1 Yacuwa issmun marra tiqebbař n Israil di Cakim uca iřaɣa i imɣaren n Israil d izeǧifen nsen d řquḍat nsen d iweqqafen nsen uca nitni ssbedden ixef nsen zzat i wudem n AREBBI. 2 Xenni inna Yacuwa i marra řgens: “Ammu i iqqar SIDI, AREBBI n Israil: ‘Řejdud nwem zedɣen zi cḥař uya x ujemmaḍ n yeɣẓar n Lfuraṭ, Taraḥ, babas n Ibrahim d babas n Naḥur, u nitni tuɣa ttsexxaren i irebbiten nneɣni. ^■   3 Xenni iwyeɣ-dd babatwem Ibrahim zeg uɣirin i yeɣzar n Lfuraṭ u jjiɣ t yuyur di marra temmurt n Kenɛan. Necc arniɣ i zzariɛet nnes u wciɣ as Isḥaq. ^■   4 I Isḥaq wciɣ Yaɛqub d Ɛisu, u i Ɛisu wciɣ tammurt n idurar n Saɛir d tasɣart, maca Yaɛqub d iḥenjiren nnes hwan ɣar Miṣra. ^■   5 Xenni ssekkeɣ Musa d Harun uca wtiɣ Miṣra am mammec t ggiɣ di řwest nnes u awarni as ssuffɣeɣ-dd kenniw. ^■   6 Necc ssuffɣeɣ-dd ibabaten nwem zi Miṣra u kenniw tiwḍem-dd ɣar řebḥar u Imiṣriyyen ḍfaren ibabaten nwem s ikarruten d imnayen ař Řebḥar n Telga. ^■   7 Uca sɣuyyen ɣar SIDI u Netta igga taǧest jar awem d Imiṣriyyen uca ijja řebḥar issfeyyeḍ xasen ařami ten idřa. S tiṭṭawin nwem, teẓrim min ggiɣ di Miṣra. Awarni aya tuɣa tzeddɣem aṭṭas n wussan di řexřa. 8 Necc iwyeɣ-dd kenniw ɣar temmurt n Imuriyyen i izeddɣen aɣirin i L'Urdun. Nitni mmenɣen akidwem, maca Necc ggiɣ ten deg ufus nwem u kenniw tᵉṭṭfem tammurt nsen u Necc qḍiɣ xasen zzat i wudem nwem. ^■   9 Xenni ikkar Balak, mmis n Saffur, ajeǧid n Mu’ab, uca imneɣ ak-d Israil. Netta issekk ḥima ad řaɣan i Bilɛam, mmis n Baɛur, maḥend ad kenniw inɛeř.

10 Maca Necc war xseɣ ad sřeɣ i Balɛam u s uya netta ibarek i kenniw aṭṭas u Necc ssnejmeɣ-dd kenniw zeg ufus nnes.

11 Xenni teẓwam L'Urdun, tusim-dd ɣar Ariḥa. Imezdaɣ n Ariḥa, mmenɣen akidwem, Imuriyyen d Ifiriziyyen d Ikenɛaniyyen d Iḥittiyyen d Ijirjasiyyen d Iḥiwiyyen d Iyabusiyyen uca wciɣ awem ten deg ufus nwem. ^■  

12 Necc ssekkeɣ irezzan iḍarɣařen uca uẓẓřen xasen zzatwem, x tnayen n ijeǧiden nni, zzat i wudem nwem. D man aya war iǧi s ssif nwem uřa s řqews nwem. ^■  

13 Necc wciɣ awem tammurt i x war tarebrem u tineddam nni war tebnim ḥima ad tzeddɣem daysent, uca teccim zi tzayarin d izemmuren i tuɣa war teẓẓum. ^■  

14 Xenni řexxu, ggʷedem SIDI uca sexxarem as s řekmaret d řaman. Nḍarem irebbiten nni umi sexxaren ibabaten nwem aɣirin i yeɣzar n Lfuraṭ u di Miṣra, uca sexxarem i SIDI.

