2
1 “Xenni nedweř-dd uca nefsi iqiḍan uca nuyur ɣar řexřa, deg webrid ɣar Řebḥar n Telga, am mammec d ayi inna SIDI uca nenneḍ aṭṭas n wussan i wedrar n Saɛir. 2 Xenni issiweř SIDI akidi, inna: 3 ‘Aṭṭas i tennḍem i wedrar-a, aqa cfa. Arrem azeǧif ɣar ccamal 4 uca umur řgens, ini: Ad tekkem kenniw x weymir n aytmatwem, ayt n Ɛisu, inni izeddɣen di Saɛir. Nitni ad zzaywem ggʷeden uca kenniw ittxeṣṣa ad teḥḍam ixef nwem aṭṭas. □ 5 War kisen ttemmɛařam, minzi war d awem tticeɣ uřa d ijj n cbar zi temmurt nsen, minzi Necc wciɣ idurar n Saɛir d řwart i Ɛisu. □ ■ 6 Ad xasen tesɣem řeɛweč s tmenyat n nnuqart ḥima ad tzemmarem ad teccem u ad xasen tesɣem ɛawed aman s tmenyat n nnuqart ḥima ad teswem.’ 7 Minzi SIDI, AREBBI nnek, tuɣa ibarek i cek di marra řxedmet n ifassen nnek. Netta issen ticři nnek di řexřa aya ameqqran. Marra arebɛin n iseggʷusa aya tuɣa SIDI, AREBBI nnek, akidek uca war d ac ixeṣṣi walu. 8 Umi nekka x yaytmatneɣ, ayt n Ɛisu nni tuɣa izeddɣen di Saɛir, x webrid n Řewḍa n Iylat d Ɛiṣyun-Jabir, nedweř-dd uca nekka x webrid n řexřa n Mu’ab. 9 Xenni issiweř SIDI akidi: ‘War ssaggʷad Mu’ab u war kisen ttmenɣam, minzi Necc war d awem tticeɣ řwart zi temmurt nsen, minzi Necc wciɣ Ɛar d řwart i ayt n Luṭ.’
10 Tuɣa zeddɣen din Imiyyen, ijj n řgens d ameqqran d aṭṭas uca nitni d iziraren amecnaw Iɛanaqiyyen.
11 Nitni ttwaḥesben d Irafawiyyen amecnaw Iɛanaqiyyen uca Imu’abiyyen qqaren as Imiyyen. □
12 Řa d Ixuriyyen tuɣa zeddɣen qbeř di Saɛir, maca ayt n Ɛisu ksin řwart nsen uca teḥḥan ten zzat i wudem nsen uca zedɣen din deg wemcan nsen, amecnaw mammec tuɣa ittegg Israil s temmurt n řwart nnes nni d asen iwca SIDI.
13 ‘Kkarem řexxu, teẓwam teɣzurt n Zarad!’. Uca neẓwa teɣzurt n Zarad.
14 Tmenya u-třatin n iseggʷusa i nuyur zi Qadac-Barniɛ ařami neẓwa teɣzurt n teɣzart n Zarad, ařami iqḍa jjiř n iɛeskariyyen zi řwest n řmargeḥ n řɛeskar, am mammec tuɣa d asen ijjuǧ SIDI.
15 Ammu i zzaysen igga ufus n SIDI ḥima ad ten iteḥḥa zi řwest n řmargeḥ n řɛeskar ařami qḍan marra.
16 Umi qḍan u mmuten marra iɛeskariyyen zi řwest n řgens, imsar
17 aqa issiweř SIDI akidi, inna:
18 ‘Ass-a ad teẓwid aymir n temmurt n Mu’ab, ɣar tendint n Ɛar.
