1 Raḥabɛam yuyur ɣar Cakim, maɣar marra Israil tuɣa yusa-dd ɣar Cakim ḥima ad t ggen d ajeǧid. ^■   2 Umi isřa Yarubɛam, mmis n Nabaṭ, x man aya, umi tuɣa ɛad di Miṣra - aqa netta tuɣa yarweř zi zzat n wudem n ujeǧid Suliman u Yarubɛam tuɣa izdeɣ di Miṣra - imsar ^■   3 aqa ssekken-dd ɣares ireqqasen, jjin ad xas řaɣan. Yarubɛam d marra agraw n řgens n Israil usin-dd u ssiwřen ak-d Raḥabɛam, nnan: 4 “Babac igga xaneɣ ijj n uzayřu iqseḥ. Xenni řexxu, sarxu cek řxedmet iqesḥen n babac uřa d azayřu iḍeqřen i xaneɣ igga, xenni ad cek nexdem.” ^■   5 Netta inna asen: “Uyurem u ɛeqbem awarni i třata n wussan.” Uca yuyur řgens.

6 Imcawar ujeǧid Raḥabɛam ak-d imeqqranen, inni tuɣa ibedden zzat i wudem n babas Suliman umi tuɣa ɛad iddar, inna: “S min zi d ayi tweṣṣam ad dd-arreɣ x řgens-a?” 7 Nitni ssiwřen akides, nnan: “Mařa cek teggid ixef nnek ass-a d amsexxar i řgens-a, ad xasen tsexxared, ad xasen dd-tarred u ad kidsen tessiwřed s wawařen icnan, xenni ad dewřen nitni d imsexxaren nnek marra ussan.” 8 Maca netta inḍar ccwar i d as tuɣa wcin imeqqranen uca imcawar ak-d iḥudriyyen nni tuɣa akides imɣaren u bedden řexxu zzat i wudem nnes. 9 Netta isseqsa ten: “Man tcawarem ad t dd-narr x wawař n řgens, minzi ssiwřen akidi, nnan ayi: ‘Sarxu azayřu i xaneɣ igga babac.’ ”

10 Iḥudriyyen inni akides tuɣa imɣaren ssiwřen akides, nnan: “Ammu i ɣa tarred x řgens i kidek issiwřen innan: ‘Babac isseḍqeř azayřu nneɣ, maca řexxu cek sarxu t xaneɣ!’ u ammu i kidsen i ɣa tessiwřed: ‘Aḍaḍ ameẓyan inu ad yiři d ameqqran x tejɛinna n baba.

11 Xenni řexxu, aqa baba iqqen awem ijj n uzayřu iqesḥen, u xenni necc ad t ssḍeqřeɣ ɛad. Baba yarebba kenniw s urekkuḍ, necc ad kenniw arebbiɣ s iɣarḍmiwen.’ ”

12 Deg wass wiss třata usin-dd Yarubɛam d marra řgens ɣar Raḥabɛam, am mammec tuɣa issiweř ujeǧid, tuɣa inna: “Ɛeqbem-dd ɣari awarni i třata n wussan!”

13 Ajeǧid yarra-dd řgens s ict n temwarrit iqesḥen, maɣar netta inḍar ccwar i d as wcin imeqqranen.

14 Issiweř akidsen ɛlaḥsab ccwar n iḥudriyyen, inna: “Baba isseḍqeř azayřu nwem, maca necc ad ssḍeqřeɣ ɛad azayřu nwem. Baba yarebbi kenniw s urekkuḍ, necc ad kenniw arebbiɣ s iɣarḍmiwen.”

15 Ajeǧid war isři ca ɣar řgens, maɣar aneqřeb-a tuɣa i dd-yusa zi SIDI, ḥima ad issemten awař i tuɣa issiweř SIDI s ufus n Axiya, Aciluni, i Yarubɛam, mmis n Nabaṭ. ^■  

16 Umi marra Israil iẓra aqa ajeǧid war ɣarsen isři ca, yarra-dd řgens x ujeǧid, nnan: “Man tasɣart i ɣarneɣ di Dawud? Neccin war ɣarneɣ bu tesɣart ɣar mmis n Yassa. Ɣar iqiḍan nnek, a Israil! Řha řexxu ak-d taddart nnek, a ayt n Dawud!” Uca yuyur Israil ɣar iqiḍan nsen. ^■  

