1 Xenni issmun Suliman imɣaren n Israil d marra izeǧifen n tqebbař, imeqqranen n ibabaten n ayt n Israil, ɣar ujeǧid Suliman di Urcalim ḥima ad ssgeɛɛden Ttabut n Řɛahd n SIDI zi tendint n Dawud, tenni d Ṣihyun. ^■   2 Marra iryazen n Israil munen-dd ɣar ujeǧid Suliman ɣar řɛid deg uyur n Itanim, aqa-t d ayur wiss sebɛa. 3 Marra imeqqranen n Israil usin-dd u ikehhanen ssgeɛɛden Ttabut. 4 Nitni ssgeɛɛden Ttabut n SIDI ak-d Uqiḍun n Umsagar uřa d marra řeqcuɛ iqeddsen i tuɣa iǧan deg Uqiḍun. Ssgeɛɛden tt ikehhanen d Ilawiyyen. 5 Ajeǧid Suliman d marra tamesmunt n Israil nni tuɣa ɣares dd-imunen, tuɣa aten akides zzat i Ttabut, wehhben uǧi d ifunasen d tfunasin, inni war izemmaren ad ttwaḥesben zi ssibbet n řqedd ameqqran nsen.

6 Ikehhanen iwyen Ttabut n Řɛahd n SIDI ɣar wemcan nnes, ɣar Wexxam n Daxeř n Zzawect n Taddart, deg Weqdas n Uqeddas, ař sadu wafriwen n ikiruben.^□   7 Maɣar ikiruben bezzɛen tnayen n wafriwen nsen tiwa n wemcan n Ttabut uca ikiruben dřin Ttabut d iɛumad nnes i tarebbut zi sennej. 8 Iɛumad nnes n tarebbut tuɣa ffɣen-dd ařami ttwaẓaren ixfawen n iɛumad nnes zeg Uqeddas zzat i wudem n Wexxam n daxeř n Zzawect, maca zi barra war zemmaren ad ten ẓaren u iɛumad qqimen dinni ɣares ař ass-a. 9 War iǧi uřa d ca di Ttabut mɣir tnayen n teřwiḥin i tuɣa dayes issars Musa ɣar Hurib, řami igga SIDI ijj n řɛahd ak-d ayt n Israil umi dd-ffɣen zi Miṣra. ^■  

10 Řami dd-ffɣen ikehhanen zeg Uqeddas ɣar barra, imsar, aqa ijj n useynu iccur Taddart n SIDI.

11 War zemmaren ikehhanen ad qqimen bedden ḥima ad sexxaren zi ssibbet n useynu, minzi aɛuǧi n SIDI tuɣa iccur Taddart n SIDI. ^■  

12 Xenni inna Suliman: “SIDI inna aqa Netta ad izdeɣ deg ijj n useynu ibbumbes. ^■  

13 S tidett necc bniɣ ict n Taddart, ict n Tzeddiɣt i Cek, ijj n wemcan imten i Cek ḥima ad din tzedɣed i řebda.”

14 Inneqřeb ujeǧid s uɣembub nnes uca ibarek marra agraw-a n řgens n Israil u marra agraw n Israil tuɣa ibedd.

15 Netta inna: “Ad ittwabarek SIDI, AREBBI n Israil, wenni issiwřen s uqemmum nnes i baba Dawud d wenni t ikemmřen s ufus nnes umi inna:

16 ‘Zeg wass i di nedheɣ řgens inu Israil zi Miṣra, war ixḍareɣ uřa d ict n tendint zi marra tiqebbař n Israil ḥima ad dinni bniɣ ict n Taddart ḥima ad din yiři Isem inu, maca necc ixḍareɣ Dawud ḥima ad yiři x řgens inu Israil. ^■  

17 Tuɣa deg wuř n baba Dawud ḥima ad ibna ict n Taddart i Yisem n SIDI, AREBBI n Israil. ^■  

18 Inna SIDI i baba Dawud: Umi teggid deg wuř nnek ḥima ad tebnid ict n Taddart i Yisem inu, di man aya i teggid mliḥ umi t tuɣa deg wuř nnek.

