1 Tuɣa din ijj n weryaz zi Ramatayim-Ṣufim, zeg idurar n Ifrayim, qqaren as Ilqana, mmis n Yaruḥam, mmis n Alihu, mmis n Tuḥu, mmis n Ṣuf, ijj n weryaz zi Ifrata. ^□  ■   2 Netta tuɣa ɣares tnayen n temɣarin. Icten qqaren as Ḥanna u tenneɣnit qqaren as Faninna. Faninna tuɣa ɣares iḥenjiren, Ḥanna maca tuɣa war ɣares bu iḥenjiren. 3 Aryaz-a tuɣa ittgeɛɛad-dd aseggʷas x useggʷas zi tendint nnes ḥima ad isjed u ad iqeddem tiɣarṣa i SIDI n řɛeskarat di Cilu. Dinni tuɣa tnayen n iḥenjiren n Ɛali, Ḥufni d Finaḥas. Nitni d ikehhanen n SIDI. ^■  

4 Deg wass řami dd-yiwi Ilqana taɣarṣt, imsar aqa iwca ict n tesɣart i temɣart nnes Faninna u i marra iḥenjiren nnes d tḥenjirin nnes, ^□   5 maca i Ḥanna iwca as tnayen n tseqqar, maɣar netta tuɣa ittexs Ḥanna, waxxa SIDI tuɣa ibelleɛ as řemřawet. 6 Uřa d taɣrimt nnes tuɣa tessehřec i-tt aṭṭas maḥend ad tt tesseḥřec, minzi SIDI tuɣa ibelleɛ as řemřawet.

7 Ammu i t-igga aseggʷas x useggʷas. Uca meřmi ma nettat tᵉttgeɛɛed ɣar Taddart n SIDI, tessehǧac i-tt Faninna u nettat tru, war tecci walu. 8 Xenni inna aryaz nnes Ilqana: “Ḥanna, mayemmi tᵉttrud, mayemmi war tᵉtted ca u mayemmi uř nnem icḍen? Ma necc war d am cniɣ x ɛecra n iḥenjiren?” ^■  

9 Deg ijj n wass, awarni umi tecca u teswa di Cilu, tekkar Ḥanna. Tuɣa akehhan Ɛali iqqim x ict n řkursi ɣar uɣezḍis n tewwart n Zzawect n SIDI.

10 Tuɣa řeɛmar nnes yarzeg, teẓẓuǧ ɣar SIDI uca tru aṭṭas.

11 Nettat tewca ijj n lwaɛd, tenna: “A, SIDI n řɛeskarat, mařa Cek texzared s tidett ɣar řemḥayen n tayya nnek u txarrṣed dayi u war tᵉttᵉttud tayya nnek u ad tewced i tayya nnek ijj n uḥenjir d awtem, xenni ad t wceɣ i SIDI min ɣa yekk iddar uca uřa d ijj n řmus war ittḥeffi i uzeǧif nnes.” ^□  ■  

12 Umi tekka aṭṭas tᵉttẓaǧa zzat i wudem n SIDI, imsar, aqa Ɛali iḥḍa aqemmum nnes.

13 Tuɣa Ḥanna tessiweř deg wuř nnes, iyencicen nnes ttenhezzan waha, maca tmijja nnes tuɣa war tᵉttwaseř. Ɛali ittɣiř as tescar.

14 Inna as Ɛali: “Mecḥař ɛad i ɣa teqqimed tescared? Kkes xam ssekra nnem!”

15 Ḥanna tarra-dd xas, tenna: “Lla, sidi, necc d ict n temɣart s yijj n buḥbeř icḍen. Necc war swiɣ binu uřa d ccrab, maca farrɣeɣ uř inu zzat i wudem n SIDI. ^■  

16 War ḥesseb ca tayya nnek d ict n tyeǧit i war tsekkʷi, maɣar ař řexxu ssiwřeɣ waha zi řhemm inu ameqqran u zi tiqqest n wuř inu.”

17 Ɛali yarra-dd xas, inna: “Uyur di řehna uca AREBBI n Israil ad am iwc min zzayes tᵉttared.”

18 Xenni nettat tenna: “Iři ad taf tayya nnek d aḥinni zzat i tiṭṭawin nnek!” Xenni tuyur temɣart abrid nnes, tecca u tuɣa aɣembub nnes war icḍin ɛad.

19 Ɣar tuffut n ṣṣbeḥ kkaren zic uca uḍaren zzat i wudem n SIDI uca ɛeqben ɣar taddart nsen di Rama. Tuɣa Ilqana iṭṭeṣ ak-d Ḥanna, tamɣart nnes, uca SIDI ixarreṣ dayes.

20 Umi ɛdun wussan awarni řami teksi Ḥanna s ddeyset, turuw-dd ijj n uḥenjir. Tegga as Camwil umi nettat tenna: “Maɣar necc ttareɣ t zi SIDI.” 21 Uca aryaz nni, Ilqana, igeɛɛed ɛawed ak-d marra inni n taddart nnes, ḥima ad yawi taɣarṣt n useggʷas d tɣarṣt nnes n lwaɛd i SIDI. 22 Maca Ḥanna war kidsen tgiɛɛid ca, maca tenna i weryaz nnes: “Xmi d as i ɣa kkseɣ uṭṭuḍ i useymi, xenni ad t-i-dd awyeɣ din, u ad ittwaẓar uḥenjir zzat i wudem n SIDI u netta ad iqqim dinni i řebda.” 23 Aryaz nnes, Ilqana, inna as: “Egg min tᵉttwařid mliḥ di tiṭṭawin nnem. Qqim da di taddart ɣares ař d as i ɣa tekksed uṭṭuḍ. Iři ad iqfeř SIDI awař nnes!” Ammu i teqqim temɣart di taddart uca tessuḍeḍ aḥenjir nnes ɣares ařami i d as tekkes uḍuḍ. 24 Awarni řami i d as tekkes uṭṭuḍ, tiwyi t akides ak-d třata n iyenduzen d ijj n ifa n waren d ict n txancet n binu. Nettat tiwyi t ɣar Taddart n SIDI di Cilu. Tuɣa-t aḥenjir ɛad d ameẓyan. ^■   25 Nitni ɣarṣen i uyenduz uca iwyen aḥenjir ɣar Ɛali. 26 Nettat tenna: “A, sidi inu, s tidett am iddar řeɛmar nnek, a sidi inu, necc d tamɣart nni tuɣa i da ibedden ɣar uɣezdis nnek, ḥima ad ẓẓaǧeɣ ɣar SIDI. 27 Necc ttareɣ aḥenjir-a u SIDI isřa i tutra inu nni zzayes ttareɣ. 28 S uyenni aqa sellmeɣ t i SIDI marra ussan min ɣa ikk iddar. Aqa ittwattar zi SIDI.” Uca netta yuḍar din zzat i wudem n SIDI.