1 Yusa-dd wawař n SIDI ɣar Yahu, mmis n Ḥanani, x Baɛca, inna:

2 “Minzi Necc ssgeɛɛdeɣ-dd cek zi tɛejjajt u ggiɣ cek d amgewwed x řgens inu Israil uca cek tuyured x webrid n Yarubɛam u tarrid řgens inu Israil ad ixḍa umi i d ayi tesɛared s ddnub nsen, ^■   3 xzar, s uya ad mḥiɣ min iqqimen n Baɛca d min iqqimen n taddart nnes u Necc ad ggeɣ taddart nnek am taddart n Yarubɛam, mmis n Nabaṭ. ^■   4 Man wen zi taddart n Baɛca i ɣa immten di tendint, ad t ccen yiṭan u man wen zzayes i ɣa immten deg iyyar, ad t ccen yijḍaḍ n ujenna.” ^■  

5 Imezruyen iqqimen n Baɛca, d marra min igga, ma man aya war ittwazemmem ca deg wedlis n imezruyen n ijeǧiden n Israil? 6 Baɛca ittwassars deg wenḍeř jar řejdud nnes u netta ittwanḍeř di Tirṣa. Mmis Iyla idweř d ajeǧid deg wemcan nnes. 7 Ammu dd-yusa wawař n SIDI s ufus n unabi Yahu, mmis n Ḥanani, uřa x Baɛca d taddart nnes u x marra taɛeffant i igga di tiṭṭawin n SIDI, umi t isɛar s řexdayem n ifassen nnes u umi d idweř ammu am taddart n Yarubɛam uřa minzi netta tuɣa iqḍa wanita.

8 Deg useggʷas wiss setta u-ɛicrin n Asa, ajeǧid n Yahuda, idweř Iyla, mmis n Baɛca, d ajeǧid x Israil di Tirṣa, i ijj n řmijař n tnayen n iseggʷusa. 9 Zimri, amsexxar nnes, wenni d ameqqran x ijj n wezyen n ikarruten n umenɣi, igga xas ict n tmeɛmuč umi t tuɣa di Tirṣa, am tuɣa iscar di taddart n Arṣa, wenni tuɣa d ameḥḍay x taddart di Tirṣa.

10 Zimri yudef, iwta i-t uca inɣa i-t deg useggʷas wiss sebɛa u-ɛicrin n Asa, ajeǧid n Yahuda. Netta idweř d ajeǧid deg wemcan nnes. ^■  

11 Řami idweř d ajeǧid uca inya x řɛarc nnes, imsar, aqa iqḍa x marra taddart n Baɛca. Netta war ijji uřa d ijj wenni t iggin x řḥiḍ ad iddar u uřa d ijj wenni izemmaren ad as intaqem u uřa d ijj zeg imeddukkař nnes.

12 Ammu i iteḥḥa Zimri marra taddart n Baɛca ɛlaḥsab awař n SIDI nni issiweř Baɛca s ufus n unabi Yahu

13 di ssibbet n marra ddnub n Baɛca d ddnub n mmis Iyla i zi xḍan nitni u i zi arrin Israil ad ixḍa am sɛaren SIDI, AREBBI n Israil, s řexyařat nsen ibeṭṭiřen.

14 Imezruyen iqqimen n Iyla, d marra min igga, ma nitni war ttwazemmemen ca deg wedlis n imezruyen n ijeǧiden n Israil?

15 Deg useggʷas wiss sebɛa u-ɛicrin n Asa, ajeǧid n Yahuda, tuɣa Zimri sebɛa n wussan d ajeǧid di Tirṣa. Řgens tuɣa iḥṣar i Jibbatun nni iǧan n Ifilisṭiniyyen.

16 Řgens i tuɣa iwtin iqiḍan nnes din, isřa aqa qqaren: “Zimri tuɣa igga d ict n tmeɛmuč uca inɣa ajeǧid.” Deg wass nni marra řgens yarra Ɛumri, wenni d ameqqran x řɛeskar, d ajeǧid x Israil di řmargeḥ n řɛeskar.

17 Ɛumri igeɛɛed-dd zi Jibbatun d marra Israil akides uca nnḍen as-dd i Tirṣa.