19 Ad dd-tqarrbed ɣar urendad n ayt n Ɛammun. War ten ttessiggʷid ca, war xasen ttɛeddi ca, minzi war d awem tticeɣ řwart zi temmurt n ayt n Ɛammun, minzi wciɣ tt d řwart i ayt n Luṭ.’ ”
20 Tettwaḥseb uřa d Ɛammun d ict n temmurt n Irafawiyyen. Tuɣa Irafawiyyen zeddɣen din qbeř u Iɛamuniyyen qqaren asen Izamzumiyyen. 21 Tuɣa-ten d ijj n řgens imɣar aṭṭas u d azirar n waddud amecnaw Iɛanaqiyyen. SIDI tuɣa yareddeǧ i-ten zzat i wudem nnes u nitni ksin řwart nsen uca zedɣen deg wemcan nsen. 22 Tuɣa Netta igga ammu ɛawed i ayt n Ɛisu inni tuɣa izeddɣen di Saɛir, maɣar iteḥḥa Ixuriyyen zzatsen uca nitni ksin řwart nsen uca zeddɣen din ař ass-a. 23 Uca Ikafturiyyen nni tuɣa iffɣen zi Kaftur, teḥḥan Iɛawiyyen inni tuɣa izeddɣen di dcurat ař Ɣazza, uca nitni ggin ad zedɣen din ař ass-a.
24 ‘Kkarem, fesyem iqiḍan nwem uca ẓwam teɣzurt n teɣzart n Arnun. Xzar, wciɣ Siḥun, ajeǧid n Ḥacbun, Amuri, d temmurt nnes deg ifassen nwem. Bda ad tt teksid uca tadfed ɣar garra akides. 25 Ass-a ad bdiɣ ad arreɣ tiggʷudi d řɛurret zzayek x marra řegnus sadu ajenna marra, inni xak i ɣa isřen řexbar uca ad arjijen u ad qdiddsen zzatek.’
26 Xenni ssekkeɣ ireqqasen zi řexřa n Qadimut ɣar Siḥun, ajeǧid n Ḥacbun s wawařen n řehna, nniɣ: ■ 27 ‘Ad kkeɣ x temmurt nnek d abrid, x webrid ad raḥeɣ břa ma ad heyyḍeɣ x webrid ɣar yeffus uřa ɣar uzeřmaḍ. ■ 28 Macca ad ayi tezzenzed i tmenyat n nnuqart ḥima ad cceɣ, aman ad ayi ten tewced i tmenyat n nnuqart ḥima ad sweɣ. Ad ẓwiɣ x iḍaren inu waha - 29 am mammec d ayi sarrḥen ayt n Ɛisu nni izeddɣen di Saɛir d Imu’abiyyen nni izeddɣen di Ɛar - ařami i ɣa ẓwiɣ L'Urdun ɣar temmurt i d aneɣ ɣa iwc SIDI, AREBBI nneɣ.’
30 Maca Siḥun, ajeǧid n Ḥacbun war ixs ad yejj ad tt neẓwa, minzi SIDI, AREBBI nnek, isseqsaḥ buḥbeř nnes, uca iɣennen uř nnes ḥima ad t isellem deg ifassen nnek, am teǧa ass-a. 31 Uca inna ayi SIDI: ‘Xzar, Necc bdiɣ ad sellmeɣ Siḥun d temmurt nnes ɣarek. Bda ad tt teksid ḥima ad twarted tammurt nnes.’ 32 Xenni iffeɣ-dd Siḥun ɣar umsagar akidneɣ, netta ak-d marra řgens nnes, i garra di Yahaṣ. ■ 33 SIDI, AREBBI nneɣ, isellem aneɣ t uca narni t, netta d iḥenjiren nnes d marra řgens nnes. ■ 34 Neksi marra tineddam nnes uca nḥarrem kuř tandint i uteḥḥi, iryazen d temɣarin d iḥenjiren, war nejji uřa d ijj ad iqqim iddar. 35 Mɣir řebhayem d min ittwakeccḍen zi tneddam aqa neksi aya d tkeccaḍt i yixef nneɣ. 36 Zi Aruɛir, nni yeǧan ɣar tma n teɣzart n Arnun, u zi tendint nni yeǧan di teɣzurt ař Jilɛad, war din tuɣi uřa d ict n tendint tuɛřa xaneɣ ɛad. SIDI, AREBBI nneɣ, isellem aneɣ marra. 37 Maca cek war dd-tqarrbed ca ɣar temmurt n ayt n Ɛammun, marra min tuɣa ɣar tma n teɣzart n Yabbuq d tneddam x idurar, uřa ɣar marra tammurt i d aneɣ iḥarrem SIDI.”