1 Di taddart nnes ibna Suliman třeṭṭac n iseggʷusa, uca ikemmeř marra taddart nnes. ^■   2 Netta ibna Taddart n Wezɣar n Lubnan. Tuɣa-tt di mya n iɣaǧen n tuzzeggart u xemsin n iɣaǧen n tiru u třatin n iɣaǧen n řuɛřa, tᵉttwagg x arebɛa n iseddiyyen n ipilaren n ukeccuḍ n tcejjart n tengelt u ttwasarsent tḥenya n ukeccuḍ n tcejjart n tengelt tiwa i ipilaren. ^□   3 Tuɣa s ict n tzeqqa zeg ukeccuḍ n tcejjart n tengelt tiwa i tḥenya n uɛarreḍ nni iǧan x xemsa u-rebɛin n ipilaren nni, aqa xemmesṭac n tḥenya x ijj n useddi n ipilaren. 4 Tuɣa tiburjatin di třata n iseddiyyen, ict n řekwaza ajemmaḍ i řekwaza nneɣni, třata n twařawin 5 Marra tiwwura d řeḍruf nsent tuɣa aten d akwadrun n tburjet uca ict n řekwaza tuɣa-tt ajemmaḍ n ict n řekwaza nneɣnit, třata n twařawin. 6 Asqif igga i-t s ipilaren ɣar zzat n taddart, xemsin n iɣaǧen n tuzzeggart u třatin n iɣaǧen n tiru. Ɣar zzat tuɣa-tt ict n tesqift nneɣni u ɛawed zzates nettat ipilaren d ijj n useqqef sennej xas. 7 Netta igga ɛawed ijj n wesqif i řɛarc mani tuɣa iḥakem, asqif n wadaf n řmeḥkamet, uca issduři i-tt zi tisi ař tisi nneɣni s ukeccuḍ n tcejjart n tengelt. 8 Taddart nnes, mani tuɣa izeddeɣ, di řemraḥ nneɣni, ɣar daxeř zeg wesqif n wadaf n lmeḥkama, aqa tᵉttwagg amecnaw taddart nneɣni. Netta igga ɛawed ict n taddart i yeǧis n Firɛun, tenni yiwi Suliman d tamɣart, amecnaw asqif-a wanita. ^■  

9 Man aya marra tuɣa-t zi tṣuḍar iɣřan, ttwasuydant ɛlaḥsab řeqyas, zi daxeř u zi barra ttwancaren s řmencar, u man aya zi dsas ař iẓra n sennej qaɛ u zi barra ař řemraḥ ameqqran.

10 Dsas ittwagg s tṣuḍar iɣřan, iẓra imeqqranen, iẓra n ɛecra n iɣaǧen d tmenya n iɣaǧen

11 u tiwa nsen tiṣuḍar iɣřan, ttwasuydant ɛlaḥsab řeqyas, uřa d akeccuḍ n tcejjart n tengelt.

12 Řemraḥ ameqqran i d as dd-innḍen tuɣa-t zi třata n iseddiyyen n tṣuḍar ittwassuydan d ijj n useddi n ukeccuḍ n tcejjart n tengelt, am i řemraḥ n daxeř i Taddart n SIDI am i wesqif n wadaf n taddart.

13 Ajeǧid Suliman issekk ɣar Ḥiram zi Ṣur ḥima ad dd-yas. ^■  

14 Wanita tuɣa d mmis n ict n tajjač zi teqbič n Naftali u babas tuɣa-t d ijj n weryaz zi Ṣur, ijj n wemziř n nnḥas. Netta tuɣa iccur s řefhamet d řeɛqeř d tussna ḥima ad issuffeɣ qaɛ řxedmet n nnḥas. Netta yusa-dd ɣar ujeǧid Suliman u marra min igga, igga i-t n nnḥas. ^■  

15 Netta igga tnayen n ipilaren n nnḥas. Řuɛřa n ijj n upilar tuɣa-tt tmenṭac n iɣaǧen uca s yijj n ufiřu n tenɛac n iɣaǧen izemmar ad inneḍ i upilar nneɣni. ^■  

16 Netta igga tnayen n ttajat n nnḥas ifesyen ḥima ad ten ssarsen x izeǧifen n ipilaren. Řuɛřa n ijj n ttaj tuɣa-t xemsa n iɣaǧen u řuɛřa n ttaj nneɣni tuɣa-t uřa d xemsa n iɣaǧen.

17 Uřa d tiracciwin ttwaggent s ict n řxedmet n umudi, am ifiřan ittwannḍen ttwaggen s ssnaseř izewwqen i ttajat i iǧan x izeǧifen n ipilaren. Sebɛa i yijj n ttaj u sebɛa i ttaj nneɣni.

