1 Ina d awařen ineggura n Dawud.

Dawud, mmis n Yassa issawař, bu-teɣruḍt wenni ittwassɛuǧan issawař, amedhun n AREBBI n Yaɛqub, d amedyaz iɛizzen n Israil.

2 Arruḥ n SIDI issiweř zzayi u awař nnes x iřes inu.

3 AREBBI n Israil inna, aqa Taṣḍart n Israil tessiweř akidi:

‘Ijj n řḥakem jar iwdan, ijj n umsegged,

ijj n řḥakem wenni itteggʷeden zi AREBBI,

4 wenni iggin am tfawt ɣar tuffut xmi dd-tneqqar tfuct,

ɣar ict n tuffut břa iseynuten iɛbubbzen,

xmi s tissiqt n tfawt, s wenẓar

aqa issfuffuy aɣemmuy aziza zi temmurt.’

5 Waxxa taddart inu ɣar Arebbi war teǧi amenni,

aqa igga ayi ijj n Řɛahd i řebda,

msettef di marra u ittwaḥḍa.

Maɣar qaɛ asenjem inu d marra min issnekkaran řefraḥet,

ma war issɣemma aya?

6 Maca inni war isekkwin ad ttwamenḍaren

am ict n tseṭṭa ak-d isennanen, marra nitenti,

maɣar war izemmar ad ttwaṭṭfent s ufus.

7 Aryaz wenni ixsen ad tent iḥada,

ad iḥezzem ixef nnes s wuzzař d ukeccuḍ n lansa

u nitni ad ttwascemḍen s tmessi deg wemcan nsen.”

8 Ina d ismawen n ayt n bu-teɣruḍt i iǧan ɣar Dawud: Yucayb Bacabbat, mmis n Atahkamuni, azeǧif n ineɣrafen. Lansa nnes tuɣa d řehzuṭ nnes, issnuqqeb temn-mya n yeryazen deg ijj n umenɣi. ^□   9 Awarni as yusa-dd Aliɛazar, mmis n Dudu, mmis n Axuxi, netta tuɣa d ijjen zi třata n ayt n bu-teɣruḍt nni iǧan ak-d Dawud, řami nitni sstehzan zeg Ifilisṭiniyyen nni tuɣa din ssmunen i umenɣi u iryazen n Israil geɛɛden ɣarsen i umenɣi.

10 Netta ikkar, iwta deg Ifilisṭiniyyen ɣares ařami afus nnes yuḥer. Iřṣeq ufus nnes di ssif. SIDI yiwiḍ ijj n usenjem d ameqqran deg wass nni uca iryazen n řgens ɛeqben awarni as, mɣir ḥima ad keccḍen.

11 Awarni as yusa-dd Camma, mmis n Aji, Aharari. Řami njarwen Ifilisṭiniyyen ɣar Laxi, tuɣa dinni ijj n iyyar iccuren s řeɛdes. Řgens tuɣa yarweř zzat i wudem n Ifilisṭiniyyen.

12 Netta ibedd di řwest n ureqqiɛ n iyyar nni uca ifekk i-t-i-dd uca iɣřeb x Ifilisṭiniyyen. Ammu yarra as SIDI ijj n weɣřab d ameqqran.

13 Třata zi třatin n izeǧifen hwan, usin-dd ɣar Dawud di řweqt n tmeyra, deg ifri n Abdullam. Tuɣa din ict n tarbiɛt n Ifilisṭiniyyen tewta iqiḍan nsen di teɣzurt n Irafawiyyen.

14 Dawud tuɣa-t di lqelɛa u tuɣa din ict n tecbart n iɛessasen n Ifilisṭiniyyen di Bayt-Laḥm.

15 Xenni Dawud iřqef i-t ufadi, inna: “Wi d ayi i dd ɣa yawyen aman zi tařa n Bayt-Laḥm i iǧan ɣar tewwart n tendint?”

16 Xenni cuqqen třata n ayt n bu-teɣruḍt nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, i iǧan ɣar tewwart n tendint. Ksin ten akidsen u iwḍen ɣar Dawud, maca netta yugi ad ten isu uca izeǧeɛ i-ten zzat i SIDI.