19 Maca war iǧi cek i ɣa ibnan Taddart nni, maca mmic i dd-iffɣen zi tejɛinna nnek u netta ad ibna Taddart i Yisem inu. 20 SIDI issemten awař nnes nni issiweř, maɣar necc dewřeɣ beddeɣ deg wemcan n baba Dawud u qqimeɣ x řɛarc n Israil, am mammec tuɣa issiweř SIDI, u necc bniɣ Taddart i Yisem n SIDI, AREBBI n Israil. 21 Necc ggiɣ din ijj n wemcan i Ttabut tenni i di iǧa Řɛahd n SIDI i igga Netta ak-d ibabaten nneɣ umi ten dd-indeh zi Miṣra.”

22 Suliman ibedd zzat i uɛalṭar n SIDI arendad n marra agraw n řgens n Israil, uca netta iksi ifassen nnes ɣar ujenna, ^■   23 inna:

“A SIDI, AREBBI n Israil, war iǧi uřa d ijj n AREBBI am Cek deg ujenna sennej u x temmurt swadday, wenni iḥḍan Řɛahd d tmexsiwt icewwaren i imsexxaren nnek nni igguren zzat i wudem nnek s marra uř nsen, 24 wenni iḥḍan di ṭṭweɛ n umsexxar nnek, baba Dawud, x min xef akides tessiwřed, minzi s uqemmum nnek i tessiwřed u s ufus nnek i dd-tarrid ad ittwakemmeř, am teǧa ass-a. 25 Xenni řexxu, SIDI, AREBBI n Israil, ḥḍat di ṭṭweɛ n umsexxar nnek, baba Dawud, x min kides tessiwřed umi tennid: ‘War ittwaqess zzayek uřa d ijj n weryaz zi zzat i wudem inu wenni iqqimen x řɛarc n Israil, min ɣa kken iḥenjiren nnek ad ḥḍan ad uyuren abrid nsen zzat i wudem inu am mammec tuyured cek zzat i wudem inu!’ ^■   26 Xenni řexxu, a AREBBI n Israil, egget ad dewřen d tidett awařen nni tessiwřed ak-d umsexxar nnek, baba Dawud.

27 Maɣar ma s tidett ad izdeɣ AREBBI x temmurt? Xzar ajenna, wah ajenna n ijenwan war izemmar ad Cek iksi, mecḥař s drus Taddart-a nni ssbeddeɣ necc! ^■   28 Meyyeř ɣar tẓaǧit n umsexxar nnek u ɣar uzaweg nnes, a SIDI, AREBBI inu, ḥima ad tesřed ɣar uřaɣi u ɣar tẓaǧit nni iẓẓuǧ umsexxar nnek ass-a zzat i wudem nnek. 29 Ejj tiṭṭawin nnek ad ttwarezment ǧiřet d wass tiwa i Taddart-a, tiwa i wemcan i x tennid: ‘Aqa Isem inu ad din yiři i useǧi ɣar tẓaǧit i iẓẓuǧ umsexxar nnek deg wemcan-a.’ ^■   30 Seř xenni i uzaweg n umsexxar nnek u n řgens nnek Israil, i uzaweg nni ttaren nitni deg wemcan-a u seř Cek xenni deg wemcan n Tzeddiɣt nnek, deg ujenna, wah seř uca ɣfar.

31 Mařa ixḍa ijj ak-d umqarreb nnes u tᵉttwagg xas ict n tjaǧit ḥima ad tt ijjuǧ u wanita yusa-dd uca ijjuǧ zzat i uɛalṭar nnek di Taddart-a, 32 seř Cek xenni deg ujenna u kkar u ḥkem x imsexxaren nnek, ḥima ad ittwaḥkem x uɛeffan ařami abrid nnes ad dd-ihwa x uzeǧif nnes u egg s tsegda i umsegged u ewc i-t ɛlaḥsab tasegda nnes. 33 Xmi ittwaɣřeb řgens nnek Israil zzat i wudem n řeɛdu minzi nitni xḍan akidek u nitni ad ɣarek dd-dewřen uca ad qadan Isem nnek u ad ẓaǧen ad ksin s řmeɛruf i Cek di Taddart-a, 34 seř Cek xenni deg ujenna u ɣfar ddnub n řgens nnek Israil u ndeh i-ten ad dd-dewřen ɣar temmurt nni tewcid i ibabaten nsen. 35 Xmi i ɣa tafed ajenna ibelleɛ, xmi war din ittiři wenẓar minzi nitni xḍan akidek u nitni ad ẓẓaǧen am nnqeřben ɣar wemcan-a u ad qadan Isem nnek u ad dd-dewřen x ddnub nsen umi Cek ten teḥṣared, 36 seř Cek xenni deg ujenna u ɣfar asen ddenb n imsexxaren nnek u n řgens nnek Israil, minzi Cek tesseřmaded i-ten abrid aṣebḥan nni ittxeṣṣa ad uyuren, u ewc Cek xenni anẓar x temmurt nni tewcid d řwart i řgens nnek.

