1 Awarni řami ikemmeř Suliman řebni n Taddart n SIDI u řebni n taddart n ujeǧid, wah marra min tuɣa immeẓri u tuɣa ixs ad t igg, ^■   2 iban-dd SIDI i Suliman i twařa wiss tnayen am i d as dd-iban di Jibɛun. ^■   3 Inna as SIDI: “Necc sřiɣ i tẓaǧit nnek u i uḥeccem nnek i zi tḥeccmed zzat i wudem inu. Taddart i tebnid, ssqeddseɣ tt ḥima ad ssmetneɣ din Isem inu i řebda uca tiṭṭawin inu d wuř inu ad din iřin marra ussan! ^■   4 Mařa cek tuyured zzat i wudem inu am mammec tuɣa iggur babac Dawud s wuř imun u s řeṣfayet u ad tegged am mammec marra i d ac umureɣ u ad teḥḍid tiweṣṣa inu d lfarayiḍ inu, 5 xenni ad ssmetneɣ řɛarc n tgelda nnek x Israil i řebda, am mammec ssiwřeɣ ɣar babac Dawud, nniɣ: ‘War ggur ad ittwaqess ca n weryaz zzayek zi řɛarc n Israil!’ ^■  

6 Maca mařa kenniw, cek d iḥenjiren nwem, ad tḥeyydem zi ḍeffar inu u kenniw war tḥeṭṭam ɛad řumurat inu d tweṣṣa inu, nni wciɣ zzat i wudem nwem, u kenniw ad tuyurem ad tsexxarem i irebbiten nneɣni, ad asen taḍarem, ^■   7 xenni ad qḍiɣ Israil zi temmurt nni d asen wciɣ uca Taddart-a i ssqeddseɣ i Yisem inu ad tt mmenḍareɣ zeg wudem inu u Israil ad idweř d ijj n umedya d ict n řqecɛet n ustehzi jar marra řegnus. ^■   8 U x Taddart-a tenni yuɛřan qaɛ, marra wi xas i ɣa ikken, ad itebhet ad iṣeffar. Nitni ad inin: ‘Mayemmi igga SIDI ammu di temmurt-a u di Taddart-a?’ ^■   9 Ad inin: ‘Minzi nitni semḥen di SIDI, AREBBI nsen, wenni dd-issuffɣen ibabaten nsen zi temmurt n Miṣra u minzi nitni cebbaren di irebbiten nneɣni u uyuren ad asen aḍaren u ad asen sexxaren, x uyenni issiweḍ SIDI marra řɣar-a xasen.’ ”

10 Awarni i ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar ^■  

11 - am iwca Ḥiram, ajeǧid n Ṣur, i Suliman ɛlaḥsab meẓri nnes akeccuḍ n tcejjart n tengelt d ukeccuḍ n tcejjart n umerzi d wureɣ - aqa Suliman iwca i Ḥiram ɛicrin n tneddam di temmurt n Ljalil. ^□  

12 Ḥiram iffeɣ-dd zi Ṣur ḥima ad ixzar tineddam nni d as iwca Suliman, maca tuɣa atent war cnant di tiṭṭawin nnes.

13 Netta inna: “Mana tineddam-a i d ayi tewcid, awma?” U netta iřaɣa asent: ‘Tammurt n Kabul’. Nitenti ttwařaɣant ammu ař ass-a .

14 Ḥiram tuɣa issekk i ujeǧid mya u-ɛicrin n talintat n wureɣ.

15 D wa d awař x ljizya i tuɣa issgeɛɛed ujeǧid Suliman maḥend ad ibna Taddart n SIDI d taddart nnes d lqelɛa d Majiddu d řḥiḍ n Urcalim d Ḥaṣur d Majiddu d Jazar.

16 Firɛun, ajeǧid n Miṣra, tuɣa igeɛɛed, iṭṭef Jazar, iqedd as timessi. Inɣa Ikenɛaniyyen i tuɣa izeddɣen di tendint uca iwca i-tt d tarzeft n tesřit i yeǧis, tamɣart n Suliman.

17 Suliman iɛawed ibna xenni Jazar d Bayt-Ḥurun n wadday

18 d Baɛla d Tadmar di řexřa, di temmurt nni, ^■  

19 marra tineddam n řexzen nni ɣares ɣar Suliman uřa d tineddam n ikarruten d tineddam n imnayen, u marra min tuɣa immeẓri Suliman ad t ibna di Urcalim u x idurar n Lubnan u di marra tammurt i x iḥkem.

20 Marra řgens i iqqimen n Imuriyyen, Iḥittiyyen, Ifiriziyyen, Iḥiwiyyen d Iyabusiyyen, inni war iǧin ca zeg ayt n Israil, 21 iḥenjiren nsen nni iqqimen awarni asen di temmurt, inni war izemmaren ad ten ḥarrmen i uteḥḥi ayt n Israil, igga xasen Suliman ljizya n tesmuɣi ař ass-a. 22 Zeg ayt n Israil maca war iggi Suliman uřa d ijj d ismeɣ, minzi nitni tuɣa aten d iɛeskariyyen d imsexxaren nnes d řḥukkam nnes d ineɣrafen nnes n řɛeskar d imeqqranen n ikarruten nnes d imnayen nnes. ^■   23 Ina d imeḥḍayen nni tuɣa ittwařeqqmen x řxedmet di ṭṭweɛ n Suliman, xemsa-mya u-xemsin n yeryazen nni tuɣa idebbaren x řgens nni tuɣa itteṭṭfen di řxedmet.

24 Maca yeǧis n Firɛun tgeɛɛed zi tendint n Dawud ɣar taddart i tuɣa i d as ibna. Řexdenni ibna lqelɛa. ^■  

25 Třata n twařawin deg useggʷas issgeɛɛed Suliman tiɣarṣa n wecmaḍ d tewhibin n řehna x uɛalṭar n SIDI i tuɣa ibna u umi tuɣa ikemmeř Taddart, issbexxar xas zzat i wudem n SIDI.

26 Ajeǧid Suliman ibna uřa d ijj n wagraw n iɣarruba di Ɛiṣyun-Jabar nni iǧan ɣar tma n Řebḥar n Telga, di temmurt Idum. 27 Ḥiram issekk imsexxaren nnes s wagraw n iɣarruba nni, ibeḥriyyen inni issnen řebḥar, jmiɛ ak-d imsexxaren n Suliman. 28 Nitni iwḍen ɣar Ufir u ksin ssenni arebɛa-mya u-ɛicrin n talintat n wureɣ u iwyen t ɣar ujeǧid Suliman.