1 Suliman iḥkem x marra tigeldiwin zeg iɣzar n Lfuraṭ ɣares ař tammurt n Ifilisṭiniyyen u ař aymir n Miṣra. Nitni tuɣa ttawyen tarzefin u sexxaren i Suliman, marra ussan n tudart nnes. 2 Asuniy n Suliman i yijj n wass tuɣa-t třatin ikuruten n waren azdad u settin ikuruten n waren, 3 ɛecra n ifunasen iṣeḥḥen, ɛicrin n iyenduzen n heddu d mya n wuǧi, ahta i udaden, iɣayḍen n wezɣar, waccawen imeqqranen d iweẓẓiwen n řexřa. ^□   4 Maɣar netta iḥkem x marra tammurt x tma aya n iɣzar n Lfuraṭ, zi Tifsax ɣares ař Ɣazza, x marra ijeǧiden x tma aya n yeɣzar uca idweř as řehna ɣar marra jjwayeh i d as dd-innḍen. 5 Yahuda d Israil tuɣa zeddɣen di řaman, kuř ijj sadu tzayart nnes u sadu wartu nnes, zi Dan ɣares ař Bi’r-Sebɛa, marra ussan n Suliman. ^■  

6 Suliman tuɣa ɣares arebɛin-ařef n řkurit n yeysan i ikarruten nnes u tenɛac-ařef n imnayen. ^□  ■   7 Lwulat-a, kuř ijj deg uyur nnes, tthillan deg ujeǧid Suliman u di marra inni tuɣa dd-ittasen ɣar ṭṭabřa n ujeǧid Suliman. Nitni war jjin ad ixeṣṣ walu. 8 Imendi d uřum i iysan u i iysan n tazřa ttawyen ten ɣar wemcan mani ma iǧa, kuř ijj am mammec awekkeř nnes.

9 SIDI iwca i Suliman tiɣit d řeɛqeř s waṭṭas u ttasiɛ n wuř am ijdi ɣar tma n řebḥar.

10 Tiɣit n Suliman tuɣa d tameqqrant x tiɣit n marra tarwa n manis i dd-tneqqar tfuct u x marra tiɣit n Imiṣriyyen.

11 Netta tuɣa d amiɣis x marra iwdan, x Itan, Azraḥi, x Hayman, Kalkul d Dardaɛ, iḥenjiren n Maḥul. Isem nnes idweř ittwassnen ɣar marra řegnus i d as dd-innḍen.

12 Netta issiweř teřt-ařaf n wawařen iweznen. Ařef u-xemsa n izřan tuɣa aten zzayes.

13 Netta issiweř ɛawed x tcejjura, zi tcejjart n tengelt x idurar n Lubnan ař tɛelǧet i dd-iɣemmyen zi řḥiḍ. Netta issiweř ɛawed x řmař, x ijḍaḍ, x marra imuddaren inni ittbuɛen u x iseřman. ^□  

14 Zi marra řegnus usin-dd iwdan ḥima ad sřen tiɣit n Suliman, zi marra ijeǧiden n temmurt inni tuɣa isřan x tiɣit nnes.

15 Ḥiram, ajeǧid n Ṣur, issekk imsexxaren nnes ɣar Suliman, maɣar netta tuɣa isřa, aqa dehnen Suliman d ajeǧid deg wemcan n babas. Iwa Ḥiram tuɣa řebda issɛizz Dawud. ^■  

16 Suliman ijja ad inin i Ḥiram:

17 “Cek tessned aqa baba Dawud tuɣa war izemmar ad ibna ict n Taddart i Yisem n SIDI, AREBBI nnes, zi ssibbet n imenɣan i zi i d as dd-innḍen nitni, ɣares ařami ten igga SIDI sadu iḍaren nnes. ^□  ■  

18 Maca řexxu iwca ayi SIDI, AREBBI inu, řehna zi marra iɣezdisen. War din iǧi ɛad bu řeɛdu u war din ɛad asiggʷed n tuɛeffna.