17 Netta inna: “Aya iggʷej x afi, a SIDI, aqa necc ad ggeɣ man aya. Ma ad sweɣ idammen n yeryazen, inni din iruḥen am sebbřen tudart nsen?” U netta war ixs ad ten isu. D man aya i t iggin třata n ayt n bu-teɣruḍt nni.

18 Abicay, mmis n Yuwab, mmis n Ṣaruya, tuɣa d azeǧif n třata nni. Netta iḥenneḍ lansa nnes x teřt-mya, issnuqqeb i-ten. Netta ɣares ijj n isem ittwacenneɛ jar třata nni.

19 Ma war iǧi netta d wenni ittwacennɛen aṭṭas zi třata-ya? S uya tuɣa netta d řqebṭan nsen. Maca netta war yiwiḍ uřa ɣar třata n imezwura.

20 Xenni Banaya, mmis n Yahuyadaɛ, mmis n ijj weryaz imeḥḍen, timegga nnes mɣarent, netta zi Qabḍiyil. Netta iɣřeb x tnayen n iyraden ijehden. Ɛawed tuɣa netta ihwa ict n twařa, iɣřeb x ijj n weyrad di řwest n ijj n wanu deg ijj n wass umi iwta wedfeř. 21 Netta iɣřeb uřa x yijj n weryaz d Amiṣri, ijj n weryaz isseggʷaden. Amiṣri tuɣa ɣares ict n lansa deg ufus nnes. Ihwa ɣares s yijj n weɛmud, ikkes as lansa zeg ufus n Umiṣri u inɣa i-t s lansa nnes. 22 D man aya i igga Banaya, mmis n Yahuyadaɛ. S uya ɣares isem icneɛ jar třata n ayt n bu-teɣruḍt. 23 Netta tuɣa d wenni ittwacennɛen aṭṭas zi třatin, maca war yiweḍ ař třata imezwura. Dawud igga i-t jar imtiqqan nnes.

24 Tuɣa Ɛasayil, umas n Yuwab, jar třatin;

Ilḥanan, mmis n Dudu, zi Bayt-Laḥm;

25 Camɛa, Aḥarudi;

Iliqa, Aḥarudi;

26 Halaṣ, Afalṭi;

Ɛira, mmis n Ɛiqqic, Atiquɛi;

27 Abiɛazar, Aɛanatuti;

Mabunnay, Aḥucayi;

28 Ṣalmun, Axuxi;

Mahray, Anaṭufati;

29 Xalab, mmis n Baɛna, Anaṭutafi;

Ittay, mmis n Ribay, zi Jibɛa zeg ayt n Binyamin;

30 Banaya, zi Firɛatun;

Hidday, zi teɣzurin n Jaɛac;

31 Abu-Ɛalbun, Aɛarabati;

Ɛazamut, Abarḥumi;

32 Ilyaḥba, Acaɛlubuni;

zeg iḥenjiren n Yacan, mɣir Yunatan;

33 Camma, Aharari;

Axiyam, mmis Carar, Arari;

34 Ilifalaṭ, mmis n Aḥasbay, mmis n Umaɛki;

Iɛam, mmis n Axiṭufil, Ajiluni;

35 Ḥaṣray, Akarmali;

Faɛray, Alarbi;

36 Yijɛal, mmis n Natan, zi Ṣuba;

Bani, Ajadi;

37 Ṣalaq, Aɛammuni;

Naḥray, Albi’ruti, aḥemmař n řesnaḥ n Yuwab, mmis n Ṣaruya;

38 Ɛira, Ayitri;

Jarab, Ayitri;

39 Uriya, Aḥitti, marra jmiɛ sebɛa u-třatin n yeryazen.