1 Awarni i řmewt n Yacuwa, imsar aqa ayt n Israil sseqsan SIDI, nnan: “Man wen zzayneɣ i ɣa ikkaren d amezwaru ad igeɛɛed ad imneɣ ak-d Ikenɛaniyyen?” ^■   2 Yarra-dd SIDI: “Yahuda ad igeɛɛed d amezwaru. Xzar, Necc wciɣ as tammurt deg ufus nnes.” 3 Uca inna Yahuda i umas Cimɛun: “Gaɛɛed akidi di temmurt n tqedduḥt n řeɛbar inu uca ejj aneɣ ad nemneɣ ak-d Ikenɛaniyyen, xenni necc ad kik geɛɛdeɣ di temmurt n tqedduḥt nnek.” Uca yuyur akides Cimɛun.

4 Igeɛɛed Yahuda uca SIDI iɛarn Ikenɛaniyyen d Ifiriziyyen deg ufus nsen uca ɣeřben xasen ɣar Bazaq, ɛecra-ařaf n yiryazen. 5 Nitni ufin Aduni-Bazaq di Bazaq uca mmenɣen akides u nitni ɣeřben x Ikenɛaniyyen d Ifiriziyyen. 6 Maca Aduni-Bazaq yarweř uca nitni ḍfaren t uca ṭṭfen t uca qessen as imzawen d tfednin timeqqranin zeg ifassen nnes u zeg iḍaren nnes. 7 Xenni inna Aduni-Bazaq: “Sebɛin n ijeǧiden ttwaqessen asen imzawen d tfednin, tuɣa řeqqḍen iřeqqʷaz sadu ṭṭabřa inu. Mammec i kidsen ggiɣ, ammu i d ayi ɣa ixeǧeṣ AREBBI!” Iwyen t ɣar Urcalim uca netta immut dinni.

8 Ayt n Yahuda mmenɣen ak-d Urcalim uca ṭṭfen tt, wtin tt s řeqḍeɛ n ssif uca qqeden tandint s tmessi.

9 Awarni as hwan ayt n Yahuda ḥima ad mmenɣen ak-d Ikenɛaniyyen, inni izeddɣen di Temmurt n Idurar, di Temmurt n Ljanub u di Temmurt Iwaṭan. ^■  

10 Iffeɣ Yahuda ɣar Ikenɛaniyyen i tuɣa izeddɣen di Ḥabrun. Isem n Ḥabrun tuɣa zic qqaren as Qaryat-Arbaɛ. Nitni ɣeřben x Cicay d Aximan d Talmay. ^■  

11 Ssenni iffeɣ ɣar imezdaɣ n Dabir. Isem n Dabir tuɣa zic qqaren as Qaryat-Safar. ^■  

12 Inna Kalib: “Wenni i ɣa iwten Qaryat-Safar ad tt iṭṭef, ad as wceɣ yeǧi Axsa d tamɣart.”

13 Ɛutniyil, mmis n Qinaz, umas ameẓyan n Kalib, iṭṭef tt. Uca Kalib iwca as yeǧis Axsa d tamɣart.

14 Imsar umi ɣares dd-tusa nettat, tɛarn i-t s tutra x ijj n yeyyar n babas. Uca teḍra x weɣyuř. Isseqsa tt Kalib: “Min cem yuɣin?”

15 Nettat tarra-dd xas: “Ewc ayi ict n lbaraka, minzi tewcid ayi ict n treqqiɛt n temmurt ɣar ljanub. Ttzawgeɣ, ewc ayi uřa d řɛunṣarat!” Uca iwca as Kalib řɛunṣarat n nej d řɛunṣarat n wadday.

16 Gaɛɛden ayt n Uqini, wenni d aḍḍegʷař n Musa, ak-d ayt n Yahuda zi Tendint n Tcejjura n Tini ɣar řexřa n Yahuda nni iǧan di Temmurt n Ljanub ɣar Ɛarad uca ffɣen, zedɣen ak-d řgens. ^□  

17 Iruḥ Yahuda ak-d umas Cimɛun uca ɣeřben nitni Ikenɛaniyyen inni i tuɣa izeddɣen di Ṣafat, ḥarrmen ten qaɛ uca teḥḥan ten uca ggin as i tendint nni Ḥurma.

