1 Tuɣa ajeǧid Suliman d ajeǧid x marra Israil.

2 Ina tuɣa d řḥukkam nnes imeqqranen:

Ɛazarya, mmis n Ṣaduq, tuɣa-t d amcawar d amezwaru.

3 Iliḥuraf d Axiya, iḥenjiren n Cica, tuɣa aten d imariren.

Yaḥucafaṭ, mmis n Axilud, tuɣa-t d amarir amezwaru. ^□  

4 Banaya, mmis n Yahuyadaɛ, tuɣa-t x řɛeskar.

Ṣaduq d Abyatar tuɣa aten d ikehhanen.

5 Ɛazarya, mmis n Natan, tuɣa-t x řwulat.

Zabud, mmis n Natan, tuɣa-t d awkiř d ameddukkeř n ujeǧid.

6 Axicar tuɣa-t x tzeddiɣt n ujeǧid.

Aduniram, mmis n Abda tuɣa-t x ljizya. ^■  

7 Suliman ɣares tenɛac n řwulat x marra Israil, inni ibedden x řeɛweč n ujeǧid d taddart nnes. Ad iksi kuř ijj ijj n uyur deg useggʷas. 8 Ina d ismawen nsen:

mmis n Ḥur x idurar n Ifrayim.

9 Mmis n Daqar di Maqas u di Caɛalubbim u Bayt-Cams d Ilun-Bayt-Ḥanan.

10 Mmis n Ḥasad di Arubut. Netta tuɣa ɣares Suku d marra tammurt n Ḥafir.

11 Mmis n Abinadab ɣares marra tiwririn n Dur. Tafat, yeǧis n Suliman, tuɣa-tt ɣares d tamɣart.

12 Baɛna, mmis n Axilud, ɣares Taɛnak, Majiddu d marra Bayt-Can i iǧan ɣar Ṣurtan, swadday n Yazraɛil, zi Bayt-Can ɣares ař Abal-Maḥula, ɣares ař uɣezdis nneɣni n Yuqmaɛam.

13 Mmis n Jabar tuɣa di Ramut-Jilɛad. Netta ɣares dcurat n Ya’ir, mmis n Manassa, tinni iǧan di Jilɛad. Tuɣa ɣares uřa d jjihet n Arjub, tenni di Bacan, settin n tineddam mɣarent s řḥiḍ u s zzekrun n nnḥas.

14 Axinadab, mmis n Ɛiddu, ɣares Maḥanayim.

15 Aximaɛaz tuɣa-t di Naftali. Netta yiwi uřa Basimat, yeǧis n Suliman, d tamɣart nnes.

16 Baɛna, mmis n Hucai, tuɣa-t di Acir u di Baɛalut.

17 Yahucafaṭ, mmis n Faruḥ, tuɣa-t di Issakar.

18 Cimɛi, mmis n Iyla, tuɣa-t di Binyamin.

19 Jabar, mmis n Uri, tuɣa-t di temmurt n Jilɛad, tammurt n Siḥun, ajeǧid n Imuriyyen, u n Ɛuj, ajeǧid n Bacan. Netta tuɣa d ayenni n lwali di temmurt nni.

20 Tuɣa řgens n Yahuda d Israil s waṭṭas am ijdi ɣar tma n řebḥar, ammu aṭṭas. Nitni ccin, swin u farḥen.