19 Xzar, necc nwiɣ ad bniɣ ict n Taddart i Yisem n SIDI, AREBBI inu, am mammec issiweř SIDI i baba Dawud, inna: ‘Mmic, wenni i ɣa ssɣimeɣ x řɛarc nnek, ad ibna ict n Taddart i Yisem inu.’ ^■   20 Umur xenni řexxu, aqa ad ayi zedmen ticejjura n tengelt zeg idurar n Lubnan. Imsexxaren inu ad iřin ak-d imsexxaren nnek u necc ad ac wceɣ řmunet i imsexxaren nnek ɛlaḥsab marra min d ayi ɣa tinid, minzi cek tessned aqa neccin war ɣarneɣ uřa d ijj wenni izemmaren ad izdem akeccuḍ am ayt n Ṣidun.”

21 Umi isřa Ḥiram awařen n Suliman, imsar, aqa ifarḥ aṭṭas s waṭṭas, inna: “Ad ittwabarek SIDI ass-a, maɣar Netta iwca i Dawud ijj n mmis d amiɣis x řgens-a d ameqqran!” 22 Ḥiram issekk ijj n ureqqas ɣar Suliman, inna: “Necc sřiɣ i umi i tessekked ijj n ureqqas ɣari. Necc ad ssqefřeɣ marra meẓri nnek zi jjihet n ukeccuḍ n tcejjart n tengelt d ukeccuḍ n tcejjart n umerzi. ^□   23 Imsexxaren inu ad t-i-dd awyen zeg idurar n Lubnan ɣar řebḥar u necc ad t ssiwḍeɣ x tɣarruba n tḥenya x řebḥar ɣar wemcan i d ayi ɣa tinid. Dinni ad t ssarxuɣ u cek ad t teksid, u cek ad tessqefřed marra meẓri inu maḥend ad tewced macca i taddart inu.”

24 Uca Ḥiram iwca akeccuḍ n tcejjart n tengelt d ukeccuḍ n tcejjart n umerzi i Suliman, anect n meẓri nnes. 25 Iwca Suliman ɛicrin-ařef ikuruten n irden i Ḥiram i macca i taddart nnes u ɛicrin ikuruten n zzect n zzitun taḥurrect. D man aya i iwca Suliman aseggʷas x useggʷas i Ḥiram. 26 SIDI iwca i Suliman tiɣit am mammec tuɣa i d as inna netta. Tuɣa din řehna jar Ḥiram d Suliman uca nitni s tnayen idsen ggin ijj n řɛahd. ^■  

27 Ajeǧid Suliman issgeɛɛed-dd zi marra Israil iryazen i řxedmet. Asgeɛɛed-a yiwi-dd třatin-ařef n yeryazen i řxedmet. 28 Issekk i-ten ɣar idurar n Lubnan, ɛecra-ařaf deg uyur, s nnubet: ijj n uyur tuɣa aten x idurar n Lubnan u tnayen n iyuren tuɣa aten di taddart nsen. Aduniram tuɣa x iryazen i iggin řxedmet. 29 Tuɣa Suliman ɣares ɛawed sebɛin-ařef n yinni yarebbun ḍqeř d tmenyin-ařef n isuydayen x idurar. 30 Ahta ɛad i iweqqafen imezwura n Suliman nni iǧan x řxedmet, tuɣa din třata u-třatin-mya n yeryazen nni isseggʷuren řgens i iggin řxedmet. 31 Yumur ujeǧid ad iwyen tiṣuḍar timeqqranin, tiṣuḍar iɣřan, tiṣuḍar ittwassuydan, ḥima ad ssarsen dsas n Taddart. 32 Ibennayen n Suliman d ibennayen n Ḥiram uřa d Ijibayliyyen neqcen tent. Nitni sswejden akeccuḍ d yeẓra ḥima ad bnan Taddart.