1 Di řweqt nni idweř Abiya, mmis n Yarubɛam, ihřec. 2 Inna Yarubɛam i temɣart nnes: “Kkar, beddeř arruḍ nnem, maḥend war iɛeqqeř uřa d ijj aqa cem d tamɣart n Yarubɛam, ad tuyured ɣar Cilu. Aqa dinni anabi Axiya wenni xafi innan aqa necc ad dewřeɣ d ajeǧid x řgens-a. ^■   3 Ksi akidem ɛecra n iɣrumen d tefḍiřin d ijj n uqdiḥ n tamment uca uyur ɣares! Netta ad am yini min ɣa imsaren ak-d uḥenjir.” 4 Uca ammu i tegga temɣart n Yarubɛam. Nettat tekkar, tuyur ɣar Cilu, tiweḍ ɣar taddart n Axiya. Axiya tuɣa war itwiři maɣar tiṭṭawin nnes tuɣa dewřent ṭṭemmsent di tewsaret nnes. 5 Maca SIDI inna i Axiya: “Xzar, ad dd-tas temɣart n Yarubɛam ḥima ad cek tesseqsa x mmis minzi wanita ihřec. Ta d ta i d as ɣa tinid. Xmi i dd ɣa tas, ad imsar, nettat ad tessniɛmiř ixef nnes d icten nneɣnit.”

6 Umi isřa Axiya řḥess n iṣuraf nnes ɣar tewwart, imsar, aqa netta inna: “Adef-dd ɣar daxeř, a tamɣart n Yarubɛam! Mayemmi tessniɛmiřed ixef nnem amecnaw cem d icten nneɣnit? Necc ttwasekkeɣ-dd ɣarem s ict n tebrat iqesḥen. 7 Uyur, ini i Yarubɛam: ‘Ammu i iqqar SIDI, AREBBI n Israil: Minzi Necc ssgeɛɛdeɣ cek zi jar řwest n řgens u ggiɣ cek d amgewwed x řgens inu Israil ^■   8 uca carrgeɣ tageldit zi taddart n Dawud uca wciɣ ac tt, maca cek war teǧid ca am umsexxar inu Dawud, wenni iḥḍan řumurat inu d wenni dd ayi iḍfaren ḥima ad yegg mɣir min iǧan nican di tiṭṭawin inu, 9 u teggid tt d taɛeffant mahu x min ggin marra inni iǧan qbeř i cek uca cek tuyured teggid irebbiten nneɣni d řexyařat nneɣni ifesyen ḥima ad ayi tesɛared, uca tenḍared ayi awarni i weɛrur nnek,

10 x uyenni, xzar, ad awyeɣ tuɛeffna x taddart n Yarubɛam u ad teḥḥiɣ zi Yarubɛam marra wi t itteggen x řḥiḍ, am wenni ittwaṭṭfen, am wenni umi ijjin di Israil, u Necc ad mḥiɣ min iqqimen n taddart n Yarubɛam, am mammec farḍen řeɣbar ɣares ař ɣa iqḍa. ^■  

11 Man wen zi taddart n Yarubɛam i ɣa immten di tendint, ad t ccen yiṭan u wi i ɣa immten deg iyyar, ad t ccen ijḍaḍ n ujenna, maɣar SIDI d wenni tt innan.

12 U cem, kkar, uyur ɣar taddart nnem! Mařa iḍaren nnem ad awyen ɣar tendint, ad immet uḥenjir.

13 Marra Israil ad xas wten agejdur u nitni ad t neḍřen, maɣar netta waha zi taddart n Yarubɛam ad iṭṭef anḍeř, maɣar di taddart n Yarubɛam ittwaf dayes waha min icnan i SIDI, AREBBI n Israil.

