1 Deg useggʷas wiss tmenṭac n ujeǧid Yarubɛam, mmis n Nabaṭ, idweř Abiyam d ajeǧid x Yahuda. ^■   2 Netta iḥkem třata n iseggʷusa di Urcalim. Yemmas qqaren as Maɛka, yeǧis n Abicalum. ^■   3 Netta yuyur di marra ddnub n babas nni tuɣa igga qbeř nnes uca uř nnes war tuɣi ca icḍar ɣar SIDI, AREBBI nnes, am wuř n babas Dawud. 4 Maca di ṭṭweɛ n Dawud iwca as SIDI, AREBBI nnes, ijj n řefnar di Urcalim, umi igga ad issekkar mmis awarni as u umi igga ad teqqim tbedd Urcalim, ^■   5 maɣar Dawud tuɣa igga min iǧan nican di tiṭṭawin n SIDI u netta tuɣa war iḥeyyed di marra tudart nnes x marra min i d as yumur Netta, mɣir di tmesřact n Uriya, Aḥitti. ^■   6 Tuɣa din amenɣi jar Raḥabɛam d Yarubɛam, marra ussan n tudart nnes.

7 Imezruyen iqqimen n Abiyam d marra min igga, ma nitni war ttwazemmemen ca deg wedlis n imezruyen n ijeǧiden n Yahuda? Tuɣa din ɛawed amenɣi jar Abiyam d Yarubɛam. 8 Abiyam ittwassars deg wenḍeř n babas. Neḍřen t di tendint n Dawud. Mmis Asa idweř d ajeǧid deg wemcan nnes.^■  

9 Deg useggʷas wiss ɛicrin n Yarubɛam, ajeǧid n Israil, idweř Asa d ajeǧid x Yahuda.

10 Netta iḥkem waḥit u-rebɛin n iseggʷusa di Urcalim. Ḥennas qqaren as Maɛka, yeǧis n Abicalum.

11 Asa igga min iǧan nican di tiṭṭawin n SIDI, am babas Dawud.

12 Netta issuffeɣ imetleyyen zi temmurt uca iḥeyyed marra imeyḍa n n l’aṣnam nsen i tuɣa ggin ibabaten nnes. ^■  

13 Netta issḥeyyed uřa d ḥennas Maɛka zi jjehd nnes, maɣar nettat tuɣa tegga ijj n řexyař d jjɛifect i trebbit n cwarti. Asa iqess uřa d jjɛifect nnes uca isscemḍ i-tt ɣar teɣzart n Qidrun. ^■  

14 Waxxa war ttwaḥeyydent řegɛudi, maca uř n Asa tuɣa icḍar nican i SIDI, marra ussan n tudart nnes.

15 Netta yiwi tiwhibin iqeddsen n babas uřa d tiwhibin nni issqeddes netta s yixef nnes di Taddart n SIDI: nnuqart d wureɣ d řeqcuɛ nneɣni. ^■  

16 Tuɣa din amenɣi jar Asa d Baɛca, ajeǧid n Israil, marra ussan nsen.

17 Baɛca, ajeǧid n Israil, igeɛɛed ɣar umenɣi ḍidd i Yahuda uca ibna Rama ḥima war ittejji uřa d ijj ad yuyur ɣar Asa ḥima ad ɣares dd-yas. ^■  

18 Xenni iksi Asa marra nnuqart d wureɣ i tuɣa iqqimen deg ixxamen n txubay n Taddart n SIDI uřa d txubay n taddart n ujeǧid uca isellem marra aya i imsexxaren nnes. Uca ajeǧid Asa issekk i-ten ɣar Binhadad, mmis n Tabrimun, mmis n Ḥazyun, ajeǧid n Aram, wenni tuɣa izeddɣen di Dimacq, ḥima ad yini: ^■  

