<<    <     1 Ijeǧiden     6     >    >> 
Řebni n Zzawect Tameqqrant
6
1 Deg useggʷas wiss arebɛa-mya u-tmanyin awarni i uffuɣ n ayt Israil zi temmurt n Miṣra, deg useggʷas wiss arebɛa n tgelda n Suliman x Israil, deg uyur n Ziw, ayur wiss tnayen, imsar, aqa netta ibda ad ibna Taddart n SIDI. ■  
Zzawect i ibnan ujeǧid Suliman (1 Ij. 6)
2 Taddart i ibna ujeǧid Suliman i SIDI tuɣa-tt settin n iɣaǧen n tuzzeggart u ɛicrin n iɣaǧen n tiru u třatin n iɣaǧen n řuɛřa. 3 Asqif n wadaf, ɣar zzat n Wexxam n Zzawect Tameqqrant n Taddart, tuɣa-t ɛicrin n iɣaǧen n tezzuggart ɣar wudem n tiru n Taddart, u tiru nnes tuɣa-t ɛecra n iɣaǧen ɣar wudem n Taddart. ■   4 Netta igga i Taddart tiburjatin, bellɛen tent s ccebbac. 5 Ɣar řḥiḍ ɣar marra iɣezdisen nnes n Taddart ibna ijj n řebni n zziyada, ɣar řeḥyuḍ i d as dd-innḍen i Taddart, řeḥyuḍ n Wexxam n Zzawect Tameqqrant u n Wexxam n Daxeř n Zzawect. Igga řebniyyat n řeḍruf am wafriwen ɣar iɣezdisen n Taddart. 6 Tisefři n wadday tuɣa-tt di xemsa n iɣaǧen n tiru u tenni di řwest tuɣa-tt di sebɛa n iɣaǧen u tenni wiss třata tuɣa-tt di sebɛa n iɣaǧen, maɣar igga tinebdatin ɣar barra n Taddart ɣar iɣezdisen nnes, ḥima tisefřin war ttidfent ca di řeḥyuḍ n Taddart. 7 Umi tᵉttwabna Taddart, aqa tᵉttwabna s tṣuḍar ittwaqessen zi mani tent neqcen, ařami war ttwisřen ifḍisen, niɣ ccaqur niɣ ca zi řeqcuɛ n wuzzař di Taddart, řami tᵉttwabna. 8 Tawwart i řebni n řeḍruf ɣar umerwasu tuɣa-tt ɣar uɣezdis afusi ař zzat n Taddart. X ddrujat yennḍen ttgeɛɛaden ɣar wenni deg umerwasu u zeg umerwasu ɣar wenni wiss třata. 9 Ammu i ibna Taddart, ikemmeř i-tt. Issduři Taddart s tḥenya u s teřwiḥin n ukeccuḍ n tneglin.
10 Ibna ɛawed řebni n zziyada ɣar marra Taddart, xemsa n iɣaǧen n řuɛřa. Wanita yarsa s tḥenya n ukeccuḍ n tcejjart n tengelt x taddart.
11 Xenni yusa-dd wawař n SIDI ɣar Suliman, inna:
12 “X Taddart-a i tbennid, mařa cek tuyured ɛlaḥṣab tiweṣṣa inu u ad tegged lfarayiḍ inu u ad teḥḍid řumurat inu umi daysent tuyured, xenni Necc ad ac ssqefřeɣ awař i ssiwřeɣ ɣar babac Dawud. ■  
13 Necc ad zedɣeɣ di řwest n ayt n Israil u Necc war semmḥeɣ ca di řgens inu Israil.”
14 Suliman ibna Taddart u ikemmeř i-tt.
15 Netta ibna uřa d admawen n řeḥyuḍ n Taddart nni iǧan ɣar daxeř s tfeřwin n ukeccuḍ n tcejjart n tengelt. Zi tisi n Taddart ɣares ař řeḥyuḍ n tzeqqa iřeḥḥef i-ten netta s ukeccuḍ u iřeḥḥef i tisi n Taddart s ukeccuḍ n tcejjart n umerzi.□  
16 Tuɣa ibna ɛad ɛicrin n iɣaǧen zeg iɣezdisen n ḍeffar n Taddart s tfeřwin n ukeccuḍ n tcejjart n tengelt, zi tisi ɣares ař tazeqqa n řeḥyuḍ, uca igga daxeř nnes d Axxam n daxeř n Zzawect i Netta, Aqdas n Uqeddas.
17 Taddart tuɣa-tt arebɛin n iɣaǧen n tuzzeggart, ixs ad yini Axxam n Zzawect Tameqqrant nni ɣar zzat.
18 Tuɣa akeccuḍ n tcejjart n tengelt i iǧan ɣar daxeř n Taddart ittwaneqqec s temrisin d nnuwwarat yarezmen. Marra tuɣa akeccuḍ n tengelt, war dd-ittbin uřa d ijj weẓru.
