Iliya x wedrar n Hurib
19
1 Axab iḥaja i Izabal marra min igga Iliya uřa d marra x mammec netta inɣa marra inabiyyen s ssif. 2 Izabal tessekk ijj n ureqqas ɣar Iliya maḥend ad as yini: “Iři ad ayi ggen irebbiten ta d ta uřa d ktar zi man aya, mařa war ggiɣ tiwecca di řweqt-a řeɛmar nnek amecnaw řeɛmar n ijj zzaysen.” 3 Netta ixzar, ikkar uca iruḥ ḥima ad injem řeɛmar nnes. Yusa-dd ɣar Bi’r-Sebɛa nni iǧan di Yahuda u ijja aḥudri nnes dinni. 4 Netta simant nnes yuyur ticři n webrid n ijj n wass di řexřa, iqqim izzeř sadu tazeggʷart n wazzu uca ittar ḥima ad immet řeɛmar nnes, inna: “Kfa, a SIDI, ksi řexxu řeɛmar inu, maɣar war ǧiɣ ḥsen x ibabaten inu.” 5 Xenni izzeř, iṭṭeṣ sadu ict n tzeggʷart n wazzu. U xzar, Lmalak iḥada t, inna as: “Kkar, ecc!” 6 Umi netta issgeɛɛed tamuɣři nnes, xzar, zzat i uzeǧif nnes aqa din ict n tefḍiřt i tuɣa ittwaseggʷen s řefḥem uřa d ict n tebriqt s waman. Xenni icca, iswa uca idweř ɛawed izzeř din. 7 Lmalak n SIDI yusa-dd twařa wiss tnayen, iḥada t, inna: “Kkar, ecc, niɣ abrid ad yiři d azirar xak.” 8 Netta ikkar, icca, iswa. S jjehd n macca yuyur ticti n arebɛin n wussan d arebɛin n ǧiyaři ɣares ař adrar n AREBBI, Hurib. ■ 9 Dinni yiweḍ ɣar ijj n yefri uca issens dinni. U xzar, yusa as-dd awař n SIDI, inna as: “Min da i ɣa tegged, Iliya?”
10 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnek, hedmen iɛalṭaren nnek u inabiyyen nnek ttwanɣen s ssif, mɣir necc d wenni iqqimen u nitni arezzun ad kksen uřa d tudart inu.” □ ■
11 Netta inna: “Ffeɣ, bedd x wedrar zzat i wudem n SIDI.” U xzar, iɛdu-dd SIDI. Ict n tḥaryaḍt temɣar u tejhed aqa tewta idurar u teřbez řejruf zzat i wudem n SIDI. Maca SIDI tuɣa war iǧi ca di tḥaryaḍt. Awarni i tḥaryaḍt yusa-dd ijj n wenhezzi n temmurt. Maca SIDI tuɣa war iǧi ca deg wenhezzi n temmurt.
12 Awarni i wenhezzi n temmurt tusa-dd tmessi. Maca SIDI tuɣa war iǧi ca di tmessi. Awarni i tmessi tuɣa din ict n tmijja ifsus, yarsa.
13 Umi isřa Iliya, imsar, aqa iřeḥḥef aɣembub nnes deg upartessu nnes, iffeɣ ɣar barra uca ibedd ɣar uqemmum n yefri. U xzar, ict n tmijja issiweř akides, tenna: “Min da tegged Iliya?”
14 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnek, hedmen iɛalṭaren nnek u inabiyyen nnek ttwanɣen s ssif, mɣir necc d wenni iqqimen u nitni arezzun ad kksen uřa d tudart inu.”
15 Inna as SIDI: “Uyur, ɛqeb abrid nnek ɣar řexřa n Dimacq u xmi i ɣa tawḍed ɣar din, dhen Ḥazayil d ajeǧid x Aram!
16 Uřa d Yahu, mmis n Nimci, ad t tdehned d ajeǧid x Israil uca Ilicaɛ, mmis n Cafat zi Abal-Maḥula, dhen i-t d anabi deg wemcan nnek.
17 Ad imsar, aqa Yahu ad ineɣ wi i ɣa inejmen i ssif n Ḥazayil u Ilicaɛ ad ineɣ wi i ɣa inejmen i ssif n Yahu. ■
18 Xenni jjiɣ Necc di Israil sebɛa-ařef n řeɛmur, marra inni ifadden nsen war qqunjeřen zzat i Baɛl u marra inni aqemmum nsen war t issudmen.” ■
Tařaɣit n Arebbi x Ilicaɛ
19 Iffeɣ Iliya ssenni, yufa Ilicaɛ, mmis n Cafat. Netta tuɣa icarrez s tenɛac n izayřuten n iyenduzen u netta simant nnes icarz x wiss tenɛac. Iliya iɛdu ɣares, inḍar xas apartessu nnes. 20 Řexdenni ismeḥ deg ifunasen, iɛřef awarni i Iliya, inna: “Ttzawgeɣ, ejj ayi ad ssudmeɣ baba d yemma i uqebbeḍ, xenni ad cek ḍfareɣ.” Netta inna as: “Uyur, dweř, minzi min dayek ggiɣ necc?” 21 Iɛqeb netta xenni awarni as, iksi ijj n uzayřu n ifunasen uca iɣarṣ asen. S ukeccuḍ n uzayřu isseggʷu aysum nsen, iwca t i řgens maḥend ad icc. Awarni i uya ikkar, uca iḍfar Iliya, isexxar as.