1 Imsar awarni i řmewt n Musa, amsexxar n SIDI, belli SIDI issiweř ak-d Yacuwa, mmis n Nun, amsexxar n Musa, inna: ^■  

2 “Musa, amsexxar inu immut. Řexxu kkar, ekk x L'Urdun-a, cek d marra řgens-a, ɣar temmurt i d asen ɣa wceɣ Necc, i ayt n Israil. 3 Kuř amcan min xef ɣa teɛjen třeqqa n uḍar nwem, aqa wciɣ awem t i kenniw, am mammec i ssiwřeɣ Necc ak-d Musa. ^■   4 Tammurt nwem ad tiři zi řexřa ař Lubnan-a, ař iɣzar ameqqran, iɣzar n Lfuraṭ, marra tammurt n Iḥittiyyen ař řebḥar ameqqran mani tɣeǧi tfuct. ^□   5 Uřa d ijj war izemmar ad iqqim ibedd zzat i wudem nnek marra ussan n tudart nnek. Am mammec d ayi tuɣa ak-d Musa, ad iřiɣ uřa akidek. Necc war dayek semmḥeɣ niɣ ad cek ttejjiɣ. ^■   6 Iři d aryaz u iři tmeḥḍed, minzi cek ad tarred řgens-a ad iṭṭef tammurt d řwart, tammurt nni x Necc jjuǧeɣ i ibabaten nsen ad asen tt wceɣ. ^■   7 Iři waha d aryaz u iři tmeḥḍed maḥend ad teḥḍid ad tegged marra Ccariɛa nni d ac yumur Musa, amsexxar inu, u war xas ttḥeyyeḍ ɣar yeffus uřa ɣar uzeřmaḍ, maḥend ad tegged s řeɛqeř mani ma i ɣa traḥed. ^■   8 War ttejji ca adlis-a ittwannḍen n Ccariɛa ad ac ittwakkes x yiřes nnek, maca xarreṣ dayes ass d ǧiřet, maḥend ad teḥḍiḍ ad tegged ammu nican am mammec marra min dayes tura, minzi xenni i ɣa tfeřḥed deg webrid nnek uca ad tt tegged s řeɛqeř. ^■   9 Ma war d ac t nniɣ? Iři d aryaz u iři tmeḥḍed, war tteggʷed u war ttejj ad iɛgez wuř nnek, minzi SIDI, AREBBI nnek, aqa-t akidek qaɛ mani ma i ɣa traḥed.”

10 Uca yumur Yacuwa i iweqqafen n řgens, inna:

11 “Uyurem x řwest n řmargeḥ n řɛeskar uca umur řgens, inim asen: ‘Swejdet řeɛweč i yixef nwem, minzi awarni i třata n wussan ad teẓwam L'Urdun-a ḥima ad tadfem ɣar temmurt i d awem ɣa iwc SIDI, AREBBI nwem, d řwart uca ad tt teksim d řwart.’ ”

12 Issiweř Yacuwa ak-d Irubiniyyen d Ijadiyyen u ak-d wezyen n teqbič n Manassa, inna:

13 “Ɛeqřet x wawař nni x i d awem yumur Musa, amsexxar n SIDI, umi inna awem: ‘SIDI, AREBBI nwem, iwca awem arraḥet uca iwca awem tammurt-a.

14 Timɣarin nwem, iḥenjiren nwem d řebḥayem nwem ad qqimen di temmurt i d awem iwca Musa x ujemmaḍ n L'Urdun uca kenniw ad teẓwam tḥezzmem zzat i wudem n aytmatwem, marra ayt n bu-teɣruḍt imeḥḍen, uca kenniw ad asen tewcem afus,

15 ař i ɣa yewc SIDI arraḥet i aytmatwem, am tuɣa iwca i kenniw, uca uřa d nitni ad ṭṭfen tammurt i d asen iwca SIDI, AREBBI nwem, d řwart. Xenni ad iɛeddeř ad dd-tdewřem ɣar temmurt tenni d řwart nwem uca ad twartem min d awem iwca Musa, amsexxar n SIDI, x ujemmaḍ n L'Urdun manis dd-tneqqar tfuct.”

16 Nitni arrin x Yacuwa, nnan: “Marra min xef i d aneɣ tumured, ad t negg u mani ma i d aneɣ ɣa tessekked, ad nuyur.

17 Ammu nican am mammec nesřa ɣar Musa, ad ɣarek nseř. Iři waha ad kik yiři SIDI, AREBBI nnek, am mammec tuɣa iǧa ak-d Musa!

18 Kuř aryaz nni i ɣa iɛṣan řumur nnek u war ixs ad iseř i wawařen nnek ɣar marra min d as ɣa tumured, ad ittwaneɣ. Iři waha d aryaz u iři tmeḥḍed!”