15 Maca mařa war dd-tusi x tiṭṭawin nwem maḥend ad tsexxarem i SIDI, xenni ixḍarem ass-a i man wen umi ɣa tsexxarem, i irebbiten nni umi sexxaren ibabaten nwem aɣirin i yeɣzar n Lfuraṭ, niɣ i irebbiten n Imuriyyen nni di temmurt nsen tzeddɣem. Necc maca d taddart inu, neccin ad nsexxar i SIDI!’ ”

16 Xenni inna řgens: “Man aya iggʷej aneɣ, aqa neccin ad nejj SIDI ad nexdem irebbiten nneɣni.

17 Maɣar SIDI d AREBBI nneɣ d Netta i d aneɣ-dd issgeɛɛden zi temmurt n Miṣra, neccin d ibabaten nneɣ, zi taddart n tesmuɣi u Netta d wenni i iggin řeɛřamat timeqqranin zzat i tiṭṭawin nneɣ u Netta issřeqqa xaneɣ di marra abrid i nuyur u jar marra řegnus i umi ncuqq tammurt nsen.

18 SIDI yuẓẓeř x marra řegnus zzat i wudem nneɣ, uřa d ayt n Imuriyyen, imezdaɣ n temmurt. Uřa d neccin ad nsexxar i SIDI, maɣar Netta d AREBBI nneɣ.”

19 Xenni inna Yacuwa i řgens: “Kenniw war tzemmarem ad tsexxarem i SIDI, maɣar Netta d AREBBI Amqeddes aṭṭas u Netta d ijj n Arebbi ittasmen. Netta war d awem iɣeffar ixeṭṭan nwem d ddnub nwem. 20 Mařa kenniw tejjim SIDI, ad tsexxarem i irebbiten nneɣni, xenni Netta ad xawem inneqřeb, ad d awem igg řɣar uca ad kenniw iqḍa, awarni řami Netta igga akidwem awrud taṣebḥant.” ^■   21 Xenni inna řgens i Yacuwa: “Lla, minzi neccin ad nsexxar i SIDI.” 22 Inna Yacuwa i řgens: “Kenniw d řechud x ixef nwem, aqa kenniw tfarzem SIDI ḥima ad as tsexxarem.” Nitni nnan “Neccin d řechud!” 23 “Xenni řexxu, nḍarem irebbiten iɣriben nni iǧan di řwest nwem u tarrem uřawen nwem ɣar SIDI, AREBBI n Israil!” 24 Inna řgens i Yacuwa: “Neccin ad nsexxar i SIDI, AREBBI nneɣ, uca ad nseř i tmijja nnes.” 25 Deg wass nni igga Yacuwa ijj n řɛahd ak-d řgens uca igga asen di Cakim tawṣeyyet d lfariḍa. ^■   26 Yura Yacuwa awařen-a deg wedlis ittwannḍen n Ccariɛa n SIDI uca netta iksi ijj n weẓru d ameqqran uca issbedd i-t di Cakim sadu ict n tcejjart n yigg nni ibedden ɣar Zzawect Iqeddsen n SIDI. 27 Inna Yacuwa i marra řgens: “Xzarem, aẓru aya ad xaneɣ yiři d acehhad, minzi netta isřa marra i wawařen n SIDI nni kidneɣ issiweř u netta ad yiři d acehhad i kenniw ḥima war ttɣeccam AREBBI nwem.” 28 Xenni yarxu Yacuwa i řgens, kuř aryaz iruḥ ɣar tesɣart nnes.

29 Awarni i tmesřayin-a imsar, belli Yacuwa, mmis n Nun, amsexxar n SIDI, immut, netta d ijj n mmis n bnadem ɣares mya u-ɛecra n iseggʷusa. 30 Neḍřen t di temmurt n tesɣart nnes di Timna-Saraḥ nni iǧan x idurar n Ifrayim, ɣar ccamal n wedrar n Jaɛac. ^■   31 Israil isexxar i SIDI marra ussan n Yacuwa d marra ussan n imɣaren nni iqqimen ddaren ict n řweqt d azirar awarni i Yacuwa u ssnen marra řxedmet i tuɣa igga SIDI i Israil. 32 Ixsan n Yusuf i tuɣa dd-iwyen akidsen ayt n Israil zi Miṣra, neḍřen ten di Cakim di tkirat n yeyyar i tuɣa isɣa Yaɛqub x ayt n Ḥamur, babas n Cakim, s mya n tepyisin n nnuqart uca tedweř d tasɣart n ayt n Yusuf. ^■   33 Uřa d Aliɛazar, mmis n Harun, immut uca neḍřen t di tewrirt n mmis n Finaḥas, tawrirt i d as immewcen i Finaḥas deg idurar n Ifrayim.