1 Ina d awařen nni issiweř Musa i marra Israil x ujemmaḍ n L'Urdun, di řexřa, di Řewḍa arendad n Ṣuf, jar Faran d Tufal d Laban d Ḥaḍarut d Di-Dahab. 2 Zi Ḥurib x webrid n idurar n Saɛir ař Qadac-Barniɛ aqa-tt d ict n ticti n ḥiṭac n wussan. 3 Imsar deg useggʷas wiss arebɛin, deg uyur wiss ḥiṭac, deg wass amezwaru n uyur, Musa issiweř ak-d ayt n Israil ɛlaḥsab marra min x ten iweṣṣa SIDI, 4 awarni umi iɣřeb di Idraɛi x Siḥun, ajeǧid n Imuriyyen wenni tuɣa izeddɣen di Ḥacbun, u x Ɛuj, ajeǧid n Bacan wenni tuɣa izeddɣen di Ɛactarut. ^■   5 X ujemmaḍ n L'Urdun, di temmurt n Mu’ab, ibda Musa ad ifessar Ccariɛa-ya, inna:

6 “SIDI, AREBBI nneɣ, issiweř akidneɣ ɣar Ḥurib, inna: ‘Kenniw teqqimen aṭṭas ɣar wedrar-a, aqa d aṭṭas. 7 Dewřem, kksem iqiḍan nwem uca adfem ɣar idurar n Imuriyyen u ɣar marra imucan yudsen di Řewḍa, di Temmurt n Idurar, di Temmurt Iwaṭan, di Temmurt n Ljanub u ɣar tma n řebḥar, tammurt n Ikenɛaniyyen, d Lubnan ař iɣzar ameqqran, iɣzar n Lfuraṭ. 8 Xzar, Necc wciɣ awem tammurt zzat i wudem nwem. Adfem, tᵉṭṭfem tammurt nni x ijjuǧ SIDI ad tt iwc i ibabaten nwem, i Ibrahim, Isḥaq d Yaɛqub, u i zzariɛet nsen awarni asen.’ ^■   9 Di řweqt nni ssiwřeɣ necc akidwem, nniɣ: ‘Necc waha war zemmareɣ ad arbuɣ amnus xawem. ^■  

10 SIDI, AREBBI nwem, igga kenniw d aṭṭas, uca xzar, kenniw řexxu d aṭṭas amecnaw itran n ujenna.

11 Ad taf ad daywem immarni SIDI, AREBBI nwem, am mammec kenniw teǧam řexxu ɛad ařef n twařawin, uca ad taf ad kenniw ibarek am mammec tuɣa ɣarwem dd-issiweř.

12 Mammec zemmareɣ necc weḥḥdi waha ad arbuɣ iḥessifen nwem d ḍḍquřat nwem d imcubbecen nwem?

13 Ksim zi jar teqbič nwem iryazen imiɣisen, ifehhmen, inni ittwassnen icnan, ḥima ad ten ggeɣ d izeǧifen xawem.’

14 Xenni kenniw tarrim-dd xafi uca tennam ayi: ‘Awař i tessiwřed, aqa iban-dd icna ḥima ad t negg.’

15 Uca ksiɣ izeǧifen n teqbič nwem, iryazen imiɣisen, ifehhmen inni ittwassnen icnan, uca ggiɣ ten d izeǧifen xawem, am imeqqranen x ařef, imeqqranen x mya, imeqqranen x xemsin d imeqqranen x ɛecra, u am iweqqafen x tqebbař nwem.

16 Di řweqt nni umureɣ i řquḍat nwem uca nniɣ: ‘Sřem ɣar aytmatwem uca ḥekmem s yijj n řḥukm iseggden jar weryaz d umas d ubarrani nni kides iǧan. ^□  ■  

17 War tteggem s wudmawen di řeḥkam. Ad tesřem ɣar umeẓyan d umeqqran. War teggʷdem zeg wudem n ca n yijjen, minzi řeḥkam ɣar AREBBI. Tamesřact nni tewɛar xawem, awyem tt-i-dd ɣari uca necc ad tt sřeɣ.’ ^■  

18 Ammu i kenniw umureɣ di řweqt nni marra timesřayin nni xawem ad tent teggem.

19 Xenni nefsi iqiḍan nneɣ uca neffeɣ zi Ḥurib uca neẓwa marra řexřa ameqqran issaggʷaden nni teẓrim, nuyur deg webrid n idurar n Imuriyyen am mammec d aneɣ yumur SIDI, AREBBI nneɣ, uca niweḍ ɣar Qadac-Barniɛ. 20 Xenni nniɣ awem: ‘Aqa tiwḍem ɣar idurar n Imuriyyen nni d aneɣ i ɣa iwc SIDI, AREBBI nneɣ. 21 Xzar, SIDI, AREBBI nnek, aqa igga tammurt zzat i wudem nnek. Gaɛɛed, ṭṭef i-tt, am mammec ɣarek issiweř SIDI, AREBBI n ibabaten nwem. War tteggʷed u war ttejji ad iɛgez wuř nnek.’ 22 Tusim-dd ɣari marra kenniw, tennam: ‘Ejj aneɣ ad nessekk iryazen zzat i wudem nneɣ ḥima ad bergagen tammurt maḥend ad aneɣ xebbaren x man abrid i zi ɣa ngeɛɛed di tammurt u mammec ǧant tneddam i ɣar i dd ɣa nas.’ 23 Tuɣa awař-a d lemliḥ i necc uca ksiɣ tenɛac n yeryazen zi řwest nwem, zi kuř taqbič ijj n weryaz. ^■   24 Nnḍen nitni uca uyuren x webrid ɣar idurar uca usin-dd ɣar teɣzurt n Ickul uca bergagen tt. ^■   25 Ksin s ifassen nsen řɣiǧet n temmurt uca hwan-dd ɣarneɣ. Iwyen aneɣ-dd řexbar, nnan: ‘Tammurt i d aneɣ ɣa iwc SIDI, AREBBI nneɣ, teṣbeḥ.’

