1 Tajeǧidt n Saba tesřa x ccennɛet n Suliman tenni i dd-yusin ak-d Yisem n SIDI u nettat tusa-dd ḥima ad t tqeǧeb s tḥuja n twafit. 2 Nettat tusa-dd ɣar Urcalim s ijj n ukaravan i d as dd-iḍfaren s ddqeř n wagřa aṭṭas, s iřeɣman nni yarebbun řeɛṭur d waṭṭas n wureɣ d iẓra iɣřan u nettat tusa-dd ɣar Suliman u tessiweř akides x marra min ɣares deg wuř. ^■   3 Suliman icarḥ marra awařen i tḥaja nettat. War din uřa d ijj n wawař s řemɛani innuffaren min umi war izemmar ujeǧid ad as t icarreḥ.

4 Tajeǧidt n Saba teẓra marra tiɣit n Suliman d taddart i ibna 5 d macca x ṭṭabřa nnes d mammec qqimen imsexxaren nnes d mammec bedden ixeddamen nnes d warruḍ nsen d iwarraden nnes d ddruj izewwqen i x dd-igeɛɛed ɣar Taddart n SIDI uca war iqqim dayes ɛřaḥař buḥbeř ɛad. 6 Nettat tenna i ujeǧid: “Awař nni sřiɣ di temmurt inu x wawařen nnek u x tiɣit nnek, nican d tidett. 7 Necc war umineɣ ca s wawařen nni, ɣares ařami dd-usiɣ danita u xenni tiṭṭawin inu ẓrint aya. Xzar azyen zi kuř man aya war d ayi ittwanna. Tiɣit d tcuni ɛlaḥsab ccennɛet i x sřiɣ, aqa cek sennej nsent. 8 Sseɛd n yeryazen nnek, sseɛd n imsexxaren nnek, inni ibedden zzat i wudem nnek řebda, inni zemmaren ad sřen tiɣit nnek. 9 Ad ittwabarek SIDI, AREBBI nnek, wenni umi dd-tusid x řxaḍar ḥima ad cek yegg x řɛarc n Israil. Minzi SIDI ittexs Israil i řebda, s uya igga cek d ajeǧid, maḥend ad tegged řḥeqq d tsegda.”

10 Nettat tewca i ujeǧid mya u-ɛicrin n talintat n wureɣ d waṭṭas n řeɛṭur d yeẓra iɣřan. Ijj n ufeyyeḍ n řeɛṭur am wanita i iwcin tajeǧidt n Saba i ujeǧid Suliman, ɛemmarṣ ɛad war dd-yusi ca.

11 Agraw n iɣarruba n Ḥiram i-dd yiwyen ureɣ zeg Ufir, yiwyi-dd ɛawed aṭṭas n ukeccuḍ n tcejjart n ṣandal d yeẓra iɣřan zi Ufir.

12 Ajeǧid igga zeg ukeccuḍ n ṣandal wanita afrayen izewwqen i Taddart n SIDI u i taddart n ujeǧid uřa d řgambriyat d lharpat i imedyazen. Akeccuḍ n sandal am wanita ɛemmarṣ war dd-yusi niɣ ittwaẓar ɛad ař ass-a. ^■  

13 Ajeǧid Suliman iwca i tjeǧidt n Saba marra di min tuɣa temmeẓri, min ma tuɣa tᵉttar sennej i min d as iwca ɛad, ɛlaḥṣab tacrimt n ufus n ujeǧid Suliman. Xenni tenneqřeb uca tedweř ɣar temmurt nnes, nettat d imsexxaren nnes.

14 Řqedd n wureɣ i ittadfen ɣar Suliman deg ijj n useggʷas tuɣa setta-mya u-setta u-settin n talintat n wureɣ,

15 břa min iksi zeg itijariyyen u zi tsebbabt n isebbaben u zi marra ijeǧiden n Weɛraben u zi lwulat n temmurt.

16 Ajeǧid Suliman igga ɛawed mitayen n tseddariyin n uɛeskari timeqqranin s wureɣ ittwaddzen. X ict n tseddart ttwaggen setta-mya n iciqlen n wureɣ. ^■  

17 Yarni igga netta teřt-mya n tseddariyin n uɛeskari s wureɣ ittwaddzen. Ttwaggent třata n minayat n wureɣ deg ict n tseddart. Ajeǧid issars i-tent di taddart n Wezɣar n Lubnan. ^□  ■  

18 Ajeǧid Suliman igga ɛawed ijj n řɛarc ameqqran zi řɛaj uca iɣeǧef i-t s wureɣ ittwaṣeffan. ^□  ■  

19 Řɛarc wanita ɣares setta n tareffidin u azeǧif n řɛarc ɣar ḍeffar nnes tuɣa-t iquwwar u ɣar tnayen n iɣezdisen n řkursi tuɣa ǧan iɣaǧen u tnayen n wayraden tuɣa bedden zzat i iɣaǧen. 20 Tenɛac n wayraden bedden ɣar tnayen n iɣezdisen x setta n tareffidin. Am netta war ittwagg ɛad uřa deg ict n tgeldit.

21 Marra iɣarrafen n tissit n Suliman tuɣa aten n wureɣ u marra řeqcuɛ n Taddart n Wezɣar n Lubnan tuɣa aten s wureɣ izedgen, war din nnuqart dayes, maɣar deg wussan n Suliman tuɣa ḥessben tt d walu. ^□   22 Maɣar ajeǧid tuɣa ɣares ijj n wagraw n iɣarruba n Tarcic x řebḥar jmiɛ ak-d wegraw n iɣarruba n Ḥiram. Ict n twařa di třata n iseggʷusa yudef wegraw n iɣarruba n Tarcic, yiwi ureɣ d nnuqart, řɛaj d ibaɣusen d iṭawsen. 23 Ajeǧid Suliman iɛdu marra ijeǧiden n ddunect deg wagřa d tiɣit. ^■   24 Marra ddunect yarzu ad ẓaren udem n Suliman maḥend ad sřen tiɣit nnes i tuɣa issars AREBBI deg wuř nnes. 25 Nitni usin-dd aseggʷas awarni i umas, kuř ijj s tarzeft nnes, s řeqcuɛ n nnuqart, řeqcuɛ n wureɣ, arruḍ, řesnaḥ, řeɛṭur, iysan d isardan. 26 Suliman issmun ikarruten d imnayen. Netta tuɣa ɣares ařef u-arebɛa-mya n ikarruten d tenɛac-ařef n imnayen uca yiwyi ten ɣar tneddam n ikarruten u ɣar ujeǧid di Urcalim. ^■  

27 Ajeǧid igga nnuqart di Urcalim aṭṭas amecnaw iẓra, u ticejjura n tengelt igga i-tent amecnaw izemmuren nni iǧan aṭṭas di Temmurt Iwaṭan. ^■  

28 Iysan i Suliman ttwasuffɣen zi Miṣra, zi Qiwi. Isebbaben n ujeǧid iwyen ten s yijj n ttaman imetnen zi Qiwi. ^■   29 Ijj n ukarru igeɛɛed-dd u ittwassuffeɣ-dd zi Miṣra s ijj n ttaman n setta-mya n iciqlen n nnuqart u ijj n uyis s mya u-xemsin n uciql. Nitni ssuffɣen ten s ufus nsen ɛawed i marra ijeǧiden n Iḥittiyyen u i ijeǧiden n Aram. ^■