Anabi Iliya ɣar yeɣzar n Krit
17
1 Iliya, zi Ticbi, zeg imeɛzab n Jilɛad, inna i Axab: “S tidett am iddar SIDI, AREBBI n Israil, wenni umi beddeɣ zzat i wudem nnes, mařa ad dd-yas nnda niɣ anẓar deg iseggʷusa-ya, ad yiři aya mɣir s wawař inu!” □ ■ 2 Yusa-dd ɣares wawař n SIDI, inna: 3 “Uyur ssenni, arr s uzeǧif ɣar ccarq uca snuffar ixef nnek ɣar tiɣzart n Krit wenni iǧan ɣar ujemmaḍ n L'Urdun. □ 4 Ad imsar, ad teswed zi teɣzart u Necc umureɣ i ibaɣřiwen, aqa ad cek dinni sseccen.” 5 Netta yuyur deg webrid uca igga ɛlaḥsab awař n SIDI. Netta yuyur ad izdeɣ ɣar teɣzart n Krit nni iǧan ɣar ujemmaḍ n L'Urdun. 6 Ibaɣřiwen iwyen as-dd aɣrum d weysum ɣar tuffut uřa d aɣrum d weysum ɣar tameddit u netta iswa zi teɣzart. Iliya d tajjač n Ṣarfat
7 Awarni i waṭṭas n wussan, imsar, aqa yuẓeɣ tiɣzart, maɣar war iwti ca wenẓar di temmurt. 8 Yusa as-dd wawař n SIDI, inna: 9 “Kkar, uyur ɣar Ṣarfat nni iǧan ɣar Ṣidun u zdeɣ dinni. Xzar, necc umureɣ dinni i yict n tajjač maḥend ad cek tessecc.” ■
10 Netta ikkar, yuyur ɣar Ṣarfat. Umi dd-yusa ɣar tewwart n tendint, xzar, ict n tajjač tᵉttḥarwac akeccuḍ. Netta iřaɣa xas, inna: “Awi ayi-dd ca n waman deg uɣarraf-a, ḥima ad sweɣ.”
11 Umi tuyur nettat ḥima ad dd-tawi aya, iřaɣa-dd netta xas: “Awi ayi-dd uřa d ijj n uřeqqim n weɣrum deg ufus nnem.
12 Maca nettat tenna: “S tidett am iddar SIDI, AREBBI nnek, min ɣari d tafdiřt, aqa mɣir ict n wuru n waren deg ubuqař d ca n zzect deg uɣarraf! Xzar necc ḥarwceɣ tnayen n ikeccuḍen u ad t sswejdeɣ i necc d mmi, ḥima ad t necc ad nemmet.”
13 Inna as Iliya: “War tteggʷed ca. Uyur, egg min tuɣa tennid, maca egg ayi-dd d amezwaru ict n tefḍiřt u awi tt-i-dd da ɣari. Awarni uya ad tessenggʷed ca i cem u i ixef nnem d mmim.
14 Maɣar ammu i iqqar SIDI, AREBBI n Israil: ‘Aren deg ubuqař war ixekkʷi u zzect deg uɣarraf war tneqqiṣ ař ass i di i ɣa iwc SIDI anẓar x wudem n temmurt.’ ”
15 Nettat tuyur uca tegga ɛlaḥṣab awař n Iliya. Ammu i ccin netta d nettat d taddart nnes, aṭṭas n wussan.
16 Aren deg ubuqař war ixekkʷi d zzect deg uɣarraf war tneqqeṣ ɛlaḥsab awař n SIDI i issiweř s uqemmum n Iliya.
17 Awarni man aya, imsar, aqa ihřec mmis n temɣart-a, n llala n taddart. Řehřac nnes yarni aṭṭas ařami war ittari ɛad nnefs.
18 Nettat tenna i Iliya: “Min din jar ayi d cek, a cek, aryaz n AREBBI? Ma tusid-dd ɣari ḥima ad ayi tessɛeqřed x ddnub inu u ḥima ad tenɣed mmi?”
19 Netta yarra-dd xas: “Ewc ayi-dd mmim!” U netta iksi t zeg weḥsin nnes, yarbu t ɣar sennej ɣar wexxam n nnej mani tuɣa izdeɣ netta simant nnes uca issars i-t x qama nnes. 20 Xenni iřaɣa ɣar SIDI, inna: “SIDI, AREBBI inu, ma teggid xenni ɛad tuɛeffna di tajjač-a i ɣar zeddɣeɣ necc am ubarrani, ařami tenɣid mmis?” 21 Netta isarreḥ ixef nnes třata n twařawin tiwa i uḥenjir u iřaɣa ɣar SIDI, inna: “SIDI, AREBBI inu, ejj ad ɣares dd-yeɛqeb řeɛmar n uḥenjir-a!” 22 SIDI isřa i tmijja n Iliya uca iɛqeb-dd řeɛmar n uḥenjir ɛawed ɣares ařami dd-idweř iddar. 23 Iliya iksi aḥenjir uca issehwa t zeg wexxam n nnej di taddart uca iwca as t i yemmas. Inna Iliya: “Xzar, mmim iddar!” 24 Tenna temɣart i Iliya: “Řexxu ssneɣ aqa cek d ijj n weryaz n AREBBI u aqa awař n SIDI deg uqemmum nnek d tidett.”