4
1 Umi tuɣa ikemmeř marra řgens aẓwi x L'Urdun, imsar aqa SIDI issiweř ak-d Yacuwa, inna: ■ 2 “Farnem tenɛac n yeryazen zi řgens, ijjen weryaz zi kuř taqbič 3 u tumured xasen, ini: ‘Ksi ssa, zi řwest n L'Urdun, zeg wemcan mani tuɣa bedden iḍaren n ikehhanen di řaman, tenɛac n iẓra, ksim ten akidwem ɣar ujemmaḍin u tessarsem ten di řmargeḥ n řɛeskar mani i ɣa tessensem ǧiřet-a.’ ” 4 Xenni iřaɣa Yacuwa tenɛac n yeryazen, inni ifarn i-ten zeg ayt n Israil, ijj n weryaz zi kuř taqbič, 5 uca Yacuwa inna asen: “Uyurem zzat i wudem n Ttabut n SIDI, AREBBI nwem, ɣar řwest n L'Urdun uca ad iksi kuř aryaz i yixef nnes ijj n weẓru x teɣruḍt nnes, ɛlaḥsab řqedd n tqebbař n ayt n Israil, 6 ḥima ad yiři aya d ict n řeɛřamet jar awem. Minzi mařa iḥenjiren nwem ad sseqsan, ad inin: ‘Min ixs ad inin yeẓra aya i kenniw?’, 7 xenni kenniw ad asen tinim: ‘Aqa-ten din minzi nqeḍɛen waman n L'Urdun zzat i wudem n Ttabut n Řɛahd n SIDI! Ɣar uẓwu n L'Urdun nqeḍɛen waman n L'Urdun uca iẓra aya d ict n řidaret i ayt n Israil di man aya i řebda.” ■ 8 Ayt n Israil ggin am mammec tuɣa yumur Yacuwa uca ksin tenɛac n iẓra zi řwest n L'Urdun, am mammec tuɣa issiweř SIDI ɣar Yacuwa, ɛlaḥsab řqedd n tqebbař n ayt n Israil, uca ksin ten akidsen ɣar ujemmaḍin, ɣar řmargeḥ mani tuɣa ssensen, uca ssarsen ten din. 9 Issars Yacuwa tenɛac n iẓra di řwest n L'Urdun, deg wemcan mani tuɣa mmarsen iḍaren n ikehhanen, inni yarbun Ttabut n Řɛahd, u aqa aten ɛad din ař ass-a.
10 Ikehhanen, inni yarbun Ttabut, qqimen bedden di řwest n L'Urdun, ařami tuɣa ittwakemmeř min inna SIDI i Yacuwa maḥend ad t yini i řgens ɛlaḥsab marra min yumur Musa i Yacuwa, uca iqeǧeq řgens ssenni, iẓwa.
11 Umi tuɣa marra řgens ikemmeř aẓwi, teẓwa Ttabut n SIDI ak-d ikehhanen zzat i wudem n řgens.
12 Ayt n Rubin d ayt n Jad d wezyen n teqbič n Manassa ẓwan ḥezzmen i umenɣi zzat i wudem n ayt n Israil, am mammec tuɣa akidsen issiweř Musa. ■
13 Tuɣa-ten ɛřaḥař di arebɛin-ařef n yeryazen zi řɛeskar nni iḥezzmen marra i umenɣi. Nitni ẓwan ɣar wazzay n umenɣi zzat i wudem n SIDI, ɣar řewḍat n Ariḥa.
14 Deg wass nni SIDI issemɣar Yacuwa di tiṭṭawin n marra Israil uca ggʷeden zzayes, am mammec tuɣa ggʷeden zi Musa, marra ussan n tudart nnes. ■
15 SIDI issiweř ak-d Yacuwa, inna:
16 “Umur i ikehhanen, inni yarebbun Ttabut n Cchadet, ad geɛɛden zi L'Urdun.”
17 Xenni Yacuwa yumur ikehhanen, inna: “Gaɛɛdem zi L'Urdun ɣar sennej!”
18 U imsar, - umi ikehhanen, inni yarbun Ttabut n Řɛahd n SIDI, geɛɛden zi řwesṭ n L'Urdun u tisi n iḍaren n ikehhanen ɛad am mammec dd-ffɣen zeg waman - , aqa aman n L'Urdun dewřen ɣar wemcan nsen uca dewřen ssfayen x marra timmawin nnes am iḍennaḍ d fariḍennaḍ.
19 Tuɣa řgens igeɛɛed zi L'Urdun deg wass wiss ɛecra deg uyur amezwaru uca wtin iqiḍan nsen di Jiljal, ɣar ccarq n Ariḥa.
20 Di Jiljal issbedd Yacuwa tenɛac n iẓra i tuɣa akidsen-dd iksin zi L'Urdun 21 uca netta issiweř ak-d ayt n Israil, inna: “Mařa sseqsan tiwecca iḥenjiren nwem ibabaten nsen uca ad inin: ‘Min xsen ad inin yeẓra-ya?’ 22 xenni ad tɛeřmem i iḥenjiren nwem, ad tinim: ‘Da Israil iẓwa L'Urdun-a x řaẓaɣ, 23 minzi SIDI, AREBBI nwem, issiẓeɣ aman n L'Urdun zzat i wudem nwem ařami teẓwam, am mammec i tuɣa igga SIDI, AREBBI nwem, ɛawed ak-d Řebḥar n Telga nni issiẓeɣ zzat i wudem nneɣ ařami din neẓwa, ■ 24 ḥima marra řegnus x temmurt ad ssnen, aqa afus n SIDI ijhed, ḥima kenniw ad teggʷdem SIDI, AREBBI nwem, marra ussan.’ ”