1 Umi i dd-udsen wussan n Dawud ad immet, iɛřem netta i mmis Suliman, inna: 2 “Necc ad uyureɣ abrid n marra tammurt. Iři tmeḥḍed u iři d aryaz! 3 Ḥḍa awekkeř n SIDI, AREBBI nnek, ḥima ad tuyured di tebridin nnes, maḥend ad tᵉṭṭfed di tweṣṣa nnes d řumurat nnes d lfarayiḍ nnes d cchadat nnes am mammec t yura di Ccariɛa n Musa, ḥima ad tegged s řeɛqeř di marra min ɣa tegged d mani ma i ɣa traḥed, ^■   4 ḥima ad ikemmeř SIDI awař nnes i xafi issiweř, umi inna: ‘Mařa iḥenjiren nnek ad ḥḍan abrid nsen s wuř nsen marra u s řeɛmar nsen marra ḥima ad uyuren s řaman zzat i wudem inu, xenni war cek ittxeṣṣi weryaz x řɛarc n Israil. ^■  

5 Cek tessned ɛawed min i d ayi igga Yuwab, mmis n Ṣaruya, min igga netta i tnayen n ikumandaren n řɛeskar n Israil, i Abnir, mmis n Nir, u i Ɛamasa, mmis n Yatir. Netta inɣa i-ten. Di řweqt n řehna issizzeř idammen am di řweqt n umenɣi uca am di řweqt n umenɣi igga idammen ɣar webyas nnes i ɣares ɣar tejɛinna nnes uřa ɣar sandaliyat nnes nni x iḍaren nnes. ^■   6 Egg ɛlaḥsab tiɣit nnek u war ttejji acewwaf nnes icaben ad ihwa ɣar řaxart di řehna.

7 Scen tamexsiwt icewwaren i ayt n Barzillay, Ajilɛadi. Nitni ad iřin jar inni i ɣa iccen zi ṭṭabřa nnek, maɣar ammu i dd-yusin ɣari umi arewřeɣ zzat i wudem n umac Abcalum. ^■   8 Xzar Cimɛi, mmis n Jira, Abinyamini, zi Baḥurim. uřa d netta akidek. Netta inɛeř ayi s ict n nneɛřet iqesḥen deg wass umi necc arewřeɣ ɣar Maḥanayim, maca immseřqa akidi ɣar L'Urdun u necc jjuǧeɣ as ɣar SIDI, nniɣ: ‘Ɣari mařa ad cek nɣeɣ s ssif!’ ^■   9 Xenni řexxu, war t ḥeṣṣeb d amezdag, maɣar cek d ijj n weryaz d amiɣis u tessned min d as ɣa tegged ḥima acewwaf nnes icaben ad ihwa ɣar řaxart s idammen.”

10 Dawud ittwassars deg wenḍeř jar řejdud nnes. Netta ittwanḍeř di tendint n Dawud. ^■  

11 Ussan i di tuɣa iḥekkem Dawud x Israil, tuɣa aten arebɛin n iseggʷusa. Sebɛa n iseggʷusa iḥkem di Ḥabrun u di Urcalim iḥkem třata u-třatin n iseggʷusa. ^■  

12 Suliman iqqim x řɛarc n babas Dawud u tageldit nnes tedweř tarenni di řemten aṭṭas. ^■  

13 Xenni Aduniya, mmis n Hajjit, yusa-dd ɣar Batcabaɛ, yemmas n Suliman, nettat tenna: “Ma twasit nnek s řehna?” Netta inna: “Řehna!”

14 Netta inna: “Necc ɣari kim ijj n wawař.” Nettat tenna as: “Siweř!”

15 Inna netta: “Cem tessned, aqa tageldit tusa ayi-dd u marra Israil igga dayi tiṭṭawin ḥima ad dewřeɣ d ajeǧid. Maca tageldit tenneqřeb uca tedweř i uma, minzi tuɣa tusa as-dd zi SIDI. ^■  

16 Řexxu maca necc xseɣ ad ɣarem ttareɣ ict n řḥajjet waha. War d ayi tagi!” Nettat tenna: as: “Siweř!”