26 Qaɛ amenni, war texsem ad tgeɛɛdem uca tɣewwɣem ḍidd i řumur n SIDI, AREBBI nwem. ^■   27 Uca tnedqem-dd zeg iqiḍan nwem, tennam: ‘Deg weqřab nnes xaneɣ, aqa issuffeɣ aneɣ SIDI zi temmurt n Miṣra maḥend ad aneɣ yarr ɣar ifassen n Imuriyyen maḥend ad aneɣ yareddeǧ. ^□   28 Mani xenni i ɣa ngeɛɛed? Aytmatneɣ ssfessyen uřawen nneɣ, nnan: Řgens imɣar uca zzugaren xaneɣ. Tineddam mɣarent uca ttwafaryent ař ajenna uca neẓra din uřa d ayt n Ɛanaq.’ ^■   29 Necc nniɣ awem: ‘War tarjijem ca u war zzaysen tteggʷdem. 30 SIDI, AREBBI nwem, wenni igguren zzatwem, ad imneɣ di ṭṭweɛ nwem, ammu nican am mammec igga zzat i tiṭṭawin nwem di ṭṭweɛ nwem di Miṣra 31 uřa di rexřa, mani teẓrid mammec tuɣa cek yarebbu SIDI, AREBBI nnek, marra abrid nni tuyured, amecnaw ijj n weryaz yarebbun mmis, ař mani dd-tiwḍem ɣar wemcan-a.’ 32 Maca kenniw ɛad war tuminem ca s wawař-a di SIDI, AREBBI nwem, 33 wenni tuɣa igguren zzat i wudem nwem deg webrid ḥima ad awem yarzu mani i ɣa tewtem iqiḍan nwem, u wenni tuɣa igguren, s ǧiřet di tmessi, maḥend ad awem isscen abrid mani kenniw ittxeṣṣa ad tuyurem, u s uziř deg ijj n useynu. ^■   34 SIDI isřa řḥess n wawařen nwem uca ijja aɣḍab nnes ad idduqqez, ijjuǧ, inna: 35 ‘Uřa d ijj zeg yeryazen-a n jjiř-a aɛeffan war iẓarr tammurt icnan nni x jjuǧeɣ ad tt wceɣ i ibabaten nwem, ^■   36 mɣir Kalib, mmis n Yafunni, netta ad tt iẓar uca i netta u i iḥenjiren nnes ad wceɣ tammurt nni x igga iḍaren nnes, minzi netta tuɣa iḍeffar SIDI nican.’ 37 Isɛar xafi SIDI di ssibbet nwem, inna: ‘Uřa d cek war dayes ttidfed ca! ^■   38 Yacuwa, mmis n Nun, wenni ibedden zzat i wudem nnek, ad dayes yadef. Sjehd i-t, minzi netta d wenni tt i ɣa iwcen d řwart i Israil. 39 Uca tarwa nwem i x tennam: ‘Ad dewřen d teymart!’, iḥenjiren nwem nni war ssinen ɛad řxar niɣ řɣar, nitni ad ɣares adfen uca Necc ad asen tt-i-dd-wceɣ uca nitni ad tt warten. 40 Maca kenniw ad dd-tdewřem, ad tekksem iqiḍan nwem ssa uca ad tuyurem ɣar řexřa ɣar Řebḥar n Telga.’ 41 Kenniw tarrim-dd, tennam ayi: ‘Aqa nexḍa ak-d SIDI. Ad ngeɛɛed uca ad nemneɣ qaɛ am mammec d aneɣ yumur SIDI, AREBBI nneɣ.’ Xenni tbeysem, kuř ijj s řesnaḥ nnes n garra u kenniw s zzɛamet nwem tbeddem ad tgeɛɛdem ɣar wedrar. 42 Xenni inna ayi SIDI: ‘Ini asen: War ttgeɛɛdem, war ttmenɣim, minzi Necc war ǧiɣ di řwest nwem, ḥima war txeṣṣarem zzat i wudem n řɛedyan nwem.’ 43 Ammu i kiwem ssiwřeɣ, maca kenniw war ttesřim uca tɣewwɣem ḍidd i řumur n SIDI uca teggim s tɣennant, tgeɛɛdem ɣar idurar. 44 Uca ffɣen Imuriyyen nni tuɣa izeddɣen deg idurar uca uẓẓřen xawem, am t tteggent tzizwa, uca řebzen kenniw di Ṣaɛir ař Ḥurma. 45 Tdewřem-dd, tessɣuyem zzat i wudem n SIDI. SIDI war isři i tmijja nwem, war d awem iwci amezzuɣ, 46 uca teqqimem di Qadac ijj n řweqt d azirar, anect n řweqt i dinni teqqimem.”