1 Awarni i waṭṭas n wussan, imsar, aqa yusa-dd wawař n SIDI ɣar Iliya deg useggʷas wiss třata, inna: “Uyur, scen ixef nnek i Axab, maɣar Necc ad wceɣ anẓar di temmurt.” 2 Uca yuyur Iliya ḥima ad isscen ixef nnes i Axab. Tuɣa řaẓ imɣar di Samarya. 3 Axab tuɣa iřaɣa i Ɛubadya wenni iǧan x taddart. Ɛubadya tuɣa itteggʷed SIDI aṭṭas. 4 Umi Izabal iqḍa inabiyyen n SIDI, imsar, aqa Ɛubadya yiwi mya n inabiyyen, issnuffar i-ten, xemsin deg ijj n yefri, u iɛteq i-ten s weɣrum d waman. 5 Axab inna i Ɛubadya: “Uyur di temmurt ɣar marra tařawin n waman u ɣar marra tiɣezratin. Ad taɣ ad naf aheddu u zemmaren iysan d isardan ad qqimen ddaren u ad taf nhřa ma nenɣa řmař.” 6 Nitni bḍan tammurt jar asen ḥima ad tt cuqqen. Axab yuyur x ijj n webrid weḥḥdes u Ɛubadya yuyur weḥḥdes x ijj webrid nneɣni.

7 Umi tuɣa Ɛubadya deg webrid, xzar, aqa immeřqa akides Iliya. Ɛubadya iɛqeř i-t, iwḍa zzates s uɣembub nnes ɣar temmurt, inna: “Ma d cek, sidi inu Iliya?” 8 Inna as wanita: “D necc. Uyur, inna i sidi nnek: ‘Xẓar, Iliya aqa-t danita!’ ” 9 Maca netta inna: “Man ddenb i ggiɣ, aqa cek ad ayi tsellmed deg ifassen n Axab ḥima ad ayi ineɣ?

10 S tidett am iddar SIDI, AREBBI nnek, war din uřa d ijj n řgens niɣ ict n tgeldit mani sidi inu war ijji ad xak yarzu! Mařa nnan nitni: ‘Netta war da iǧi!’, xenni ijja řgens nni ad ijjaǧ belli war zemmaren ad cek afen.

11 U řexxu cek tennid: ‘Uyur, ini i sidi nnek: Xzar Iliya aqa-t danita!’

12 Ad taɣ ad imsar, xmi i xak i ɣa uyureɣ, aqa Arruḥ n SIDI ad cek iksi, war ssineɣ mani. Mařa xenni necc ad dd-aseɣ ḥima ad t iniɣ i Axab u netta war cek ittif, netta ad ayi ineɣ, umi amsexxar nnek itteggʷed SIDI zi temẓi inu.

13 Ma war d ac ɛiwden ca i sidi inu, min ggiɣ necc, umi Izabal inɣa inabiyyen n SIDI? Aqa necc ssnuffareɣ mya n yeryazen zeg inabiyyen, kuř xemsin deg ijj n yefri, uca ɛetqeɣ ten s weɣrum d waman?

14 U řexxu teqqared ‘Uyur, ini i sidi nnek: Xzar, Iliya aqa-t da!’ Netta ad ayi ineɣ.”

15 Inna Iliya: “S tidett am iddar SIDI n řɛeskarat zzat i wudem nnes umi i beddeɣ, aqa nican necc ad seccneɣ ixef inu ass-a!”

16 Xenni yuyur Ɛubadya ɣar umsagar ak-d Axab u ixebbar as t. Uca Axab yuyur maḥend ad imsagar ak-d Iliya.

17 Umi iẓra Axab Iliya, imsar, aqa Axab inna as: “Ma cek d aḍeyyeɛ n Israil?” ^■  

18 Netta inna: ‘Necc war ḍiyyɛeɣ ca Israil, maca cek d taddart n babac umi kenniw tejjim řumurat n SIDI ɣar uɣezdis u cek tuyured awarni i Ibaɛlen.

19 Xenni řexxu, smun marra Israil ɣari ɣar wedrar n Karmil uřa d arebɛa-mya u-xemsin n inabiyyen n Baɛl d arebɛa-mya n inabiyyen n trebbit n cwarti nni ittetten zi ṭṭabřa n Izabal.”

20 Axab issekk ijj n ureqqas ɣar marra ayt n Israil u issmun inabiyyen ɣar wedrar n Karmil. 21 Iliya iqarreb-dd ɣar marra řgens, inna: “Mecḥař ɛad i ɣa tekkem ɛad ttneqřabem kenniw ɣar tnayen n iɣezdisen? Mařa SIDI d AREBBI, ḍfarem as-dd u mařa d Baɛl, xenni ḍfarem wanita!” Maca řgens war xas dd-yarri uřa s yijj n wawař. ^■   22 Xenni inna Iliya i řgens: “Necc waha i iqqimen d anabi n SIDI uca inabiyyen n Baɛl aqa aten s arebɛa-mya u xemsin n yeryazen. 23 Ejj ad aneɣ wcen tnayen n iyenduzen. Ejj i-ten xenni ad farzen ijj n uyenduz i yixef nsen, ad t bḍan u ad t ssarsen x ukeccuḍ, maca war tteggen timessi sadu nnes. Necc ad sswejdeɣ amwa nneɣni, ad t ssarseɣ x ukeccuḍ u war tteggeɣ timessi sadu nnes. 24 Xenni ad třaɣam isem n arebbi nwem u necc ad řaɣiɣ Isem n SIDI uca AREBBI wenni i ɣa yarren s tmessi, d netta ad yiři d AREBBI.” Uca iřaɣa marra řgens, nnan: “Awař-a d lemliḥ!”

