Izři n Dawud
22
1 Dawud issiweř awařen n izři aya i SIDI deg wass umi t ifekk SIDI zeg ufus n marra řɛedyan nnes u zeg ufus n Cawul. 2 Netta inna: “SIDI d taṣḍart inu d lburj inu d amsenjem inu.
3 SIDI n Teṣḍart inu, necc ɣares i ɣa arewřeɣ.
Cek d aseřqi inu d yicc n usenjem inu,
lburj inu yuɛřan, amcan inu n tarewřa d amsenjam inu.
Cek tfekked ayi zi lɛunf. ■
4 Necc řaɣiɣ-dd: ‘Asemɣar i SIDI’,
u aqa ttwasnejmeɣ zi řɛedyan inu.
5 Maɣar nnḍen ayi-dd řemwaj n řmewt,
ssiggʷedent ayi řḥemřat n waman ihajen.
6 Iseɣwan n řaxart carfen ayi,
tixecfin n řmewt ḥṣarent ayi.
7 Di řeḥṣaret inu řaɣiɣ-dd x SIDI u x AREBBI inu i x dd-řaɣiɣ.
Zi Zzawect Tameqqrant nnes isřa Netta i tmijja inu
uca iɣuyyan inu udfen ɣar imezzuɣen nnes.
8 Xenni tenhezz u tarjij temmurt,
dsusa n ujenna ttraḥen-dd ttasen-dd u nhezzen,
maɣar aɣḍab nnes tuɣa ittwasarɣ.
9 Ddexxan igeɛɛed-dd zeg wenzaren nnes
u timessi zeg uqemmum nnes tṣarḍ,
řefḥem itteḥduduqen ittwasarɣ zzayes.
10 Netta igga ajenna ad yaḍar uca ihwa-dd Netta,
aqa din ijj n useynu ibbumbes sadu iḍaren nnes.
11 Netta indeh x ijj n ukirub uca iḍwa,
u Netta ittwaẓar x wafriwen n uṣemmiḍ. □
12 Netta igga taǧest ad as tenneḍ,
am iɛuccuten, ijj n wegraw n waman,
iseynuten iqelljen ibbarecnen.
13 Zi tissiqt qibač nnes ttwasarɣen řefḥem itteḥduduqen.
14 Uca ijja SIDi ajjaj ad idduqqez zeg ujenna,
uca Amɛuǧi x kuřci igga tmijja nnes ttnefrara.
15 Netta issekk fřitcat n řqews nnes uca ibezzeɛ i-ten,
izzaryeḍ assamen uca issiggʷed i-ten.
16 Tisiwin n řebḥar dewřent ttbanent,
dsusa n ddunect dewřen ɛarran zeg uweddeb n SIDI,
zeg uṣuḍi n řeɛwin zeg wenzaren nnes.
17 Zi sennej isswiẓẓeḍ-dd afus nnes,
yiwi ayi, ijbed ayi-dd zeg waman mɣaren.
18 Netta ifekk ayi-dd zi řeɛdu inu ijehden,
zeg inni d ayi icarrhen,
minzi nitni tuɣa jehden xafi.
19 Nitni ḥṣaren ayi deg wass n arẓiyyet inu,
maca SIDI tuɣa d amɛemmed inu.
20 Netta indeh ayi ɣar ttasiɛ uca issenjem ayi,
maɣar Netta tuɣa issɛizza ayi.
21 SIDI ixřef ayi ɛlaḥsab tasegda inu,
ɛlaḥsab tazdugi n ifassen inu ixeǧeṣ ayi.
22 Maɣar necc ḥḍiɣ ibriden n SIDI,
war heyyḍeɣ ca x AREBBI inu s uxeyyeb.
23 Maɣar marra řḥeqq nnes tuɣa zzat i tiṭṭawin inu,
war ḥeyyideɣ ca x tweṣṣa nnes.
24 Dewřeɣ ttwakemmřeɣ akides,
ḥḍiɣ ixef inu zi řmuɛṣiyyet inu.
25 SIDI ixřef ayi anect n tasegda inu,
anect n tazdugi inu zzat i tiṭṭawin nnes.