19 Igga Axxam n Daxeř n Zzawect ɣar daxeř qaɛ n Taddart ḥima ad din issars Ttabut n Řɛahd n SIDI.
20 Axxam n Daxeř n Zzawect tuɣa-t ɛicrin n iɣaǧen n tuzzeggart ɣar uɣezdis n zzat u ɛicrin n iɣaǧen n tiru d ɛicrin n iɣaǧen n řuɛřa. Iřeḥḥef i-t s wureɣ izedgen. Iřeḥḥef ɛawed aɛalṭar s ukeccuḍ n tcejjart n tengelt. 21 Suliman iɣeǧef daxeř n Taddart s wureɣ izedgen. Ɣar zzat n Wexxam n Daxeř n Zzawect isseɛdu ssnaseř n wureɣ. Iɣeǧef aɛalṭar s wureɣ. 22 Ammu iɣeǧef netta marra Taddart s wureɣ, ařami tkemmeř marra Taddart. Iɣeǧef marra aɛalṭar nni iǧan ɣar Wexxam n Daxeř n Zzawect s wureɣ.
23 Deg Wexxam n Daxeř n Zzawect igga tnayen n ikiruben n ukeccuḍ n uzemmur. Tiddi nsen tuɣa-tt di ɛecra n iɣaǧen. □  ■   24 Ijj n wafriw n ukirub tuɣa dayes xemsa n iɣaǧen u deg wafriw nneɣni n ukirub tuɣa dayes ɛawed xemsa n iɣaǧen. Zeg ixef n yijj n wafriw nnes ɣares ař ixef n wafriw nnes nneɣni aqa ɛecra n iɣaǧen. 25 Akirub nneɣni tuɣa ɣares ɛawed řeɛbar n ɛecra n iɣaǧen. Ikiruben tuɣa ɣarsen s tnayen idsen ijj n řeɛbar d ijj n waddud. 26 Ijj n ukirub tuɣa řuɛřa nnes ɛecra n iɣaǧen u ammu uřa d řuɛřa n ukirub nneɣni. 27 Netta issbedd ikiruben di řwest n taddart n daxeř. Ifriwen n ikiruben tuɣa bezzɛen ařami afriw n ijj ittakkʷaḍ ijj n řḥiḍ u afriw n ukirub nneɣni ittakkwaḍ nneɣni. Ɣar řwest n taddart mmḥaḍan ifriwen nsen ayawya, afriw ɣar wefriw. ■   28 Netta iɣeǧef ikiruben s wureɣ.
29 Marra řeḥyuḍ n Taddart am tenneḍ inqec i-ten s uqessi n ineqqicen n ikiruben d tcejjura n tini d nnuwwar yarezmen, zeg wexxam n daxeř ař axxam i iǧan ɣar zzat. 30 Iɣeǧef tisi n Taddart s wureɣ am deg wexxam n ḍaxeř am deg wexxam n zzat. 31 Ɣar wadaf n Wexxam n Daxeř n Zzawect igga netta tiwwura n ukeccuḍ n uzemmur. Akwadrun s řeḍruf ɣar uɣezdis n tewwart ittawi ijj n řexmus n řḥiḍ. 32 Tnayen n tewwura tuɣa atent zeg ukeccuḍ n uzemmur. Netta inqec daysen ineqqicen n ikiruben d tcejjura n tini d nnuwwar yarezmen uca iɣeǧef i-ten s wureɣ. Ibezzeɛ ureɣ x ikiruben u x tcejjura n tini. 33 Igga ɛawed řeḍruf n ukeccuḍ n izemmuren ɣar uɣezdis n wadaf n Wexxam n Zzawect Tameqqrant, zeg ict n terbaɛt n řḥiḍ. 34 Tnayen n tewwura tuɣa atent zeg ukeccuḍ n tcejjart n umerzi. Tnayen n tɣemmura ɣar ṭṭarf n ict n tewwart tuɣa ttquwwarent di barra u tnayen n tɣemmura ttwaneqcent ɣar ṭṭarf n tenneɣnit tuɣa ttquwwarent di daxeř. 35 Netta inqec daysen ikiruben d tcejjura n tini d nnuwwar yarezmen uca icellel i-ten s wureɣ, s ijj n wudem n teqcurt iřeɣɣen x wenqac.
36 Netta ibna řemraḥ ɣar daxeř s třata n iseddiyyen n tṣuḍar ittwassuydan u s yijj n useddi n tḥenya n tcejjart n tengelt.
37 Deg useggʷas wiss arebɛa ittwassars dsas n Taddart n SIDI, deg uyur Ziw. 38 Deg useggʷas wiss ḥiṭac n uyur Bul, aqa-t d ayur wiss tmenya, tᵉttwakemmeř Taddart s marra tiseqqar nnes u ɛlaḥsab marra lfarayiḍ nnes. Netta ibna i-tt deg ijj n řmijař n sebɛa n iseggʷusa.