18 Igga ipilaren uřa d tnayen n iseddiyyen s iremmamen i d as dd-innḍen tiwa i yict n tracca, ḥima ad zzaysen issduři ttijan i iǧan tiwa i iseddiyyen n iremmamen. Ammu i igga uřa i ttaj nneɣni.

19 Ttijan x uzeǧif n ipilaren nni iǧan ɣar n wadaf ttwaggen s tlillicin, am mammec deg wesqif, řuɛřa nsen tuɣa-t arebɛa n iɣaǧen. ^□   20 Ttijan i iǧan x tnayen n ipilaren usin-dd zi sennej ak-d uqurar nni tuɣa iǧan arendad n tracca. Uca mitayen n iremmamen quwwaren asen-dd zi tnayen n iseddiyyen. Ammu i igga uřa x ttaj nneɣni. 21 Xenni issbedd netta ipilaren ɣar wesqif n wadaf n Zzawect Tameqqrant. Issbedd apilar afusi, igga as Yaxin, uca issbedd uřa d apilar nneɣni, igga as Buɛaz. 22 X uzeǧif n ipilaren tuɣa din ict n řxedmet izewwqen s řkisan n tlillicin. Ammu tᵉttwakemmeř řxedmet n ipilaren.

23 Netta igga ict n tarimant ifesyen i waman. Tuɣa-t řeɛbar nnes zi ṭṭarf ař ṭṭarf nnes nneɣni ɛecra n iɣaǧen, d uqurar qaɛ, uca tiddi nnes tuɣa-t di xemsa n iɣaǧen u tzemmared ad as tennḍed s ict n ufiřu n řeɛbar n třatin n iɣaǧen. ^□  ■   24 Swadday i tma nnes tuɣa i d as dd-innḍen qaɛ nnuwwarat i war dd-ffiɣent ɛad marra, ɛecra di kuř ijj n uɣiř nnḍent i trimant. Tnayen n iseddiyyen n nnuwwarat i war dd-ffiɣent ɛad marra, tuɣa ttwafesyen akides. ^■   25 Tarimant tbedd x tenɛac n ifunasen. Třata zzaysen arrin udem nsen ɣar ccamal, třata zzaysen arrin s wudem nsen ɣar řɣarb, třata zzaysen arrin s wudem nsen ɣar ljanub u třata zzaysen arrin s wudem nsen ɣar ccarq. Tarimant tarsa xasen u marra zzɛenquqat nsen tuɣa dewřen xezzaren ɣar daxeř. 26 Tegdar trimant ijj n ufus u tma nnes tuɣa am řxedmet izewwqen n tma n ijj n ufenjař niɣ amecnaw tanewwact n ict n tlillect. Twawit nnes ařfayen ibatuten. ^□  

27 Netta igga ɛecra n tkarrutin s nnḥas. Tuɣa tuzzeggart n ict n tkarrut arebɛa n iɣaǧen u tiru nnes arebɛa n iɣaǧen u řuɛřa nnes třata n iɣaǧen. 28 Ammu i ttwaggent tkarrutin. Nitenti tuɣa ɣarsent tiřwiḥin ɛarrḍent u teřwiḥin ɛarrḍent tuɣa atent jar ccafud. 29 X teřwiḥin ɛarrḍent jar ccafud, tuɣa iwřafen n weyraden, ifunasen d ikiruben. Ɣar sennej x ccafud tuɣa din ijj n usennad. Sadu weyraden d ifunasen ttwaggent temrisin n tefray nni yuyřen ɣar wadday. 30 Ict n tkarrut tuɣa ɣares arebɛa n tjarrarin n nnḥas d izayřuten n nnḥas. Arebɛa n iḍaren tuɣa ɣarsen tiɣarḍin. U tiɣarḍin ifesyen nni tuɣa atent sadu i tbanyut n usird qibač i mkuř ict n temrist. 31 Aqemmum nnes tuɣa-t ɣar daxeř n ttaj n tkarrut, ijj n uɣiř ɣar sennej. Aqemmum nnes tuɣa-t d aqurar, yusa-dd ak-d isennaden, tiru nnes d ijj n uɣiř d wezyen. U x uqemmum tuɣa din tinqacin u tiřwiḥin nsent ɣar ṭṭrufa n uqemmum tuɣa atent s arebɛa n tɣemmura, war ǧint d tiqurarin. 32 Arebɛa n tjarrarin tuɣa atent sadu teřwiḥin ɛarrḍent u izayřuten n tjarrarin tuɣa atent ceddnent ɣar tkarrut. Řuɛřa n ict n tjarrat tuɣa-t ijj n uɣiř d wezyen. 33 Tijarrarin ttwaggent am ttwaggent tjarrarin n ijj n ukarru. Izayřuten nsent, yantat nsent, barrat nsent, arradyawat nsent d inuqqab nsent ttwafesyen marra. 34 Tuɣa din arebɛa n tɣarḍin ɣar arebɛa n tɣemmura n ict n tkarrut. Tiɣarḍin nnes ffɣent zi nnḥas n tkarrut. 35 Sennej i tkarrut tuɣa din ijj n ṭṭarf n wezyen n uɣiř ibedd iquwwar as-dd zi marra iɣezdisen nnes. Sennej i tkarrut tuɣa din ɛawed ifassen i tkarrut d teřwiḥin nnes. 36 X teřwiḥin ɣar ifassen nnes u x teřwiḥin nnes inqec ikiruben, iyraden d tcejjura n tini, x kuř ijj n wemcan ixřa, uřa d timrisin n tifray ɣar marra iɣezdisen. 37 Ammu i igga netta ɛecra n tkarrutin, marra s yijj n webrid n ufesyi, s yijj n řeqyas, s yijj n waddud.