18 Umi iẓra Zimri aqa tandint tuɣa tᵉttwaṭṭef, yudef ɣar lqelɛa n taddart n ujeǧid, iqedd i taddart n ujeǧid tiwa nnes timessi ařami immut

19 di ssibbet n ddnub nnes i tuɣa igga, umi igga min iǧan d aɛeffan di tiṭṭawin n SIDI, umi yuyur deg webrid n Yarubɛam uřa di ssibbet n ddnub i igga am d yarra Israil ad ixḍa.

20 Imezruyen iqqimen n Zimri, d tameɛmuč i igga, ma man aya war ittwazemmem ca deg wedlis n imezruyen n ijeǧiden n Israil?

21 Xenni ittwammsebḍa řgens n Israil x tnayen n iziynat. Ijj n wezyen n řgens ibedd awarni i Tibni, mmis n Jinat, maḥend ad t ggen d ajeǧid u ijj n wezyen nneɣni ibedd awarni i Ɛumri. 22 Řgens nni ibedden awarni i Ɛumri, tuɣa ijhed x řgens nni ibedden awarni i Tibni, mmis n Jinat. Xenni immut Tibni u Ɛumri idweř d ajeǧid.

23 Deg useggʷas wiss waḥit u-třatin n Asa, ajeǧid n Yahuda, idweř Ɛumri d ajeǧid x Israil. Netta iḥkem tenɛac n iseggʷusa. Di Tirṣa iḥkem setta n iseggʷusa. 24 Isɣa adrar n Samarya zi Camir s tnayen n talintat n nnuqart u netta ibda ad ibna x wedrar n Samarya. Iřaɣa as i tendint i ibna Samarya, ɛlaḥsab isem n Camir, bab n wedrar. 25 Ɛumri igga min iǧan d aɛeffan di tiṭṭawin n SIDI. Netta tuɣa igga min iǧan d aɛeffan mahu x marra inni tuɣa d as izwaren. 26 Netta yuyur di kuř tabridt n Yarubɛam, mmis n Nabaṭ, u di ddnub nnes i zi yarra Israil ad ixḍa, umi sɛaren nitni SIDI, AREBBI n Israil, s řexyařat nsen ibeṭṭiřen.

27 Imezruyen iqqimen n Umri, d min igga d ṣṣulṭa nnes i zi igga, ma man aya war ittwazemmem ca deg wedlis n imezruyen n ijeǧiden n Israil? 28 Ɛumri ittwassars deg wenḍeř jar řejdud nnes. Netta ittwanḍeř di Samarya. Mmis Axab idweř d ajeǧid deg wemcan nnes.

29 Axab, mmis n Ɛumri, idweř d ajeǧid x Israil deg useggʷas wiss tmenya u-třatin n Asa, ajeǧid n Yahuda. Axab mmis n Ɛumri, iḥkem tnayen u-ɛicrin n iseggʷusa x Israil di Samarya. 30 Axab, mmis n Ɛumri, igga min iǧan d aɛeffan di tiṭṭawin n SIDI, mahu x marra inni tuɣa zzayes izwaren. 31 Iḥseb drus aqa yarni iṭṭef di ddnub n Yarubɛam, mmis n Nabaṭ, uca yiwi Izabal, yeǧis n It-Baɛal, ajeǧid n Iṣiduniyyen, d tamɣart uca yuyur ad isexxar i Baɛl, yuḍar as. 32 Netta issbedd ijj n uɛalṭar i Baɛl di zzawect n Baɛl nni ibna netta di Samarya. 33 Netta igga ɛawed ict n trebbit n cwarti. Axab iɛdu s wesɛar nnes i SIDI, AREBBI n Israil, x marra ijeǧiden nni tuɣa i d as izwaren.

34 Deg wussan nnes ibna Ḥiyil, zi Bayt-Il, tandint n Ariḥa. Issars dsas nnes di ssum n mmis amenzu Abiram u di ssum n mmis amaẓuẓ Sajub yarekkeb tiwwura nnes ɛlaḥsab awař n SIDI i issiweř s ufus n Yacuwa, mmis n Nun. ^■