37 Mařa din řaẓ di temmurt, niɣ ṭṭaɛun, niɣ ittwasecmeḍ imendi zeg usemmiḍ, niɣ jjriḥect n tcejjart niɣ tamuɣri tenni iṣarrḍen, niɣ mařa iḥṣar i-t řeɛdu ɣar tewwura nnes, niɣ teřqef i-t mammec ma tegga ca n jjriḥect niɣ ca n řeḥřac, 38 xenni man ma i ɣa iẓẓuǧ ijj n bnadem zi marra řgens nnek Israil u man ma i ɣa ittar, am nitni, kuř ijj zzaysen, ssnen jjriḥect n wuř nsen, u netta iksi xenni ifassen nnes ɣar Taddart-a, 39 seř Cek xenni deg ujenna, amcan imten n Tzeddiɣt nnek, u ɣfar u kkar u ewc kuř ijj ɛlaḥsab tibridin nnes, am mammec tessned Cek uř nnes, maɣar Cek waha i issnen uř n kuř bnadem, 40 ḥima nitni ad Cek ggʷeden marra ussan i ɣa kken ddaren x wudem n temmurt nni tewcid i ibabaten nneɣ, 41 uřa d abarrani nni war iǧan zi řgens nnek Israil, maca ad dd-yas di ṭṭweɛ n Yisem nnek zeg ict n temmurt iggʷejen, 42 maɣar nitni ad sřen x Yisem nnek ameqqran u x ufus nnek ijehden u x uɣiř nnek isswiẓẓaḍen! Mařa netta dd-yusa xenni u ad iẓẓaǧ di Taddart-a, 43 seř Cek xenni zeg ujenna, amcan imten n Tzeddiɣt nnek, u egg ɛlaḥsab marra min xef d ɣarek ɣa iřaɣa ubarrani, ḥima marra řegnus n ddunect ad ssnen Isem nnek, ḥima nitni ad Cek ggʷeden, am řgens nnek Israil, u ad ucin, aqa Isem nnek ittwabarreḥ tiwa i Taddart-a i bniɣ.

44 Mařa řgens iffeɣ ɣar umenɣi ak-d řeɛdu nnes deg webrid x min xef ten tessekked u nitni ad ẓẓaǧen i SIDI am nnqeřben ɣar tendint-a i tixḍared Cek u ɣar Taddart i bniɣ necc i Yisem nnek, 45 seř Cek xenni deg ujenna i tẓaǧit nsen u i uzaweg nsen uca taɣed asen tasɣart. 46 Mařa nitni xḍan akidek - maɣar war iǧi uřa d ijj bnadem i war ixḍan - u Cek tesɛared xasen, ad ten tsellmed zzat i wudem n řeɛdu uca nitni ad ten nedhen d imeḥbas ɣar temmurt n řeɛdu, ma teggʷej niɣ tudes i teǧa, ^■   47 u nitni ad tuben deg wuř nsen di temmurt mani ttwaḥebbsen u nitni ad tuben u ad xak dd-řaɣan di temmurt n yinni ten iḥebbsen, ad inin: Neccin nexḍa u negga min war iseggden, aqa negga tuɛeffna! 48 u nitni ad ɣarek-dd dewřen s marra uř nsen u s marra řeɛmar nsen di temmurt n řɛedyan nsen inni ten iḥebbsen uca ad ɣarek ẓẓaǧen am nnqeřben ɣar temmurt nni tewcid i ibabaten nsen, ɣar tendint-a i tixḍared Cek u ɣar Taddart-a i bniɣ necc i Yisem nnek, 49 seř cek xenni deg ujenna, amcan imten n Tzeddiɣt nnek, i tẓaǧit nsen u i uzaweg nsen uca taɣed asen tasɣart 50 u ɣfar i řgens nnek min zi xḍan akidek u ɣfar asen marra ixeṭṭan nsen i akidek ixḍan u ewc asen arreḥmet zzat i wudem n yinni i ten iḥebbsen ḥima nitni ad xasen areḥmen. 51 Nitni maɣar d řgens nnek d tasɣart nnek nni i dd-tessuffɣed zi Miṣra, zi řwest n uferran n wuzzař.

