1 Xzar, s wawař n SIDI yusa-dd ijj n weryaz n AREBBI zi Yahuda ɣar Bayt-Il. Yarubɛam tuɣa ibedd zzat i uɛalṭar ḥima ad iwehheb řebxur. 2 Netta iřaɣa x uɛalṭar, s wawař n AREBBI, inna: “A aɛalṭar, aɛalṭar, ammu i iqqar SIDI, ad dd-ittwaxřeq ijj n mmis di taddart n Dawud, ad as qqaren Yuciya. Ad xak igg d taɣarṣt ikehhanen n řegɛudi inni xak iwehhben řebxur, u ad xak cemḍen ixsan n iwdan.” ^■   3 Deg wass nni iwca ict n řeɛřamet, inna: “Ta d řeɛřamet i x issiweř SIDI. Xzar, aɛalṭar ad icarreg u iɣɣeḍ i xas iǧan ad zzayes dd-iḥruǧeḍ.”

4 Umi isřa ujeǧid awař n weryaz n AREBBI wenni iřaɣan x uɛalṭar di Bayt-Il, imsar, aqa isswiẓẓeḍ Yarubɛam afus nnes x uɛalṭar, inna: “Ṭṭef i-t!” Maca afus nnes nni tuɣa ɣares isswiẓẓḍen, yuẓeɣ, ařami war izemmar ɛad ad t-i-dd-yarr ɣares. 5 Icarreg uɛalṭar uca iḥřuǧed zzayes yiɣɣed ɛlaḥsab řeɛřamet i iwca weryaz n AREBBI s wawař n SIDI. 6 Xenni yarra-dd ujeǧid, inna i weryaz n AREBBI: “Zawg zzat i wudem n SIDI, AREBBI nnek, uca ẓaǧ xafi ḥima afus inu ad ɣari dd-idweř!” Uca izawg weryaz n AREBBI i wudem n SIDI uca afus n ujeǧid idweř-dd ɣares uca idweř am mammec t tuɣa qbeř. ^■   7 Xas uca issiweř ujeǧid ak-d weryaz n AREBBI: “As-dd ɣar taddart inu uca areyyeḥ! Uřa d necc ad ac wceɣ ict n terzeft.” 8 Maca yarra-dd weryaz n AREBBI x ujeǧid: “Waxxa cek tewcid ayi azyen n taddart nnek, necc war akidek ggureɣ u war tticeɣ aɣrum deg wemcan-a uřa war da sesseɣ. ^■   9 Maɣar ammu i d ayi iweṣṣa s wawař n SIDI, inna: ‘Cek war dinni ttᵉtted u war dinni tsessed u war tɛiqqibed x webrid i x dd-tusid.’ ”

10 Uca netta iruḥ x ijj n webrid nneɣni u war dd-iɛqib ca x webrid i x dd-yusa ɣar Bayt-Il.

11 Di Bayt-Il tuɣa izeddeɣ ɛad ijj n unabi iwsar. Mmis nnes yusa-dd, iḥaja as min tuɣa igga weryaz n AREBBI deg wass nni di Bayt-Il, uřa d awařen i inna i ujeǧid. Nitni ḥajan as ten i babatsen.

12 Inna asen babatsen: “X man abrid i yuyur netta?” Iḥenjiren tuɣa ẓrin man abrid tuɣa iṭṭef weryaz n SIDI wenni tuɣa i dd-yusin zi Yahuda.

13 Netta inna i iḥenjiren nnes: “Bardɛem ayi i weɣyuř!” Nitni bardɛen as i weɣyuř uca netta inya xas iruḥ.

14 Netta yareddef aryaz n AREBBI uca yufa i-t am iqqim sadu ict n tcejjart n yigg. Netta inna as: “Ma cek d aryaz n AREBBI wenni dd-iffɣen zi Yahuda?” Netta inna: “D necc!”

15 Xenni inna as: “As-dd akidi ɣar taddart inu u ecc aɣrum.”

16 Maca netta inna: “Necc war zemmareɣ akidek ɛeqbeɣ u necc war akidek-dd ttaseɣ. Uřa d necc war ttᵉtteɣ, war sesseɣ deg wemcan-a.