17 Netta inna: “Siweř ak-d ujeǧid Suliman, maɣar netta war cem ittarri, ḥima netta ad ayi iwc Abicaj, Tasunamit, d tamɣart.”

18 Batcabaɛ tenna: “Mliḥ, necc ad ssiwřeɣ ak-d ujeǧid di ṭṭweɛ nnek.”

19 Xenni tusa-dd Batcabaɛ ɣar ujeǧid Suliman, ḥima akides tessiweř x Aduniya. Ajeǧid ikkar i umsagar akides u yuḍar zzates. Awarni man aya iqqim x řɛarc, ijja ad din ssarsen ijj n řkursi i yemmas n ujeǧid u nettat teqqim ɣar ufus afusi nnes. 20 Xenni tenna as nettat: “Necc xseɣ ad ac ttareɣ ict n řḥajjet waha. War d ayi tagi!” Inna as ujeǧid: “Seqsa, yemma, necc war cem ttarriɣ ca.” 21 Nettat tenna as: “Ttzawgeɣ cek ḥima ad temmewc Abicaj, Tasunamit, i umac Aduniya d tamɣart.” 22 Ajeǧid Suliman yarra-dd xas, inna i yemmas: “Mayemmi tᵉttared cem i Aduniya Abicaj, Tasunamit? Ttar xenni uřa d tageldit, maɣar netta d uma wenni d ameqqran xafi, wah ttar i-tt i netta u i ukehhan Abyatar d Yuwab, mmis n Ṣaruya.”

23 Ajeǧid Suliman ijjuǧ ɣar SIDI, inna: “SIDI ad ayi igg ta d ta u ɛad ktar zi man aya, maɣar Aduniya issiweř awař-a ḍidd i tudart nnes! 24 Xenni řexxu, s tidett am iddar SIDI, wenni d ayi issemtnen u wenni d ayi issɣiman x řɛarc n tgeldit n baba Dawud u wenni d ayi iggin ict n taddart am mammec tuɣa inna. S tidett, Aduniya ad ittwaneɣ ass-a!” ^■   25 Xas uca issekk ujeǧid Suliman řumur-a s ufus n Banaya, mmis n Yahuyadaɛ. Wanita iwta i-t uca immut Aduniya.

26 Inna ujeǧid i ukehhan Abyatar: “Uyur ɣar Ɛanatut, ɣar temmurt nnek, maɣar cek d ijj n weryaz issdaḥeǧ řmewt. Ass-a maca war cek neqqeɣ ca, minzi cek tarbud Ttabut n Sidi inu, SIDI, zzat i wudem n baba Dawud u minzi cek tweddbed uřa s marra i zi iweddeb baba.” ^■   27 Suliman yuẓẓeř x Abyatar ařami netta war tuɣi ɛad d akehhan i SIDI, ḥima ad ittwakemmeř wawař n SIDI i tuɣa issiweř zi jjihet n taddart n Ɛali di Cilu. ^■  