52 Ejj tiṭṭawin nnek ad ttwarzment i uḥeccem n umsexxar nnek u i uḥeccem n řgens nnek Israil, maḥend ad ɣarsen tesřed ak-d marra iřaɣan nsen ɣarek, 53 maɣar Cek tfarzed i-ten i Yixef nnek d řwart zi marra řegnus n temmurt, am mammec tessiwřed Cek s ufus n Musa, umsexxar nnek, umi tessuffɣed ibabaten nneɣ zi Miṣra, a Sidi inu, SIDI!” ^■  

54 Řami tuɣa Suliman ikemmeř marra tẓaǧit-a u marra aḥeccem-a ɣar SIDI, imsar, aqa netta ikkar zi zzat n uɛalṭar n SIDI, am t tuɣa x ifadden nnes s weɛrur iqwes am ttwaswiẓẓḍen ifassen nnes ɣar ujenna. 55 Netta tuɣa ibedd din uca ibarek marra agraw n řgens n Israil, inna s tmijja ijehden:

56 “Ad ittwabarek SIDI, wenni issareyyḥen řgens nnes Israil ɛlaḥsab marra min tuɣa iqqar! Zi marra awařen iṣebḥanen i zi dd-issiweř s ufus n umsexxar nnes Musa, war dd-iwḍi uřa d ijj. ^■   57 Ad yiři SIDI, AREBBI nneɣ, akidneɣ am tuɣa iǧa ak-d ibabaten nneɣ. Iři Netta war d aneɣ ittejji u war d aneɣ ineṭṭar 58 u iři ad indeh uřawen nneɣ ɣares maḥend neccin ad nuyur x tebridin nnes u ad neḥḍa řumurat nnes d tweṣṣa nnes d lfarayiḍ nnes nni yumur i ibabaten nneɣ, 59 u ejj awařen-a i ssiwřeɣ s uḥeccem zzat i wudem n SIDI, ass d ǧiřet, ad iřin udsen ɣar SIDI, AREBBI nneɣ, ḥima Netta ad yaɣ i umsexxar nnes d řgens nnes Israil tasɣart, kuř ass s min i ittřiqen i wass nni, 60 maḥend marra řegnus n temmurt ad ssnen aqa SIDI d AREBBI, war din nneɣni, ^■   61 u uř nwem ad yiři imun ak-SIDI, AREBBI nneɣ, ḥima ad tuyurem ɛlaḥsab tiweṣṣa nnes u ḥima ad teḥḍam řumurat nnes, am teǧa ass-a.”

62 Ajeǧid, u marra Israil akides, wehhben tiɣarṣa zzat i wudem n SIDI. 63 Suliman iwehheb tnayen u-ɛicrin-ařef n ifunasen d tfunasin d mya u-ɛicrin-ařef n wuǧi d taɣarṣt n řehna nni iqeddem i SIDI. Ammu i ideccen ujeǧid ak-d marra ayt n Israil Taddart n SIDI. ^■  

64 Deg wass d ijjen issqeddes ujeǧid řwest n řemraḥ n zzat wenni iǧan zzat i Taddart n SIDI, minzi issewjed din taɣarṣt n wecmaḍ d tewhibt n řɣiǧet uřa d tadunt n tɣarṣa n řehna, maɣar aɛalṭar n nnḥas wenni iǧan zzat i wudem n SIDI, tuɣa d ameẓyan ḥima ad iksi tiɣarṣa n wecmaḍ d tewhibt n řɣiǧet d tadunt n tɣarṣa n řehna. ^■  

65 Di řweqt nni igga Suliman řɛid ɛawed d marra Israil akides, zi mani i ɣa tiwḍed ɣar Ḥamat ař Taɣzart n Miṣra, ijj n wegraw n řgens ameqqran zzat i wudem n SIDI, AREBBI nneɣ, sebɛa n wussan uřa d sebɛa n wussan ktar, arbeɛṭac n wussan. 66 Deg wass wiss tmenya yarxu netta i řgens uca nitni barken ajeǧid. Awarni i uya uyuren ɣar iqiḍan nsen s wuř ifarḥ u s řxaḍar x marra řxar i tuɣa igga SIDI i umsexxar nnes Dawud u i řgens nnes Israil.