1 Yacuwa, mmis n Nun, issekk zi Ciṭṭim tnayen n yeryazen maḥend ad bergen s tnuffra, inna: “Uyurem, xzarem tammurt d Ariḥa!” Ffɣen, iwḍen ɣar taddart n ict n temɣart n farq-ccɣeř, qqaren as Raḥab, uca ssensen din. 2 Xebbaren t i ujeǧid n Ariḥa, nnan: “Xzar, di ǧiřet-a usin-dd danita ca n yeryazen n ayt n Israil, ḥima ad bergen di temmurt.” 3 Issekk ujeǧid n Ariḥa ɣar Raḥab maḥend ad as inin: “Suffeɣ-dd iryazen i dd yudfen taddart nnem, minzi usin-dd, ḥima ad ksin řexbar x min ittemsaran di marra tammurt.” 4 Aqa tessidef temɣart tnayen n yeryazen nni uca tessnuffar i-ten. Tenna: “S tidett, iryazen usin-dd ɣari, maca war ssineɣ manis nitni. 5 Umi ttwabellɛent tewwura n tendint ɣar uweṭṭu n taǧest, ffɣen yeryazen. Necc war ssineɣ maca, mani uyuren yeryazen nni. Ḍfarem ten deɣya, xenni tzemmarem ad xasen tḥartem.”

6 Maca nettat tessgeɛɛed i-ten x tzeqqa uca tessnuffar i-ten sadu iɣeddiwen n tiffest nni tuɣa ttwassarsen i nettat x tzeqqa. 7 Tuɣa ḍeffaren ten-dd yeryazen x webrid n L'Urdun ař imucan n uẓekkwu uca awarni řami ffɣen inni tuɣa ten-dd iḍeffaren, bellɛen xasen tawwart. 8 Qbeř i ɣa wḍan deg yiḍeṣ, tgeɛɛed Raḥab ɣarsen ɣar tzeqqa, 9 tenna asen: “Necc ssneɣ, aqa SIDI iwca awem tammurt-a u belli tiggʷudi zzaywem tewḍa-dd xaneɣ u marra imezdaɣ n temmurt fesyen deg wudem nwem.

10 Maɣar neccin nesřa, mammec issiẓeɣ SIDI aman n Řebḥar n Telga deg wudem nwem umi dd-teffɣem zi Miṣra, uca nesřa ɛawed min teggim ak-d Siḥun d Ɛuj, tnayen n ijeǧiden n Imuriyyen, inni tuɣa aɣirin i L'Urdun, inni tḥarrmem u tᵉtteḥḥam.^■  

11 Umi nesřa aya, ifsiy wuř nneɣ u war iqqim ɛad ca n buḥbeř iddar di ca n yeryaz di ssibbet nwem, minzi SIDI, AREBBI nwem, d AREBBI sennej deg ujenna d da swadday x temmurt. ^■  

12 Řexxu xenni, jjaǧem ayi ɣar SIDI, minzi necc ggiɣ zzaywem s tamexsiwt icewwaren, aqa uřa d kenniw ad teggem s tmexsiwt icewwaren ak-d řaǧ n taddart n baba u wcem ayi ijj n weɛřam n řaman nwem,

13 aqa kenniw ad tejjem baba d yemma, aytma d yessitma, ak-d marra min iǧan nsen, ad ddaren u belli kenniw ad aneɣ tessnejmem řeɛmurat nneɣ zi řmewt.”

14 Arrin-dd xas yeryazen: “Mařa war tefḍiḥem tamesřact nneɣ, ad immet řeɛmar nneɣ deg wemcan nwem. Uca ad imsar xmi d aneɣ ɣa iwc SIDI tammurt-a, ad am nesscen tamexsiwt icewwaren d řaman nneɣ.”

15 Xas uca tseyyeb i-ten temɣart s yijj n wesɣun zi řkazi, minzi tuɣa taddart nnes ɣar řḥiḍ n barra n tendint uca tuɣa tzeddeɣ di řḥiḍ n tendint.

16 Nettat tenna asen: “Ffɣem ɣar idurar, maḥend inni i kenniw iḍeffaren war xawem ḥarrten u ffarem dinni třata n wussan ař ɣa ɛeqben inni kenniw iḍeffaren. Awarni man aya tzemmarem ad tmenɛem abrid nwem.”

17 Iryazen nnan as: “Ad niři nettwasizdeg zi tjaǧit-a i d aneɣ teggid ad tt nejjaǧ,

18 maca war ittiři ammu xmi i ɣa tegged asɣun-a azeggʷaɣ imuden i zi d aneɣ tseyybed, ɣar řkazi xmi dd ɣa nadef ɣar temmurt uca ad tessmuned babam d yemmam d aytmam d marra řaǧ n babam ɣarem di taddart nnem.

19 Xenni qaɛ wi i ɣa iffɣen zi tewwura n taddart nnem, ad iřin idammen nnes x uzeǧif nnes u neccin ad niři nettwasizdeg zzaysen, maca qaɛ wenni akidem i ɣa iqqimen di taddart, idammen nnes ad iřin x uzeǧif nneɣ mařa ca n yijj ad xas issars afus. ^■   20 Mařa cem tessuffɣed tamesřact nneɣ, xenni ad niři nettwasizdeg ɛawed zi tjaǧit i d aneɣ teggid ad am nejjuǧ i cem.” 21 Nettat tarra-dd xasen: “Ɛlaḥsab awařen nwem, ammu i ɣa yiři!” Xenni tejja i-ten ad uyuren uca tcedd asɣun azeggʷaɣ ɣar řkazi.

22 Uyuren nitni uca iwḍen ɣar wedrar uca qqimen dinni třata n wussan, ařami dd-ɛeqben inni i ten iḍeffaren. Inni ten iḍeffaren tuɣa arezzun xasen deg webrid marra, maca war ten ufin. 23 Xenni areggʷḥen-dd tnayen nni n yeryazen u hwan-dd zeg wedrar, ẓwan-dd uca usin-dd ɣar Yacuwa, mmis n Nun, u ḥajan as marra min d asen imsaren. 24 Nnan i Yacuwa: “S tidett, SIDI igga aneɣ marra tammurt deg ifassen u ɛawed fesyen marra imezdaɣ n temmurt di ssibbet nneɣ.”