netta iɣarṣ i waṭṭas n řebhayem d řmař iṣeḥḥen d wuǧi u iɛarḍ x marra iḥenjiren n ujeǧid u x ikumandaren n řɛeskar u x ukehhan Abyatar. Xzar nitni ttᵉtten, sessen zzat i wudem nnes, qqaren: ‘Ad iddar ujeǧid Aduniya!’ 26 Maca necc, necc wenni d amsexxar nnek, d ukehhan Ṣaduq d Banaya, mmis n Yahuyadaɛ, d Suliman, amsexxar nnek, war d aneɣ iɛriḍ ca. 27 Ma iffeɣ-dd wawař-a zi sidi inu, ajeǧid? Ma xenni war tessargibed ca amsexxar nnek, man wen i ɣa iqqim x řɛarc n sidi inu, ajeǧid, awarni as?”

28 Ajeǧid Dawud yarra-dd xas, inna: “Řaɣat ayi-dd x Batcabaɛ!” Nettat tusa-dd ɣar zzat i wudem n ujeǧid, tbedd din zzat i wudem n ujeǧid. 29 Xenni ijjuǧ ujeǧid, inna: “S tidett am iddar SIDI, wenni ifekken řeɛmar inu zi marra řeḥṣaret, 30 wah nican, am d am jjuǧeɣ ɣar SIDI, AREBBI n Israil, nniɣ: ‘Aqa mmim Suliman ad yiři d ajeǧid awarni ayi u netta ad iqqim x řɛarc inu deg wemcan inu!’, wah, ammu i-t ɣa ggeɣ s tidett ass-a.” 31 Uca tuḍar Batcabaɛ s uɣembub nnes ɣar temmurt, teqqunjeř i ujeǧid, tenna: “Ad iddar sidi inu, ajeǧid Dawud, i řebda!”

32 Xas uca inna ujeǧid Dawud: “Řaɣat ayi-dd i ukehhan Ṣaduq d unabi Natan d Banaya, mmis n Yahuyadaɛ!” Uca nitni usin-dd zzat i wudem n ujeǧid. 33 Inna asen ujeǧid: “Ksim imsexxaren n siditwem akidwem u ejj mmi Suliman ad iniy x usardun i ɣari iǧan u sehwa t ɣar Jiḥun. 34 Ejj akehhan Ṣaduq, ak-d unabi Natan, ad t idhen dinni d ajeǧid x Israil. Xenni ad tṣuḍem deg uyicc n icarri, ad tinim: ‘Tudart i Suliman!’ 35 Ittxeṣṣa ad tgeɛɛdem awarni as u netta ad dd-yas ad iqqim x řɛarc inu. Netta ad yiři d ajeǧid deg wemcan inu, maɣar necc umureɣ as ḥima ad yiři d amgewwed x Israil u x Yahuda.” 36 Banaya, mmis n Yahuyadaɛ, yarra-dd x ujeǧid, inna: “Amin, ammu i iqqar SIDI, AREBBI n sidi inu, ajeǧid! 37 Am mammec tuɣa iǧa SIDI ak-d sidi inu, ajeǧid, ammu i ɣa yiři netta uřa ak-d Suliman. Iři netta ad issemɣar ɛad řɛarc nnes x řɛarc n sidi inu, ajeǧid Dawud!”

38 Xenni ihwa ukehhan Ṣaduq ak-d unabi Natan d Banaya, mmis n Yahuyadaɛ, u ak-d iɛessasen n arrimet d ireqqasen n tazřa. Nitni ssenyen Suliman x usardun n ujeǧid Dawud u nedhen t ɣar Jiḥun. 39 Akehhan Ṣaduq, iksi icc s zzect zeg uqiḍun uca idhen Suliman. Nitni ṣuḍen deg uyicc n icarri u marra řgens inna: “Tudart i ujeǧid Suliman!” ^■   40 Marra řgens igeɛɛed awarni as. Iwdan ṣeffaren di tzamarin u farḥen ict n řefraḥet temɣar ařami tfeǧeq temmurt s řḥess nsen. ^□  

41 Aya sřin t Aduniya d marra inewjiwen inni ɣares iǧan. Nitni tuɣa bḥřa mmunswen. Uřa d Yuwab isřa i uṣuḍi deg uyicc n icarri, inna: “Mana řḥess zi tendint ammu s zzhir aṭṭas?” 42 Am issawař netta ɛad, yusa-dd Yunatan, mmis n ukehhan Abyatar. Aduniya inna: “Adef-dd ɣar daxeř, minzi cek d ijj n weryaz imeḥḍen. Cek ad tawyeḍ nican ijj n řexbar aṣebḥan.” 43 Yunatan yarra-dd, inna i Aduniya: “S řemqřub, siditneɣ, ajeǧid Dawud, igga Suliman d ajeǧid. 44 Ajeǧid issekk akides akehhan Ṣaduq d unabi Natan d Banaya, mmis n Yahuyadaɛ, d iɛessasen n arrimet d ireqqasen n tazřa u ina ggin t ad iniy x usardun n ujeǧid. 45 Akehhan Ṣaduq d unabi Natan dehnen t d ajeǧid di Jiḥun u ssenni geɛɛden s řefraḥet ařami tehweř tendint. Aya d řḥess i tesřim. 46 Uřa d Suliman ittɣima x řɛarc n tgeldit. 47 Uřa d imsexxaren n ujeǧid usin-dd ḥima ad barken siditneɣ, ajeǧid Dawud, nnan: ‘Iři ad yarr AREBBI isem n Suliman ɛad icna x yisem nnek u ad yarr AREBBI řɛarc nnes ɛad imɣar x řɛarc nnek.’ Uca ajeǧid yuḍar x tassut nnes. 48 Ɛawed inna ujeǧid: ‘Ad ittwabarek SIDI, AREBBI n Israil, wenni d iwcin ass-a ad iqqim ijjen x řɛarc inu, umi tiṭṭawin inu ɛad zemmarent ad twařant aya.’ ”

49 Marra inewjiwen inni tuɣa iǧan ɣar Aduniya nnxeřɛen, kkaren uca ffɣen, kuř aryaz yuyur abrid nnes. 50 Aduniya iggʷed zi Suliman. Netta ikkar, yuyur uca icebbar deg waccawen n uɛalṭar. 51 Xebbaren man aya ɣar Suliman, nnan: “Xzar, Aduniya, iggʷed zeg ujeǧid Suliman, maɣar aqa netta icebbar deg waccawen n uɛalṭar, iqqar: ‘Ejj ajeǧid Suliman ad ayi ijjaǧ ass-a, aqa netta war ineqq amsexxar nnes s ssif!’ ” 52 Inna Suliman: “Mařa netta iban-dd d ijj n weryaz d amtiqqi, war xas iweṭṭi uřa d ijj n uzuṭṭu n ucewwaf nnes, maca mařa ittwaf dayes tuɛeffna, ittxeṣṣa ad immet.” 53 Ajeǧid Suliman issekk ca n ireqqasen u nitni kessin t zeg uɛalṭar u netta yusa-dd, yuḍar zzat i ujeǧid Suliman. Inna as Suliman: “Ruḥ ɣar taddart nnek!”