1 Suliman idweř d aḍeggʷař n Firɛun, ajeǧid n Miṣra. Netta yiwi yeǧis n Firɛun uca issidif i-tt ɣar tendint n Dawud, ɣares ařami tuɣa isseqfeř řebni n taddart nnes d Taddart n SIDI d řḥiḍ i d as dd-innḍen i Urcalim. ^■   2 Mɣir řgens iqqim ittqeddam tiɣarṣa x řegɛudi waha, minzi ař ussan nni war tᵉttwabenni ɛad Taddart i Yisem n SIDI. ^■   3 Suliman tuɣa ittexs SIDI umi yuyur ɛlaḥsab tiweṣṣa n babas Dawud. Iqeddem mɣir tiɣarṣa d řebxur x řegɛudi waha.

4 Ammu i yuyur ujeǧid ict n twařa ɣar Jibɛun, ḥima ad dinni iɣarṣ, maɣar řgeɛɛdet nni tuɣa-tt d tameqqrant qaɛ. Issgeɛɛed Suliman x uɛalṭar nni ařef tiɣarṣa n wecmaḍ. ^■   5 Iban-dd SIDI di Jibɛun s ǧiřet i Suliman deg ict n terjit, uca inna AREBBI: “Ttar! Min tᵉttared, ad ac t wceɣ!” ^■  

6 Inna Suliman:

“Cek tessecned tamexsiwt icewwaren tameqqrant i umsexxar nnek, baba Dawud, am mammec yuyur netta zzat i wudem nnek s řaman d tsegda d řeṣfayet n wuř ɣarek u Cek txemmřed as tamexsiwt-a icewwaren tameqqrant u Cek tewcid as ijj n mmis ḥima ad iqqim x řɛarc nnes, am teǧa ass-a. ^□   7 Xenni řexxu, a SIDI, AREBBI inu, Cek teggid amsexxar nnek d ajeǧid deg wemcan n baba Dawud u necc ɛad d aḥenjir ameẓyan. Necc war ssineɣ mammec i ɣa ffɣeɣ u mammec i ɣa ɛeqbeɣ. ^■   8 Amsexxar nnek aqa-t di řwest n řgens nnek nni tixḍared cek, ijj n řgens imɣar ařami war izemmar ad ittwaqedd niɣ ad ittwaḥesseb zeg ubarru nnes ameqqran. ^■   9 Ewc xenni i umsexxar nnek ijj n wuř iften ḥima ad taf izemmar ad iḥkem di řgens u ḥima ad ifarz s řeɛqeř jar min iǧan icna d min iǧan d aɛeffan, minzi man wen izemmaren ad iḥkem x řgens-a wa ameqqran nnek?”

10 Awař-a tuɣa d lemliḥ di tiṭṭawin n Sidi, řami zeɛma Suliman ittar man aya. ^□  

11 Inna as AREBBI:

“Minzi cek tᵉttared aya u war tᵉttared ca tudart tazirart i yixef nnek, u war tᵉttared agřa i yixef nnek u war tᵉttared ca tudart n řɛedyan nnek, maca tᵉttared i yixef nnek řeɛqeř ḥima ad tzemmared ad tesřed ddeɛwat di řmeḥkama, ^■  

12 aqa s uya Necc ggiɣ ɛlaḥṣab awařen nnek. Xzar, Necc wciɣ ac ijj n wuř d amiɣis d afehham, am mammec war tuɣi qbeř i cek u war ittiři awarni ac. ^■  

13 Uřa d min war tᵉttared, ad ac t wceɣ, am wagřa am uɛuǧi, ařami marra ussan n tudart nnek war din ittiři weryaz am cek jar ijeǧiden. ^■  

14 Mařa cek tuyured x tebridin inu ařami i ɣa teḥḍid tiweṣṣa inu d řumurat inu, am mammec yuyur babac Dawud, xenni Necc ad sszuggareɣ ussan n tudart nnek.”

15 Ifaq-dd Suliman, u xzar, tuɣa-tt d ict n terjit. Netta yusa-dd ɣar Urcalim uca ibedd zzat i Ttabut n Řɛahd n SIDI u issgeɛɛed tiɣarṣa n wecmaḍ u igga tiwhibin n řehna u issewjed ɛawed ijj n macca i marra imsexxaren nnes.

16 Xenni usint-i-dd tnayen n temɣarin, tinni iǧan d timɣarin n farq-ccɣeř, ɣar ujeǧid, beddent zzat i wudem nnes.

17 Ict n temɣart tenna: “Mařa texsed, a sidi inu, necc zeddɣeɣ ak-d temɣart-a di taddart d ict u necc urweɣ umi i d ayi tuɣa ɣares di taddart.

18 Deg wass wiss třata awarni řami dd-urweɣ, imsar, aqa uřa d tamɣart-a turuw-dd ijj n uḥenjir. Neccin tuɣa nmun, war tuɣi ɣarneɣ uřa d ijj n ubarrani di taddart, mɣir neccin s tnayen di taddart.

19 Aḥenjir n temɣart-a immut di ǧiřet umi tezzeř xas deg iḍes. 20 Nettat tekkar ɣar wezyen n ǧiřet, tekkes ayi aḥenjir inu, umi tayya nnek tᵉṭṭeṣ, u tessars i-t deg weḥsin nnes uca mmis nnes immuten tessars i-t deg weḥsin inu. 21 Umi kkareɣ ɣar tuffut ḥima ad ssuṭṭuḍeɣ aḥenjir inu, xzar, netta immut. Di ṣṣbeḥ tuɣa ayi xezzareɣ mliḥ, ẓriɣ tuɣa-t war iǧi ca d aḥenjir inu wenni dd-urweɣ.” 22 Xas uca tenna temɣart nneɣnit: “Lla, wenni iddaren d aḥenjir inu u wenni immuten d aḥenjir nnem!” Tenneɣnit tenna: “Lla, wenni immuten d aḥenjir nnem u wenni iddaren d aḥenjir inu!” Ammu i ssiwřent zzat i wudem n ujeǧid.

23 Inna ujeǧid: “Tanita teqqar: ‘Wenni iddaren d aḥenjir inu u wenni immuten d aḥenjir nnem!’, uca wenneɣni teqqar: ‘Lla, wenni immuten d aḥenjir nnem u wenni iddaren d aḥenjir inu.’ ” 24 Xenni inna ujeǧid: “Awyem ayi-dd ijj n ssif!” Nitni iwyen ijj n ssif ɣar ujeǧid. ^□   25 Ajeǧid inna: “Qessem aḥenjir iddaren x tnayen uca wcem ijj n wezyen i yicten u wcem i yicten nneɣni ijj n wezyen nneɣni.” 26 Maca řami tuɣa tacit nnes i uḥenjir nnes imɣar, tessiweř temɣart tenni ɣar iǧa uḥenjir iddar, ak-d ujeǧid, tenna: “A, sidi inu, wcet as aḥenjir nni iddaren mařa texsed, war t neqqet!” Tanita maca tenna: “War ittiři inu uřa nnem. Qesset t di řwest!” 27 Xenni yarra-dd ujeǧid, inna: “Wcem as aḥenjir iddaren! War t neqqem. Nettat d yemmas.” 28 Marra Israil isřa x řeḥkam i zi iḥkem ujeǧid u nitni ggʷeden zzat i wudem n ujeǧid, minzi nitni ẓrin belli tiɣit n AREBBI dayes ḥima ad igg azref.