Raɛut
Alimalik d Naɛumi
1
1 Deg wussan i di qeṭṭan řquḍat řeḥkamat di temmurt, imsar ijj n řaẓ di temmurt. S uyenni iffeɣ ijj n weryaz zi Bayt-Laḥm di Yahudiyya ḥima ad izdeɣ d abarrani deg iyyaren n Mu’ab, netta d temɣart nnes d tnayen n iḥenjiren nnes akides. 2 Aryaz ttřaɣan as Alimalik, tamɣart nnes ttřaɣan as Naɛumi, d tnayen n iḥenjiren nnes ttřaɣan asen Maḥlun d Kilyun, nitni tuɣa aten d ayt n Ifrata zi Bayt-Laḥm di Yahudiyya. Nitni iwḍen ɣar iyyaren n Mu’ab, qqimen dinni. 3 Almalik, aryaz n Naɛumi, immut. Teqqim nettat ak-d tnayen n iḥenjiren nnes. 4 Ina iwyen timɣarin n Mu’ab, isem n ict qqaren as Ɛurfa u isem n tenneɣni Raɛut, uca qqiment dinni řqedd n ɛřaḥař ɛecra n iseggʷusa. 5 U tnayen nni, Maḥlun d Kilyun, mmuten řa d nitni. Teqqim temɣart weḥḥdes, břa tnayen n iḥenjiren nnes u břa aryaz nnes. □ Aɛqab n Naɛumi ak-d Raɛut
6 Uca teɛdeř ixef nnes ak-d tesřatin nnes, ḥima ad dd-tedweř zeg iyyaren n Mu’ab, maɣar nettat tuɣa tesřa aqa SIDI yarzef i řgens nnes uca iwca asen aɣrum. 7 S uyenni teffeɣ nettat ak-d tnayen n tesřatin nnes zeg wemcan mani tuɣa teqqim marra řweqt nni. Nitenti ruḥent deg webrid n arrwaḥ ɣar temmurt n Yahudiyya. 8 Tenna Naɛumi i tnayen n tesřatin nnes: “Areggʷḥent-i-dd, dewřent-i-dd, kuř icten ɣar taddart n yemmas! SIDI ad akent iwc tamexsiwt nnes icewwaren, am mammec tt teggint deg imettan u dayi. 9 SIDI ad yejj ad tafent arraḥet, kuř icten di taddart n weryaz nnes!” Xenni tessudem i-tent uca nitenti ssgeɛɛdent tmijja nsent uca sɣuyyent,
10 nnant as: “Neccin ggur ad dd-nedweř nican akidem ɣar řgens nnem!”
11 Naɛumi tenna: “Ɛeqbent-i-dd, a yessi! Mayemmi texsent akidi traḥent? Ma ɣari deg uɛeddis inu ɛad iḥenjiren nni izemmaren ad dewřen d iryazen i kennint?
12 Ɛeqbent-i-dd, a yessi inu! Ruḥent, minzi necc aqa wsareɣ maḥend ad ɣari yiři ɛad weryaz. Waxxa nniɣ: ‘Necc ɣari ɛad asitem!’, wah, iři ǧiřet-a ad iřiɣ i yijj n weryaz, wah, ad arweɣ iḥenjiren,
13 ma texsent ad trajant ař ɣa mɣaren, ma texsent ad tmenɛent ixef nkent maḥend ad tdewřent i yijj n weryaz? Lla, a yessi! Aqa ameddur inu iffeɣ d amerzag xakent aṭṭas, maɣar iffeɣ-dd ufus n SIDI ḍidd ayi.”
14 Xenni ssgeɛɛdent timijjawin nsent uca arnint ɛad deg iɣuyyan uca Ɛurfa tessudem lallas, maca Raɛut teqqim teřṣeq dayes.
15 Tenna: “Xzar, tasřift nnem teddakkʷar ɣar řgens nnes u ɣar irebbiten nnes. Dweř, teḍfared tasřift nnem!”
16 Raɛut tarra-dd xas: “War xafi tziyyar ḥima ad dayem semḥeɣ uca ad dd-dewřeɣ awarni i weɛrur nnem, minzi mani i ɣa tuyured cem, din i ɣa uyureɣ uřa d necc, d mani i ɣa tessensed cem, din i ɣa ssenseɣ uřa d necc, řgens nnem d řgens inu, d AREBBI nnem d AREBBI inu.
17 Mani ma i ɣa temmted, din i ɣa mmteɣ uřa d necc u din i ɣa ttwaneḍřeɣ uřa d necc. Ad zzayi igg SIDI ammu u ad dayes yarni, minzi mɣir řmewt i d ayi ɣa ibḍan xam!”
18 Ařami teẓra Naɛumi belli nettat tegga x tecři, war teqqim tessawař ɛad akides.
19 Ammu i yuyurent s tnayen idsent ařami iwḍent ɣar Bayt-Laḥm. Umi iwḍent ɣar Baytlaḥm, imsar, marra tandint tenneḥweř di ṭṭweɛ nsent uca nnant temɣarin: “Ma d ta d Naɛumi?” 20 Maca nettat tarra xasen tenna: “War d ayi ttřaɣant ‘Naɛumi’ ssa d tsawent, maca řaɣant ayi: ‘Mara’, maɣar Amzemmar x kuřci igga dayi tarzugi d tameqqrant.□ 21 Ffɣeɣ ccureɣ maca SIDI ijja ayi ad dd-arekkʷḥeɣ s ifassen xwan. Mayemmi i d ayi ttřaɣant ɛad Naɛumi umi xafi iched SIDI u Amzemmar x kuřci igga ayi min iǧan d aɛeffan?” 22 Ammu dd-teɛqeb Naɛumi ak-d Raɛut, Tamu’abect, tasřift nnes nni dd-idewřen akides zeg iyyaren n Mu’ab uca iwḍent ɣar Baytl-Laḥm ɣar umezwaru n tmeyra n imendi. □