17 Maca x ayt n Israil inni tuɣa izeddɣen di tneddam n Yahuda, aqa Raḥabɛam tuɣa xasen d ajeǧid.

18 Ajeǧid Raḥabɛam issekk ɣarsen Aduram, wenni iǧan x ljizya, u marra Israil yarjem i-t s yeẓra ařami immut. Ajeǧid Raḥabɛam iqeǧeb maḥend ad yenya deɣya x ijj n ukarru ḥima ad yarweř ɣar Urcalim. ^■  

19 Ammu i iɣewweɣ Israil x taddart n Dawud, ař ass-a.^■   20 Umi marra Israil isřa aqa Yarubɛam iɛqeb-dd, imsar, aqa ssekken ɣares maḥend ad as dd-řaɣan ḥima ad dd-yas ɣar tmesmunt uca ggin t d ajeǧid x marra Israil. Uřa d ijj war iqqim iḍeffar ɛad taddart n Dawud mɣir taqbič n Yahuda.

21 Raḥabɛam yusa-dd ɣar Urcalim uca issmun marra taddart n Yahuda d teqbič n Binyamin, mya u-tmenyin-ařef n iryazen ittwafarzen, ttwadarrben i umenɣi, ḥima ad mmenɣen ak-d taddart n Israil, ḥima ad dd-arren tageldit ɣar Raḥubɛam, mmis n Suliman. ^■   22 Xenni yusa-dd wawař n AREBBI ɣar Cmaɛya, aryaz n AREBBI, inna: ^■   23 “Siweř ak-d Raḥabɛam, mmis n Suliman, ajeǧid n Yahuda, u ak-d marra taddart n Yahuda u tenni n Binyamin u i marra min iqqimen n řgens, ini: 24 ‘Ammu i iqqar SIDI: War ttgeɛɛdem u war ttmenɣam ak-d aytmatwem, ayt n Israil. Ittxeṣṣa ad iɛqeb kuř ijj n weryaz ɣar taddart nnes, maɣar d man aya i imsaren zzayi.’ ” Nitni sřin ɣar wawař n SIDI uca ɛeqben uca uyuren ɣar wemcan nsen ɛlaḥsab awař n SIDI.

25 Yarubɛam ibna Cakim x idurar n Ifrayim uca izdeɣ dinni. Ssenni iffeɣ uca ibna Fanuwil. ^■   26 Inna Yarubɛam deg wuř nnes: “Řexxu ad dd-teɛqeb tgeldit ɣar taddart n Dawud. 27 Maɣar mařa řgens-a ad dd-igeɛɛed ḥima ad yawi tiwhibin di Taddart n SIDI di Urcalim, xenni ad dd-idweř wuř n řgens-a ɣar siditsen, ɣar Raḥabɛam, ajeǧid n Yahuda. Ad ayi nɣen u ad dd-ɛeqben ɣar Raḥabɛam, ajeǧid n Yahuda.” 28 Imcawar ujeǧid, xenni igga tnayen n iyenduzen n wureɣ, inna asen i řgens: “D aṭṭas i kenniw maḥend ad tgeɛɛdem ɣar Urcalim. Xzar, irebbiten nnek, a Israil, inni cek i dd-issuffɣen zi Miṣra.” ^□  ■   29 Netta issbedd ijj n uyenduz di Bayt-Il u wenneɣni issbedd i-t di Dan. 30 Aya idweř d aɛraḍ ɣar ddnub. Řgens izwar yuyur zzat i wudem n ijj n uyenduz, ař Dan.

31 Netta issbedd ict n zzawect x řegɛudi. Igga ikehhanen i dd-iqqarsen zi marra ṭṭrufa n řgens inni war iǧin zeg ayt n Lawi. ^■  

32 Deg uyur wiss tmenya, deg wass wiss xemmesṭac n uyur, igga Yarubɛam ijj n řɛid, am řɛid i tteggen di Yahuda, u netta issgeɛɛed tiɣarṣa x uɛalṭar. Igga ammu di Bayt-Il ḥima ad iqeddem tiɣarṣa i iyenduzen i yegga. Igga ɛawed ikehhanen di Bit-Il x řegɛudi nni igga.

33 Deg wass wiss xemmesṭac deg uyur wiss tmenya n uyur i tuɣa ixarreṣ netta deg wuř nnes, issgeɛɛed tiɣarṣa x uɛalṭar nni igga di Bayt-Il. Ammu i issbedd ijj n řɛid i ayt n Israil uca issbexxar řebxur x uɛalṭar.