19 “Aqa din ijj n řɛahd jar ayi d cek, jar baba d babac. Xzar necc ad ac dd-ssekkeɣ ict n terzeft n nnuqart d wureɣ. Ruḥ, fsi řɛahd nnek ak-d Baɛca, ajeǧid n Israil, maḥend ad ikkar ad xafi iggʷej.” 20 Binhadad isřa ɣar ujeǧid Asa uca issekk imeqqranen n řɛeskar nnes ɣar tneddam n Israil, u netta iɣřeb x Ɛiyun d Dan d Abal-Bayt-Maɛka d marra Kinnarut, aqa issekk i-ten ɣar marra tammurt n Naftali. 21 Umi Baɛca isřa x uya, imsar, aqa netta issbedd di řebni n Rama uca iqqim izeddeɣ di Tirṣa. 22 Ajeǧid Asa ijja ad ittwabarreḥ di marra Yahuda, war ittɣimi ḥed, ḥima nitni ad kksen iẓra zi Rama d ukeccuḍ nnes i zi tuɣa ibenna Baɛca. U s man aya ibna ujeǧid Asa tandint n Jibɛa di Binyamin d Miṣfa.

23 Imezruyen iqqimen n Asa, marra timegga nnes imeḥḍen d marra min igga uřa d tineddam nni ibna, ma nitni war ttwazemmemen ca deg wedlis n imezruyen n ijeǧiden n Yahuda? Maca umi iwsar, ihřec netta zeg iḍaren nnes s tnayen. 24 Asa ittwassars deg wenḍeř jar řejdud nnes. Netta ittwanḍeř jar řejdud nnes di tendint n babas Dawud. Mmis Yahucafaṭ idweř d ajeǧid deg wemcan nnes. ^■  

25 Nadab, mmis n Yarubɛam, idweř d ajeǧid x Israil deg useggʷas wiss tnayen n Asa, ajeǧid n Yahuda. Netta iḥkem tnayen n iseggʷusa x Israil. 26 Netta igga min iǧan d aɛeffan di tiṭṭawin n SIDI uca yuyur deg webrid n babas u di ddnub nnes i zi yarra Israil ad ixḍa.

27 Baɛca, mmis n Abiya, zi taddart n Issakar, igga xas ict n tmeɛmuč u Baɛca iɣřeb xas di Jibbatun nni iǧan n Ifilisṭiniyyen, umi Nadab d marra Israil tuɣa innḍen i Jibbatun. 28 Inɣa i-t Baɛca deg useggʷas wiss třata n Asa, ajeǧid n Yahuda, u netta idweř d ajeǧid deg wemcan nnes. 29 Umi idweř netta d ajeǧid, imsar, aqa iqḍa x marra taddart n Yarubɛam. Uřa d ca n Yarubɛam nni yarrin nnefs war t ijji ad iqqim iddar ařami t iteḥḥa ɛlaḥsab awař n SIDI nni tuɣa issiweř s ufus n umsexxar nnes Axiya, Aciluni, ^■   30 di ssibbet n ddnub n Yarubɛam i zi ixḍa netta u i zi yarra Israil ad ixḍa s wesɛar nnes i zi isɛar SIDI, AREBBI n Israil.

31 Imezruyen iqqimen n Nadab, d marra min igga, ma man aya war ittwazemmem ca deg wedlis n imezruyen n ijeǧiden n Israil? 32 Tuɣa din amenɣi jar Asa d Baɛca, ajeǧid n Israil, marra ussan nsen.

33 Deg useggʷas wiss třata n ujeǧid Asa, ajeǧid n Yahuda, idweř Baɛca, mmis n Axiya, d ajeǧid x marra Israil di Tirṣa, u netta iḥkem arebɛa u-ɛicrin n iseggʷusa. 34 Netta igga min iǧan d aɛeffan di tiṭṭawin n SIDI u yuyur deg webrid n Yarubɛam u di ddnub nnes i zi yarra Israil ad ixḍa.