1 Tuɣa yarɣa weɣḍab n SIDI ɛawed x Israil. Netta issekkar Dawud xasen, inna: “Uyur ad tḥesbed Israil d Yahuda!” 2 Inna ujeǧid i Yuwab, akumandar n řɛeskar, wenni tuɣa ɣares iǧan: “Ekk marra tiqebbař n Israil, zi Dan ɣares ař Bi’r-Sebɛa, sedd řgens maḥend necc ad ssneɣ řqedd n iryazen n řgens.” 3 Xenni inna Yuwab i ujeǧid: “Ad yarni SIDI, AREBBI nnek, i řgens-a am mammec ǧan nitni řexxu u ɛad mya n tseqqar am mammec ǧan nitni řexxu u ejj ad ẓarent tiṭṭawin n ujeǧid. Maca i umi iwca taynit ujeǧid i tmesřact-a?” 4 Maca awař n ujeǧid ijhed x Yuwab u x ikumandaren n řɛeskar uca iffeɣ Yuwab ak-d ikumandaren n řɛeskar, yaggʷej x wudem n ujeǧid ḥima ad isedd řɛeskar n Israil. 5 Nitni ẓwan L'Urdun u wtin iqiḍan nsen ɣar uɣezdis afusi n tendint n Ɛaruɛir tenni ɣar řwest n teɣzart n yeɣzar n Jad, uca uyuren xenni ɣar Yaɛzir. 6 Usin-dd di Jilɛad u di Taḥtim-Ḥudci. Xas uca usin-dd ɣar Dan-Yaɛan u ɣar jjwayeh n Ṣidun. 7 Uca usin-dd ɣar tendint n Ṣur i ifaryen s iɣebrawen u ɣar marra tneddam n Iḥiwiyyen d Ikanɛaniyyen u iwḍen xenni ɣar ljanub n Yahuda di Bi’r-Sebɛa. 8 Ammu kkin nitni marra tammurt u awarni ɛdun tesɛa n iyuren d ɛicrin n wussan usin-dd ɣar Urcalim. 9 U Yuwab iwca i ujeǧid řqedd n řeḥsab n řgens. Di Israil tuɣa dayes temn-myat-ařef n yeryazen imeḥḍen inni izemmaren x ssif u xemsa-myat-ařef n yeryazen tuɣa aten zi Yahuda.

10 Maca uř n Dawud ibda ad ireddu as awarni iḥesseb řgens u Dawud inna i SIDI: “Necc xḍiɣ xak aṭṭas s min ggiɣ. A SIDI, kkes řexxu řmuɛṣiyyet x umsexxar nnek, maɣar necc ggiɣ tubbuheřya tameqqrant.”

11 Umi Dawud ikkar ɣar tuffut, imsar, aqa yusa-dd awař n SIDI i unabi Jad, amwařaw n Dawud, inna:

12 “Uyur, siweř i Dawud: ‘Ammu i iqqar SIDI: Ad ac-dd ssarseɣ třata n tmesřayin. Ixḍar ict zzaysent uca ad ac tt ggeɣ.’ ”

13 Yusa-dd Jad ɣar Dawud, ixebbar i-t, inna as: “Ma ad iwḍa sebɛa n iseggʷusa n řaẓ x temmurt nnek? Niɣ texsed ad tarewřed třata n iyuren zzat i wudem n řɛedyan nnek u netta ad cek iḍfar? Niɣ texsed ad yiři ṭṭaɛun di temmurt nnek? Xenni řexxu, ssen min i ɣa tixḍared u xzar, min ɣa arreɣ d tamwarrit ɣar wenni d ayi dd-issekken.”

14 Xenni inna Dawud i Jad: “Necc ttwaḥṣareɣ aṭṭas. Ejj aneɣ ad newḍa deg ifassen n SIDI, maɣar arreḥmet nnes temɣar, maca war xseɣ ca ad wḍiɣ deg ifassen n iwdan.”

15 Xenni issiweḍ SIDI ijj n ṭṭaɛun x Israil, zi tuffut ɣares ař ijj n řmijař ittwaggen. Mmuten sebɛin-ařef n yeryazen n řgens zi Dan ař Bi’r-Sebɛa.

16 Umi isswiẓẓeḍ Lmalak afus nnes x Urcalim, ḥima ad iɣḍeř tandint deg uḍeyyeɛ, indem SIDI x tuɛeffna, inna i Lmalak i iggur ad iɣḍeř řgens deg uḍeyyeɛ: “Cfa, sehwa afus nnek řexxu!” Tuɣa Lmalak n SIDI ittaweḍ ɣar unedrar n Uyabusi Arawna.

17 Umi Dawud iẓra Lmalak wenni iwtin řgens, issiweř Dawud ak-d SIDI, inna: “Xzar, necc xḍiɣ u necc, wah necc ggiɣ řmuɛṣiyyet, maca uǧi aya, min ggin? Ejj ad yiři ufus nnek i tecti ɣari d ɣar taddart n baba.”

18 Deg wass nni beɛda yusa-dd Jad ɣar Dawud, inna as: “Gaɛɛed, sbedd ijj n uɛalṭar i SIDI x unedrar n Uyabusi Arawna.”

19 Dawud igeɛɛed ɛlaḥsab awař n Jad, am mammec t yumur SIDI. 20 Arawna iceyyeɛ u iẓra ajeǧid ak-d imsexxaren nnes usin-dd ɣares. Xenni yuyur Arawna ɣar barra, yuḍar zzat i ujeǧid s wudem nnes ɣar temmurt. 21 Arawna inna: “Mayemmi i dd-yusa sidi inu, ajeǧid, ɣar umsexxar nnes?” Dawud inna: “Ḥima ad xak sɣeɣ andrar ḥima ad bniɣ din ijj n uɛalṭar i SIDI, maḥend ad tbedd tecti di řgens.” 22 Xenni inna Arawna i Dawud: “Ejj sidi, ajeǧid, ad iksi u ad iwehheb min d as ittɣiř d lemliḥ di tiṭṭawin nnes. Xzar aqa din ifunasen d tfunasin i tɣarṣt n wecmaḍ u ksi tiřwiḥin itteḥřuǧuḍen i usarwet d řeḥwayej n ifunasen d tfunasin d akeccuḍ i tmessi. 23 Aya marra, a ajeǧid, ad ac yewc Arawna i ujeǧid.” Ɛawed inna Arawna i ujeǧid: “Iři ad dd-tased cek x řxaḍar ɣar SIDI, AREBBI nnek!” 24 Maca ajeǧid inna i Arawna: “Lla, maɣar necc xseɣ ad xak t sɣeɣ s ttaman nnes ikmeř, maɣar necc war ttwehhbeɣ i SIDI, AREBBI inu, tiɣarṣa n wecmaḍ i war isekkwin walu.” U Dawud isɣa andrar d ifunasen d tfunasin i xemsin n iciqlen n nnuqart. 25 Dawud ibna din ijj n uɛalṭar i SIDI uca issgeɛɛed din tiɣarṣa n wecmaḍ d tewhibin n řɣiǧet. Ammu ittwaseṣřeḥ SIDI x temmurt s tẓaǧit nsen yuǧɣen u tᵉttwasbedd tecti di Israil.