26 I umeddukkeř amtiqqi i teǧid cek d ameddukkeř d amtiqqi,
i bu-teɣruḍt ikemmřen i teǧid cek tkemmřed.
27 I wenni ittwasizedgen aqa Cek d amezdag,
ak-d wenni ifarɣen, aqa tfarɣed.
28 Cek tessnejmed řgens ittwaḥṣar,
maca tiṭṭawin nnek ḍidd i imɛeffaren, Cek ad ten tessehwid. □
29 Minzi Cek d řefnar inu, a SIDI!
SIDI igga tafawt di taǧest inu.
30 Minzi akidek ad azzřeɣ x ict n bandiyya,
ak-d AREBBI inu ad neggzeɣ x ijj n řḥiḍ.
31 Abrid n Arebbi ikmeř, min iqqar SIDI aqa ittwaṣeffa di tmessi.
Netta d aseřqi i marra inni ɣares yarewřen. ■
32 Maɣar man wen i iǧan d Arebbi, mɣir SIDI,
u man wen i iǧan d taṣḍart, mɣir AREBBI nneɣ? ■
33 Arebbi d lburj inu ijhed,
Netta issarxu abrid nnes nican.
34 Netta igga iḍaren inu am yenni n tudadin,
u yarra ayi ad beddeɣ x řegɛudi inu.
35 Netta isseřmed ifassen inu i umenɣi,
iɣaǧen inu ad meḥḍen ijj n řqews n nnḥas.
36 Cek tewcid ayi aseřqi n usenjem nnek,
u s uwaḍeɛ nnek tessemɣared ayi.
37 Aqa tegged ttasiɛ i uṣurif sadu inu,
uca ticeɛbin inu war meyyřent.
38 Necc ḍfareɣ řɛedyan inu uca teḥḥiɣ ten,
u war dd ttɛiqqibeɣ ař ten qḍiɣ.
39 Necc qḍiɣ ten u ssnuqqbeɣ ten ařami war kkaren ɛawed.
Nitni wḍan sadu iḍaren inu.
40 Cek tbeysed ayi s jjehd i umenɣi,
tarrid-dd inni ɣari dd-ikkaren ad aḍaren sadu inu.
41 Cek tewcid ayi timejjart n řɛedyan inu, n yinni d ayi iɛiffen,
u necc areddǧeɣ ten.
42 Nitni xezzaren, maca war din tuɣi amsenjem,
xeẓẓaren ɣar SIDI, maca Netta war xasen dd-yarri.
43 Necc weddareɣ ten am tɛejjajt n temmurt,
am ucař x ibriden ɛejneɣ xasen u řebzeɣ ten.
44 Cek tfekkid ayi zeg imcubbecen n řgens inu,
teḥḍid ayi d azeǧif n řegnus,
ijj n řgens war t ssineɣ, ad ayi isexxar.
45 Tarwa n ijj n ubarrani ssniɛmiřen sswaḍɛen ayi.
Mɣir řami isřa umezzuɣ waha, sřin-dd ɣari.
46 Tarwa n ijj n ubarrani fecřen,
waxxa nitni tuɣa ttwannḍen s lbarajat nsen.
47 Tudart i SIDI. Ad tᵉttwabarek teṣḍart inu.
Ejj ad yiři AREBBI n Teṣḍart n usenjem inu ad ittwasgeɛɛed ɣar ujenna!.
48 Arebbi wenni i xafi ittentaqamen
d wenni i d ayi itteggen řegnus sadu ufus inu,
49 wenni d ayi issuffuɣen zeg ufus n řɛedyan inu,
wah, Cek tessgeɛɛaded ayi tiwa n yinni d ayi ittḍaddan,
Cek tessenjamed ayi zeg weryaz n řexcunect.
50 X uyenni, SIDI, necc xseɣ ad Cek qadiɣ
u ad zehhdeɣ Isem nnek. ■
51 Igga isenjimen n ujeǧid nnes mɣaren
uca isscen tamexsiwt nnes icewwaren i umedhun nnes,
i Dawud u i zzariɛet nnes i řebda.”