1 Ɣar tuffut zic, ikkar Yacuwa uca ksin iqiḍan nsen zi Ciṭṭim uca usin-dd ɣar L'Urdun, netta d marra ayt n Israil, uca ssensen dinni qbeř i ɣa ẓwan. 2 Imsar awarni třata n wussan, aqa iweqqafen uyuren x řwest n řmargeḥ n řɛeskar 3 uca umuren řgens, nnan: “Xmi i ɣa tẓarem Ttabut n Řɛahd n SIDI, AREBBI nwem, uca ikehhanen Ilawiyyen arbun tt, xenni uřa d kenniw ad temmuṭṭyem zeg wemcam nwem, ad t teḍfarem. 4 Maca ittxeṣṣa ad tɛebbarem ttasiɛ ɛřaḥař i ařfayen n iɣaǧen jar awem d netta, war ɣares tadsem. Ammu i ɣa tessnem abrid i ɣa tekkem, maɣar kenniw zic ɛemmarṣ war tekkim abrid-a, war iǧi iḍennaḍ u war iǧi fariḍennaḍ.”

5 Inna Yacuwa i řgens: “Qeddsem ixef nwem, minzi tiwecca ad igg SIDI řeɛjayeb di řwest nwem.” 6 Issiweř Yacuwa ɛawed ak-d ikehhanen, inna: “Sgeɛɛdem Ttabut n Řɛahd uca ẓwam zzat i wudem n řgens!” Nitni ssgeɛɛden Ttabut n Řɛahd u izwaren ɣar zzat i wudem n řgens. 7 Tuɣa SIDI inna i Yacuwa: “Ass-a ad kkareɣ ad cek ssemɣareɣ zzat i tiṭṭawin n marra Israil, maḥend marra ad ssnen, aqa Necc akidek i ǧiɣ, am mammec i d ayi tuɣa ak-d Musa. ^■   8 Cek ad tumured ikehhanen inni yarebbun Ttabut n Řɛahd, ad tinid: ‘X minni i ɣa tawḍem ɣar tma n waman n L'Urdun, ad din tbeddem di L'Urdun!’ ”

9 Xas uca inna Yacuwa i ayt n Israil: “Asem-dd da u tesřem awařen n SIDI, AREBBI nwem.”

10 Uca inna Yacuwa: “S man aya ad tessnem, aqa ijj n Arebbi iddar aqa-t jar awem u Netta ad issuffuɣ Ikenɛaniyyen d Iḥittiyyen d Iḥiwiyyen d Ifariziyyen d Ijirjaciyyen d Imuriyyen d Iyabusiyyen zzat i tiṭṭawin nwem zi řwart nsen.

11 Xzarem, Ttabut n Řɛahd n Sidi n marra tammurt tezwar awem zzat i wudem nwem di L'Urdun.

12 Řexxu xenni, farnem tenɛac n yeryazen zi tqebbař n Israil akidwem, ijj n weryaz zi kuř taqbič.

13 Xmi iḍaren n ikehhanen, inni yarebbun Ttabut n SIDI, Sidi n marra tammurt, ad bedden deg waman n L'Urdun, xenni ad imsar aqa aman n L'Urdun ad nqeḍɛen, aman i dd-ihekkwan zi sennej ɣar swadday, uca ad qqimen bedden amecnaw ijj n weɣbar.” ^■  

14 Řami ikkes řgens iqiḍan nnes ḥima ad iẓwa L'Urdun, arbun ikehhanen Ttabut n Řɛahd zzat i wudem n řgens. ^■  

15 Umi iwḍen iḥemmařen n Ttabut ɣar L'Urdun uca ḥadan iḍaren n ikehhanen, inni yarbun Ttabut, x tma n waman, - tuɣa L'Urdun issfiy x marra tmewwa nnes di marra ussan n tmeyra - ,^■  

16 bedden waman nni dd-ihekkwan zi sennej. Aman bedden nican amecnaw ict n tesmuṭ iggʷej aṭṭas, ɣar tendint n Adam tenni zzat i Ṣartan. Ammu i kemmřen waman inni dd-ihekkʷan ɣar swadday, ɣar řebḥar n Řewḍa, ɣar Řebḥar Ameǧaḥ, aqa ttwaqeḍɛen. Xenni iẓwa řgens deg urendad n Ariḥa.

17 Ikehhanen, inni yarbun Ttabut n Řɛahd n SIDI, bedden di řaman x řaẓaɣ, di řwest n L'Urdun umi iẓwa marra Israil x řaẓaɣ ařami ikemmeř marra řgens aẓwi x L'Urdun.