1 Ajeǧid Suliman tuɣa ittexs řa d yeǧis n Firɛun uřa d aṭṭas n temɣarin tibarraniyyin: timɣarin Timu’abiyyin, Tiɛammuniyyin, Tidumiyyin, Tiṣiduniyyin, Tiḥittiyyin, ^■   2 timɣarin zi řegnus i x tuɣa inna SIDI i ayt n Israil: “Kenniw war ɣarsen ttadfem uca uřa d nitni war ɣarwem ttadfen. S tidett ad ɣwan nitni uř nwem ḥima ad tuyurem awarni i irebbiten nsen!” Suliman iqqen ɣarsen s tayri. ^■   3 Netta tuɣa ɣares sebɛa-mya n temɣarin, tijeǧidin, u teřt-mya n tiyya. Timɣarin nnes ɣwant uř nnes. 4 Řami dd-tiweḍ tewsar ɣar Suliman ɣwant temɣarin nnes uř nnes, ařami yuyur awarni i irebbiten nneɣni. Uř nnes war iqqim imun i SIDI, AREBBI nnes, am wuř n babas Dawud. 5 Suliman yuyur awarni i Actarut, tarebbit n Iṣiduniyyen, u awarni i Milkum, nnɛi n l’aṣnam n ayt n Ɛammun. ^■   6 Suliman igga min iǧan d aɛeffan di tiṭṭawin n SIDI. Netta war t tuɣi icḍar aṭṭas i SIDI am babas Dawud. 7 Xenni ibna Suliman ict n řgeɛɛdet i Kamuc, nnɛi n arebbi n Imu’abiyyen, deg wedrar wenni iǧan zzat i Urcalim, u i Mulix, nnɛi n ṣṣanam n ayt n Ɛammun. ^■   8 Ammu i igga i marra timɣarin nnes tibarraniyyin tinni iwyen řebxur d tɣarṣa n wecmaḍ i irebbiten nsent.

9 S uyenni isɛar SIDI x Suliman, minzi uř nnes tuɣa iḥeyyed x SIDI, AREBBI n Israil, i tuɣa ɣares-dd iban tnayen n twařawin, ^■  

10 waxxa tuɣa ittwumur as nican maḥend war iggur awarni i irebbiten nneɣni u netta xenni war iḥḍa min d as yumur SIDI. ^■  

11 S uyenni inna SIDI i Suliman: “Minzi cek imsar ac ammu ařami war teḥḍid ca Řɛahd inu d tweṣṣa inu nni cek umureɣ, s tidett ad zzayek qeřɛeɣ tagelda aya uca ad tt wceɣ i umsexxar nnek. ^■  

12 Deg wussan nnek war t ggeɣ ɛad di ṭṭweɛ n babac Dawud, maca ad tt qeřɛeɣ zeg ufus n mmic.

13 Maca Necc war xak qeřɛeɣ tageldit marra. Ad wceɣ ict n teqbič i mmic di ṭṭweɛ n umsexxar inu Dawud u di ṭṭweɛ n Urcalim nni farzeɣ Necc.”

14 SIDI issekkar-dd i Suliman ijj n řeɛdu, Hadad, zi Idum. Netta zi tarwa n ujeǧid n Idum. ^□  

15 Umi tuɣa Dawud di Idum u Yuwab, ameqqran nnes n řɛeskar, igeɛɛed maḥend ad inḍeř inni ittwasnuqqben, imsar, aqa inɣa marra min iǧan d awtem di Idum. ^■  

16 Maɣar Yuwab iqqim dinni setta n iyuren ak-d marra Israil, ařami iteḥḥa marra min iǧan d awtem di Idum. ^□  

17 Hadad maca izemmar ad yarweř, netta d ca n yeryazen Idumiyyen zeg imsexxaren n babas akides, ařami dd-usin ɣar Miṣra. Tuɣa Hadad ɛad d ijj n uḥenjir d ameẓyan.

18 Nitni tuɣa kkaren zi Midyan uca iwḍen ɣar Faran. Dinni ksin nitni iryazen n Faran akidsen uca usin-dd ɣar Miṣra ɣar Firɛun, ajeǧid n Miṣra. Wanita iwca as ict n taddart u iwca as awař ad as iwc macca uřa iwca as ict n temmurt.

19 Hadad yufa arḍa ameqqran di tiṭṭawin n Firɛun, ařami wanita iwca as učmas n temɣart nnes d tamɣart, učmas n tjeǧidt Taḥfanis. 20 Učmas n Taḥfanis turuw as-dd mmis Janubat, wenni tessuṭṭuḍ Tafḥanis di taddart n Firɛun ařami xenni Janubat iyma di řwest n ayt n Firɛun.

21 Isřa Hadad di Miṣra belli Dawud tuɣa igga ad ittwassars deg wenḍeř jar ibabaten nnes uca Yuwab, akumandar n řɛeskar, immut. Xenni inna Hada i Firɛun: “Sekk ayi-dd, ad raḥeɣ ɣar temmurt inu!” 22 Maca Firɛun inna: “Min cek ixeṣṣen ɣari, řami dayek ẓriɣ cek texsed ad tɛeqbed ɣar temmurt nnek?” Netta inna: “Walu, maca waxxa amenni sekk ayi-dd din!”