18 Iṭṭef Yahuda uřa d Ɣazza ak-d temmurt nnes d Acqalun ak-d temmurt nnes d Ɛaqrun ak-d temmurt nnes.

19 SIDI tuɣa-t ak-d Yahuda ařami yuẓẓeř x marra imezdaɣ n Temmurt n Idurar, maca imezdaɣ n řewda n teɣzurt war izemmar ad xasen yaẓẓeř zi tesɣart nsen, minzi nitni tuɣa ɣarsen ikarruten n umenɣi n wuzzař. 20 I Kalib wcin as Ḥabrun, am mammec tuɣa issiweř Musa, uca netta yuẓẓeř ssenni x třata n iḥenjiren n Ɛanaq.^■  

21 Ayt n Binyamin war zemmaren ad aẓẓřen x Iyabusiyyen, inni izeddɣen di Urcalim. Ammu i qqimen Iyabusiyyen zeddɣen ɣar ayt n Binyamin di Urcalim, ař ass-a.

22 Taddart n Yusuf tgeɛɛed ɣar Bayt-Il uca SIDI tuɣa-t akidsen. 23 Tuyur taddart n Yusuf ḥima ad tbergeg ɣar Bayt-Il. Isem n tendint tuɣa zic qqaren as Luz. ^■   24 Umi ẓrin iɛessasen ijj n weryaz iffeɣ-dd zi tendint, nnan as: “Scen aneɣ manis nzemmar ad nadef di tendint, xenni neccin ad kik negg tamexsiwt icewwaren.” 25 Netta isscen asen tawwart n wadaf ɣar tendint uca nitni wtin tandint s ict n tecti s řeqḍeɛ n ssif, maca aryaz nni jjin t ad yuyur ak-d marra raǧ nnes. 26 Uca yuyur weryaz ɣar temmurt n Iḥittiyyen uca ibna ict n tendint, igga as isem Luz. Wa d isem nnes ař ass-a.

27 Manassa war izemmar ad yaẓẓeř x imezdaɣ n Bayt-Can d tneddam i ɣares dd-iqqnen, řa x imezdaɣ n Taɛnak ak-d tneddam nnes řa x imezdaɣ n Dur d tneddam nnes řa x imezdaɣ n Yiblaɛam d tneddam nnes uřa x imezdaɣ n Majiddu d tneddam nnes. Tuɣa Ikenɛaniyyen ɛewwřen ad qqimen zeddɣen di temmurt nni. ^■   28 Tuɣa Israil idweř ijhed ařami igga ljizya x Ikenɛaniyyen, maca war zemmaren ad xasen aẓẓřen marra.

29 Uřa d Ifrayim war izemmar ad yaẓẓeř x Ikenɛaniyyen i tuɣa izeddɣen di Jazar u qqimen Ikenɛaniyyen zeddɣen di řwest nsen di Jazar. ^■  

30 Zabulun war izemmar ad yaẓẓeř x imezdaɣ n Qiṭrun d imezdaɣ n Nahalul u qqimen Ikenɛaniyyen zeddɣen di řwest nsen u tᵉttwagg xasen ljizya.

31 Acir war izemmar ad yaẓẓeř x imezdaɣ n Ɛakku uřa x imezdaɣ n Ṣidun d Aḥlab d Akzib d Halba d Afiq d Raḥub. 32 Iciriyyen zedɣen di řwest n Ikenɛaniyyen, inni d imezdaɣ n temmurt, minzi nitni war zemmaren ad xasen aẓẓřen. ^□  

33 Naftali war izemmar ad yaẓẓeř x imezdaɣ n Bayt-Cams d imezdaɣ n Bayt-Ɛanat uca tuɣa izeddeɣ di řwest n Ikenɛaniyyen, inni d imezdaɣ n temmurt. Tettwagg xasen ljizya x imezdaɣ n Bayt-Cams d Bayt-Ɛanat.

34 Imuriyyen ḥṣaren ayt n Dan ɣar idurar, minzi war ten jjin ad hwan ɣar řewḍa n teɣzurt. 35 Tuɣa Imuriyyen ɛewwřen ad qqimen zeddɣen deg idurar n Ḥaras, di Ayalun u di Caɛalbim, maca afus n taddart n Yusuf tuɣa izeyyar xasen aṭṭas ařami xasen tᵉttwagg ljizya. 36 Tuɣa aymir n Imuriyyen zi Tsunta n Tɣarḍmiwin, zi jjarf uca ssenni ɣar sennej.