25 Inna Iliya i inabiyyen n Baɛl: “Xḍarem i yixef nwem ayenduz amezwaru u sswejdem as t d amezwaru, maɣar kenniw s waṭṭas. Řaɣam xenni isem n arebbi nwem, maca war srusam ca timessi sadu nnes.” 26 Nitni ksin ayenduz i d asen iwca netta u sswejden t. Xenni řaɣan i yisem n Baɛl, zi tuffut ɣares ař azal u nnan: “A Baɛl, arr aneɣ-dd!” Maca walu n řḥess uca uřa d ijj war dd-yarri ca. Nitni negzen x uɛalṭar i din ittwaggen. 27 Ɣar wazal ibda Iliya ittqessar xasen, inna: “Řaɣam s tmijja ijehden, aqa-t d arebbi. Nican netta ittxemmam niɣ iɛezzeř cwayt niɣ netta ɛad deg webrid. Ad taɣ itteṭṭeṣ uca ittxeṣṣa as ad ifaq ɛad.” 28 Nitni sɣuyyen s tmijja ijehden u qessen ixef nsen s řesyuf d iḥricen am tnamit nsen, ařami uzzřen idammen nsen xasen. 29 Umi iɛdu azal, imsar, aqa nitni ttnebban ɣares ař dd ɣa yawyen tawhibt n řɣiǧet. Maca war din uřa d ict n tmijja uca uřa d ijj war dd-yarri u war din bu listijaba walu.

30 Xenni inna Iliya i řgens: “Qarrbem-dd ɣari!” Marra řgens iqarreb-dd ɣares u netta iɛdeř aɛalṭar n SIDI i tuɣa ittwahdem. 31 Iliya iksi tenɛac n yeẓra, x řqedd n tqebbař n iḥenjiren n Yaɛqub, wenni umi i dd-yusa wawař n SIDI i tuɣa inna: “Israyil ad yiři d isem nnek.” ^■   32 S yeẓra nni ibna netta aɛalṭar deg Yisem n SIDI. Iqewwar i uɛalṭar ict n tarya s řqedd n tnayen n řeqyas n zzariɛet. ^□   33 Isettef akeccuḍ uca ibḍa ayenduz di iceǧiqen, issars i-t x ukeccuḍ. 34 Inna: “Ɛemmarem arebɛa n ibuqařen s waman uca zeǧɛem ten tiwa i tɣarṣt n wecmaḍ u x ukeccuḍ!” Uca yarni inna: “Ggem t twařa nneɣnit!” U nitni ggin t twařa nneɣnit. Xenni inna: “Ggem t wiss třata n twařawin!” U nitni ggin t wiss třata n twařawin. 35 Ttazzřen waman nnḍen i uɛalṭar. U netta iɛemmar uřa d tarya s waman.

36 Umi qeddmen tawhibt n řɣiǧet, imsar, aqa anabi Iliya iqarreb-dd, inna: “SIDI, AREBBI n Ibrahim d Isḥaq d Israil, ejj ad ittwassen ass-a aqa Cek d AREBBI di Israil u aqa necc d amsexxar nnek i ǧiɣ u belli necc ggiɣ marra man aya ɛlaḥsab awař nnek. ^■   37 Arr ayi-dd, a SIDI, arr ayi-dd ḥima řgens-a ad issen, aqa Cek, a SIDI, d AREBBI i teǧid u aqa Cek tarrid-dd uř nsen ɣarek.” 38 Uca tehwa-dd tmessi n SIDI, tecca taɣarṣt n wecmaḍ d ukeccuḍ d yeẓra d tɛejjajt, uca teřseḥ uřa d aman i iǧan di tarya. 39 Marra řgens iẓra i-t. Nitni wḍan s uɣembub nsen ɣar temmurt, nnan: “SIDI aqa-t d AREBBI, SIDI aqa-t d AREBBI!” 40 Iliya inna asen: “Ṭṭfem inabiyyen n Baɛl, war tejjam uřa d ijj zzaysen ad yarweř.” Ṭṭfen ten uca Iliya ijja i-ten ad ssehwan ɣar teɣzart n Qicun uca inɣa i-ten dinni.

41 Xenni inna Iliya i Axab: “Gaɛɛed, ecc teswed, maɣar necc aqa ttesřiɣ řḥess n ijj n ucarcar n wenẓar aṭṭas.” 42 Axab igeɛɛed ḥima ad icc ad isu uca igeɛɛed Iliya ɣar tqiccat n Karmil. Iqqunjeř x temmurt uca igga udem nnes jar ifadden nnes. 43 Xenni inna i uḥudri nnes: “Gaɛɛed uca xzar ɣar řebḥar!” Wanita igeɛɛed, ixzar ɣar řaggʷaj, inna: “War ttwiřiɣ walu!” Iliya inna: “Dweř-dd twařa nneɣnit!” uca ammu sebɛa n twařawin! 44 Ɣar twařa wiss sebɛa, imsar, aqa inna: “Xzar, ict n tseynut tameẓyant, am ufus n ijj n weryaz, igeɛɛed-dd zi řebḥar.” Xenni inna: “Uyur, ini i Axab: ‘Ḥezzem iysan, hwa-dd maḥend anẓar war cek ittᵉṭṭef.” 45 Jar u jar ibbarcen ujenna s iseynuten u s uṣemmid uca ibda wenẓar ad iwwet aṭṭas. Xenni inya Axab deg ukarru, iffeɣ, yuyur ɣar Yazraɛil. 46 Tuɣa afus n SIDI x Iliya. Netta ibyes taɛjinna nnes uca yuyur zzat i wudem n Axab ɣares ařami dd-tiwḍed ɣar Yazraɛil.