23 AREBBI issekkar xas ɛawed ijj n řeɛdu nneɣni, Razun, mmis n Ilidaɛ, wenni tuɣa yarewřen zi sidi nnes Hadad-Ɛazar, ajeǧid n Ṣuba. ^■   24 Tuɣa issmun iryazen, idweř d řqebṭan n bandiyya nsen řami tuɣa ixs Dawud ad ten ineɣ. Maca nitni ruḥen ɣar Dimacq, zedɣen din u areyysen di Dimacq. ^■   25 Netta tuɣa-t d řeɛdu n Israil marra ussan n Suliman d man aya sennej i řɣar i igga Hadad. Netta iɛiff Israil u yareyyes am ujeǧid x Aram.

26 Yarubɛam, mmis n Nabaṭ, ijj n Ifrati zi Ṣarada, ijj n umsexxar n Suliman issgeɛɛed afus nnes x ujeǧid. Yemmas qqaren as Ṣaruɛa, tuɣa-tt d tajjač. ^□  ■   27 D man aya d ssibbet i zi tuɣa dd-issgeɛɛed afus nnes x ujeǧid. Tuɣa Suliman ibenna lqelɛa, iqqen tazzit di tendint n babas Dawud. ^□   28 Tuɣa Yarubɛam d ijj n bu-teɣruḍt imeḥḍen. Iẓra Suliman aqa aḥudri imḥeḍ di řxedmet uca netta igga as x marra řxedmet n tarebbut n taddart n Yusuf. 29 Di řweqt nni imsar aqa Yarubɛam iffeɣ zi Urcalim uca yufa i-t unabi Axiya deg webrid. Wanita tuɣa yarḍ ijj n warruḍ n jdid u nitni s tnayen idsen tuɣa aten weḥḥedsen deg iyyar. 30 Axiya iṭṭef arruḍ n jdid nnes wenni yarḍen u icarreg i-t di tenɛac n iziynat. 31 Inna i Yarubɛam: “Ksi ɛecra n iziynat i cek, maɣar ammu i iqqar SIDI, AREBBI n Israil: ‘Xẓar, Necc ad carrgeɣ tageldit zeg ufus n Suliman uca ad ac wceɣ ɛecra n tqebbař, ^■   32 maca ict n teqbič ad tiři i netta di ṭṭweɛ n umsexxar inu Dawud u di ṭṭweɛ n Urcalim, tandint tenni farzeɣ Necc zi marra tiqebbař n Israil. 33 Maɣar nitni semḥen dayi u uḍaren i Actarut, arebbi n Iṣiduniyyen, i Kamuc, arebbi n Imu’abiyyen, u i Malkam, arebbi n ayt n Ɛammun. War uyuren nitni di tebridin inu maḥend ad ggen min iǧan nican di tiṭṭawin inu u war ḥḍin tiweṣṣa inu d lfarayiḍ inu am t igga babas Dawud. 34 Maca war d as ttekkseɣ ca marra tageldit zeg ufus nnes, maca ad t ssmetneɣ d řḥakem marra ussan n tudart nnes di ṭṭweɛ n umsexxar inu Dawud, wenni farzeɣ d wenni iḥḍan řumurat inu d tweṣṣa inu, 35 maca ad kkseɣ tageldit zeg ufus n mmis u ad cek wceɣ ɛecra n tqebbař zzayes 36 u i mmis ad as wceɣ ict n teqbič, maḥend ad teqqim i umsexxar inu Dawud ict n tfawt zzat i wudem inu di Urcalim, tandint nni farzeɣ Necc i Yixef inu ḥima ad din ssmetneɣ Isem inu. ^■   37 Necc ad cek ksiɣ u cek ad tḥekmed x marra min immeẓri řeɛmar nnek u ad tiřid d ajeǧid x Israil. 38 Mařa cek tesřid ɣar marra min zi cek umureɣ, ad tuyured x tebridin inu u ad tegged min iǧan nican di tiṭṭawin inu am teḥḍid tiweṣṣa inu d řumurat inu am t igga umsexxar inu Dawud, xenni ad imsar aqa Necc ad iřiɣ akidek u ad ac bniɣ ict n taddart i ɣa teqqim am mammec tt bniɣ i Dawud u Necc ad ac wceɣ Israil 39 u Necc ad ssehwiɣ tarwa n Dawud i man aya, maca war iǧi i řebda.” ^□  

40 Suliman tuɣa yarezzu ad ineɣ Yarubɛam, maca Yarubɛam ikkar, yarweř ɣar Miṣra, ɣar Cixaq, ajeǧid n Miṣra. Netta iqqim di Misra ɣares ařami immut Suliman.

41 Min iqqimen n imezruyen n Suliman d marra min igga d tiɣit i ɣares, ma man aya marra war ittwazemmem ca deg wedlis n imezruyen n Suliman? ^■   42 Řweqt nni iḥkem Suliman x marra Israil di Urcalim, tuɣa arebɛin n iseggʷusa. ^■   43 Suliman ittwassars deg wenḍeř jar řejdud nnes. Netta ittwanḍeř di tendint n babas Dawud u mmis Raḥabɛam idweř d ajeǧid deg wemcan nnes.