28 Umi yiweḍ řexbar ɣar Yuwab - aqa Yuwab iffeɣ, iḍfar Aduniya, waxxa netta war dd-iffiɣ ca ḥima ad iḍfar Abcalum - yarweř Yuwab ɣar Uqiḍun n SIDI uca iṭṭef accawen n uɛalṭar. ^■   29 Xebbaren ajeǧid Suliman aqa Yuwab yarweř ɣar Uqiḍun n SIDI. U xzar, ibedd din ɣar uɛalṭar. Suliman issekk ɣares Banaya, mmis n Yahuyadaɛ, inna: “Ruḥ din, neɣ i-t!” 30 Banaya yusa-dd ɣar Uqiḍun n SIDI uca inna as: “Ammu i iqqar ujeǧid: ‘Ffeɣ-dd ɣar barra!’ ” Netta inna: “Lla, necc xseɣ ad mmteɣ da!” Banaya issiweḍ tamwarrit ɣar ujeǧid, inna: “Ammu i issiweř Yuwab u ammu xafi dd-yarra.” 31 Inna as ujeǧid: “Egg min i d ac inna netta, ɣeḍř i-t uca neḍř i-t, ḥima ad taggʷejed x idammen i issizzeř Yuwab x baṭeř, xafi u x taddart n baba. 32 Ammu i ɣa yarr SIDI idammen issizzeř netta x uzeǧif nnes, minzi netta issḥeyyed tnayen n yeryazen, inni iseggden u iḥřa xas, uca inɣa i-ten s ssif umi baba Dawud war t issin: Abnir, mmis n Nir, akumandar n řɛeskar n Israil, u Ɛamasa, mmis n Yatir, akumandar n řɛeskar n Yahuda. 33 Ammu i ɣa ɛeqben idammen nsen x uzeǧif n Yuwab u x uzeǧif n tarwa nnes i řebda. Maca Dawud d tarwa nnes d taddart nnes d řɛarc nnes, ad ɣarsen yiři řehna zi SIDI i řebda.” 34 Banaya, mmis n Yahuyadaɛ, yuyur din, iwta i-t uca inɣa i-t. Netta ittwanḍeř di taddart nnes di řexřa. 35 Ajeǧid igga xenni Banaya, mmis n Yahuyadaɛ, deg wemcan nnes x řɛeskar uca ajeǧid igga Ṣaduq, akehhan, deg wemcan n Abyatar. ^■  

36 Xenni ijja ujeǧid ad řaɣan i Cimɛi, inna as: “Bna i yixef nnek ict n taddart di Urcalim uca zdeɣ din, war tteffeɣ ɣar da uřa ɣar diha! 37 Ad imsar deg wass i di i ɣa teffɣed, ad teẓwid tiɣzart n Qidrun, aqa ad tessned nican ad temmted nhřa mma. Idammen nnek ad iřin x uzeǧif nnek.” 38 Cimɛi yarra-dd x ujeǧid: “Awař-a d lemliḥ. Am mammec issiweř sidi inu, ajeǧid, ammu i ɣa igg uřa d umsexxar nnek.” U Cimɛi tuɣa izeddeɣ aṭṭas n wussan di Urcalim.

39 Maca awarni i třata n iseggʷusa, imsar, aqa tnayen n imsexxaren n Cimɛi arewřen ɣar Axic, mmis n Maɛka, ajeǧid n Jat. Xebbaren aya i Cimɛi, nnan: “Xzar, imsexxaren nnek aqa aten di Jat.” 40 Xenni ikkar Cimɛi, ibardeɛ i weɣyuř nnes uca yuyur ɣar Axic ɣar Jat, ḥima ad yarzu x imsexxaren nnes. Cimɛi yuyur din u yarra i-ten-dd zi Jat. 41 Xebbaren aya i Suliman aqa Cimɛi iffeɣ zi Urcalim ɣar Jat uca iɛqeb-dd ɛawed. 42 Ajeǧid issekk ad řaɣan i Cimɛi uca inna as: “Ma war cek jjiɣ ad tejjaǧed ɣar SIDI u ɛeřmeɣ ac, nniɣ: ‘Deg wass i di i ɣa teffɣed diha niɣ ɣar dinni, ad tessned nican, ad temmted nḥřa mma!’? U cek tennid ayi: ‘Awař-a i sřiɣ, aqa-t mliḥ.’ 43 Mayemmi xenni war teḥḍid ca tajaǧit n SIDI d řumur i d ac ggiɣ?” 44 Inna ujeǧid ɛawed i Cimɛi: “Cek tessned deg wuř nnek marra tuɛeffna i teggid i baba Dawud. S uyenni SIDI ad dd-yarr tuɛeffna nnek x uzeǧif nnek. ^■   45 Maca ad ittwabarek ujeǧid Suliman u řɛarc n Dawud ad ittwassemten i řebda zzat i wudem n SIDI.” 46 Xas uca idebbar ujeǧid x Banaya, mmis n Yahuyadaɛ, u wanita yuyur ɣar barra, iwta Cimɛi ařami immut wanita. Ammu i tᵉttwacedd tgeldit deg ufus n Suliman. ^■