17 Maɣar iffeɣ-dd wawař n SIDI ɣari: “Cek war tzemmared ad dinni tecced aɣrum u war tsessed aman. Cek war tzemmared ad dd-tɛeqbed x webrid i x dd-tusid.”

18 Netta inna as: “Uřa d necc d ijj n unabi am cek, u ijj n umalak issiweř akidi s wawař n SIDI, inna: ‘Awyi t ɣarek di taddart nnek, ḥima ad yecc aɣrum, ad isess aman.’ ” Ammu i issxarreq xas.^■  

19 Uca netta iɛqeb akides u icca aɣrum di taddart nnes, iswa aman.

20 Umi qqimen nitni ɣar ṭṭabřa, aqa yusa-dd wawař n SIDI ɣar unabi wenni tuɣa t-i-dd-yarrin, 21 u netta iřaɣa i weryaz n AREBBI i dd-yusin zi Yahuda, inna: “Ammu i iqqar SIDI: ‘Maɣar cek tɣewwɣed x wawař n SIDI u war teḥḍid řumur i d ac yumur SIDI, AREBBI nnek, 22 maca tɛeqbed u teccid aɣrum u teswid aman deg wemcan i x i d ac inna: ‘War tzemmared ad din tecced aɣrum u war din tssesed aman, x uya řxecbet nnek war dd-tusa deg wenḍeř n ibabaten nnek.’ ”

23 Awarni umi tuɣa icca d iswa, ibardeɛ as i weɣyuř i unabi i d igga ad dd-idweř. 24 Ammu dd-iffeɣ uca imsagar akides ijj n weyrad, inɣa i-t. Řxecbet nnes tuɣa temmenḍar din x webrid u aɣyuř ibedd zzates uca uřa d ayrad ibedd zzat i řxecbet. ^■   25 U xzar, ɛdun ca n yeryazen, ẓrin řxecbet temmenḍar x webrid uřa d ayrad ibedd zzat i řxecbet. Nitni iwḍen ɣar tendint n unabi iwsaren uca ssiwřen x man aya. 26 Umi anabi wenni i t-i-dd yarrin zeg webrid, isřa manaya, inna netta: “Wa d aryaz n AREBBI wenni tuɣa iɣewwɣen x wawař n SIDI. X uyenni iwca i-t SIDI i weyrad u wanita imezzeq i-t uca inɣa i-t ɛlaḥsab awař n SIDI wenni tuɣa kides issiwřen.” 27 Uca netta issiweř ak-d iḥenjiren nnes, inna: “Bardɛem ayi i weɣyuř!” Nitni bardɛen as 28 uca netta iffeɣ, yufa řxecbet temmenḍar x webrid uřa d aɣyuř d wayrad i ibedden zzat i řxecbet. Ayrad war yecci řxecbet u war imezzeq aɣyuř. 29 Xenni issgeɛɛed unabi řxecbet, issars i-tt x weɣyuř uca yiwyi tt akides. Ammu i dd-yusa unabi iwsaren di tendint ḥima ad xas iwwet agejdur u ad t inḍeř. 30 Netta inḍeř řxecbet deg wenḍeř nnes u nitni wtin xas agejdur: “Uh, uma inu!” 31 Awarni i umi tuɣa t inḍeř, imsar, aqa issiweř ak-d iḥenjiren nnes, inna: “Xmi i ɣa mmteɣ, neḍřem ayi deg wenḍeř i di immenḍar weryaz n AREBBI u ssarsem ixsan inu x uɣezdis n ixsan nnes! 32 Maɣar awař i ibarreḥ s wawař n SIDI x uɛalṭar-a nni iǧan di Bayt-Il u x marra tizawiyyin n řegɛudi nni iǧan di tneddam n Samarya, ad dd-iffeɣ nican.” ^■  

33 Awarni i wawař-a war dd-iddekkʷiř ca Yarubɛam zeg webrid aɛeffan nnes, maca yařeqqem ɛawed ikehhanen zi marra ṭṭrufa n řgens x řegɛudi. Wenni t ixsen, yařeqqem i-t u wanita idweř d ijj zeg ikehhanen n řegɛudi. ^■   34 Zi tmesřact-a tewḍa taddart n Yarubɛam di ddnub ařami dd-tqarreb ɣar uteḥḥi d wareddeǧ zi temmurt.