14 SIDI maca ad dd-issekkar i yixef nnes ijj n ujeǧid x Israil wenni i ɣa iteḥḥan taddart n Yarubɛam, ass aqa d wa. Min din? Wah, ɛad řexxu! ^■  

15 SIDI ad iwwet Israil, ad t issenhezz ssa d ssa am uɣanim deg waman, u netta ad iqřeɛ Israil zi temmurt-a iṣebḥen i iwca i ibabaten nsen u netta ad ten yareyyec aɣirin i yeɣzar n Lfuraṭ, minzi nitni ggin i yixef nsen tirebbin n cwarti u sɛaren zzaysent SIDI. ^■  

16 Netta ad isellem Israil di ssibbet n ddnub i igga Yarubɛam u i zi dd-yarra Israil ad ixḍa.”

17 Uca tekkar temɣart n Yarubɛam, tᵉṭṭef abrid uca tiweḍ ɣar Tirṣa. Umi dd-tusa ɣar tnebdat n taddart, immut uḥenjir.

18 Nitni neḍřen t u marra Israil iwta xas agejdur, ɛlaḥsab awař n SIDI i issiweř s ufus n umsexxar nnes, anabi Axiya.

19 Imezruyen iqqimen n Yarubɛam, mammec imneɣ d mammec iḥkem, xzar, aqa ttwazemmemen deg wedlis n imezruyen n ijeǧiden n Israil. 20 Ussan i iḥkem Yarubɛam tuɣa tnayen u-ɛicrin n iseggʷusa. Netta ittwassars deg wenḍeř jar řejdud nnes u mmis Nadab idweř d ajeǧid deg wemcan nnes.

21 Raḥabɛam, mmis n Suliman, tuɣa d ajeǧid di Yahuda. Tuɣa ɣares waḥit u-rebɛin n iseggʷusa umi idweř netta d ajeǧid. Netta iḥkem sbeɛṭac n iseggʷusa di Urcalim, di tendint i ixḍar SIDI zi jar marra tiqebbař n Israil ḥima ad din issemten isem nnes. Yemmas qqaren as Niɛma, nettat zi temmurt n Ɛammun. ^■   22 Yahuda igga min iǧan d aɛeffan di tiṭṭawin n SIDI u nitni sɛaren t mahu x marra min tuɣa ggin ibabaten nsen s ddnub nsen i zi xḍan.

23 Maɣar uřa d nitni bnan řegɛudi i yixef nsen d imayḍuten iqeddsen d tirebbin n cwarti, di marra tiwririn yuɛřan u sadu kuř tacejjart tazizit. ^□   24 Tuɣa din uřa d imetleyyen di temmurt. Nitni ggin marra jjɛayef n řegnus i tuɣa issuffeɣ SIDI zi řwart zzat i wudem n ayt n Israil.

25 Deg useggʷas wiss xemsa n ujeǧid Raḥabɛam, imsar, aqa igeɛɛed Cicak, ajeǧid n Miṣra, ḍidd i Urcalim. ^■   26 Netta ikkes řeknuz zi Taddart n SIDI u řeknuz zi taddart n ujeǧid, iwa, netta yiwi marra. Yiwi uřa d marra tiseddariyin n uɛeskari n wureɣ nni igga Suliman. ^■   27 Deg wemcan nsent igga ujeǧid Raḥabɛam tiseddariyin n uɛeskari i ttwaggent zi nnḥas. Igga i-tent deg ifassen n imeqqranen x ireqqasen n tazřa nni tuɣa ttɛessan ɣar wadaf n taddart n ujeǧid. 28 Meřmi ma i ɣa yadef ujeǧid ɣar Taddart n SIDI, imsar, aqa ireqqasen n tazřa arebbun tent u iwyen tent xenni ɛawed ɣar wexxam n ireqqasen n tazřa. 29 Imezruyen iqqimen n Raḥabɛam d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 30 Tuɣa iǧa umenɣi jar Raḥabɛam d Yarubɛam marra ussan nsen. 31 Raḥabɛam ittwassars deg wenḍeř jar řejdud nnes. Netta ittwanḍeř jar řejdud nnes di tendint n Dawud. Yemmas qqaren as Niɛma, ict n temɣart Taɛammunit. Mmis Abiyam idweř d ajeǧid deg wemcan nnes.