38 Igga ɛawed ɛecra n tbanyutin n nnḥas. Ict n tbanyut iksi arebɛin ibatuten. Ict n tbanyut tuɣa-tt dayes arebɛa n iɣaǧen n tiru. X qaɛ ict zi ɛecra n tkarrutin nni tuɣa tekkar as-dd ict n tbanyut. ^□  ■   39 Igga xemsa n tkarrutin ɣar uɣezdis n zzat afusi n Taddart u xemsa ɣar uɣezdis n zzat azeřmaḍ n Taddart, maca tarimant i waman igga i-t ɣar uɣezdis n zzat afusi n Taddart, ɣar uɣezdis n ccarq ɣar ljanub nnes. 40 Igga Ḥiram tibanyutin, iɣenjayen d ṭṭawyat i urucci uca ikemmeř Ḥiram marra řxedmet nni igga i ujeǧid Suliman i Taddart n SIDI:

41 tnayen n ipilaren d tnayen n iquraren n ttijan inni iǧan x izeǧifen n tnayen n ipilaren nni, uřa d tnayen n traccawin i d asent-i-dd-innḍen i tnayen n iquraren n ttijan inni iǧan x izeǧifen n tnayen n ipilaren, 42 arebɛa-mya n iremmamen i tnayen n traccawin, ttwammsebḍan x tnayen n iseddiyyen n iremmamen i ict n tracca, ḥima ad dřen tnayen n iquraren n ttijan inni x wudem sennej n ipilaren, 43 d ɛecra n tkarrutin d ɛecra n tbanyutin nni iǧan x tkarrutin nni, 44 d ict n trimant d tenɛac n ifunasen sadu i trimant, 45 d teydurin d iɣenjajen d ṭṭawyat i urucci. Marra řeqcuɛ-a igga Ḥiram i ujeǧid Suliman i Taddart n SIDI, tuɣa aten zi nnḥas icellelen. 46 Ajeǧid ikebb i-ten deg udewwar n L'Urdun di třaxt igdaren jar Sukkut d Ṣartan. 47 Suliman issɛizz x wewzan n marra řeqcuɛ-a di ssibbet n řqedd nsen d ameqqran aṭṭas. War beqqcen di řewzen n nnḥas.

48 Suliman igga marra řeqcuɛ i Taddart n SIDI: aɛalṭar n wureɣ, tazewḍa n wureɣ min xef ittwassars weɣrum n wescan, ^■   49 d řeqnadeř, xemsa ɣar yeffus d xemsa ɣar uzeřmaḍ, zzat i Wexxam n daxeř n Zzawect, aqa aten n wureɣ izedgen ak-d nnuwarat d řefnarat d tjeqqaḍin n teftič nni ittwaggen marra s wureɣ. 50 Uřa d ṭṭawyat d tjeqqaḍin d ṭṭawyat i urucci d tɣenjayin d tmejmarin nni ittwaggen marra s wureɣ izedgen. Xenni igga ɛawed řemfaseř i tewwura n Taddart n daxeř, i Weqdas n Uqeddas, uřa i tewwura n Taddart, i Wexxam n Zzawect Tameqqrant, igga i-ten s wureɣ.

51 Ammu i tᵉttwakemmeř marra řxedmet i igga ujeǧid Suliman i Taddart n SIDI. Uca Suliman issidef tiwhibin iqeddsen n babas: nnuqart d wureɣ d řeqcuɛ, uca issars man aya marra deg ixxamen n txubay n Taddart n SIDI. ^□  ■