1 Umi marra ijeǧiden n Imuriyyen i iǧan x tma n řɣarb n L'Urdun d marra ijeǧiden n Ikenɛaniyyen i iǧan ɣar řebḥar sřan, aqa SIDI issiẓeɣ aman n L'Urdun zzat i wudem n ayt n Israil, ařami neẓwa ɣar ujemmaḍin, xenni ifsiy wuř nsen u war daysen iqqim ca arruḥ zzat i wudem n ayt n Israil. 2 Di řweqt nni issiweř SIDI ak-d Yacuwa: “Egg i yixef nnek ifarricen n weẓru uca xten i ayt n Israil i twařa wiss tnayen!” ^■   3 Xenni igga Yacuwa ifarricen n weẓru i yixef nnes uca ixten i ayt n Israil ɣar Jibiɛa-Haɛralut, aqa-tt d ‘Tawrirt n Řeɛdařeyyat n Wextan’. 4 Man aya d řesbab i zi i-ten ixten Yacuwa: marra řgens i tuɣa dd-iffɣen zi Miṣra, marra iwetman, ixs ad yini marra iɛeskariyyen mmuten deg webrid di řexřa awarni i wuffuɣ nsen zi Miṣra. 5 Minzi marra řgens nni dd-iffɣen, tuɣa-t ittwaxten, maca marra řgens nni dd-ittwaxeřqen deg webrid di řexřa awarni i uffuɣ nsen zi Miṣra, nitni war ttwaxetnen ca. 6 Minzi arebɛin n iseggʷusa gguren ayt n Israil di řexřa ařami ittwahellek řgens marra, marra iɛeskariyyen i tuɣa dd-iffɣen zi Miṣra, inni tuɣa war isřin ɣar tmijja n SIDI d inni tuɣa ijjuǧ asen SIDI, war ten ittejji ca ad ẓaren tammurt nni x tuɣa ijjuǧ SIDI i ibabaten nsen ad asen tt iwc, ict n temmurt ifeyyḍen s uɣi d tamment. ^■   7 Iḥenjiren nsen inni issnekkar Netta deg wemcan nsen, d ina d inni tuɣa ixten Yacuwa, minzi nitni ɣarsen ɛad řeɛdařyet minzi war d asen xetnen deg webrid. 8 Umi kemmřen ad xten marra řgens, imsar belli qqimen deg wemcan nsen di řmargeḥ n řɛeskar ařami ggenfan. 9 SIDI inna i Yacuwa: “Ass-a aqa kkseɣ xawem řefḍiḥet n Miṣra.” X uyenni qqaren as i wemcan nni Jiljal, ař ass-a.

10 Wtin ayt n Israil iqiḍan nsen di Jiljal uca sswejden Taɣarṣt n Useɛdu deg wass arbeɛṭac n uyur nni, di ǧiřet, di řewḍat n Ariḥa. ^■  

11 Zi řɣiǧet n temmurt ccin aɣrum břa antun d teɣwawin icenfen, ɣar tiwecca awarni i Taɣarṣt n Useɛdu, deg wass nni simant nnes. ^■  

12 Tiwecca nnes, awarni umi tuɣa ccin zi řɣiǧet n temmurt, tenneqḍeɛ ‘manna’. Ssenni war teqqim ɛad ‘manna’ i ayt n Israil. Deg useggʷas nni ccin zi řɣiǧet n temmurt n Kenɛan.

13 Umi tuɣa iǧa Yacuwa zzat i Ariḥa, issgeɛɛed tiṭṭawin nnes, uca xzar, tuɣa ijj n weryaz ibedd zzates, ɣares ssif nnes deg ufus nnes. Yacuwa iruḥ ɣares inna as: “Cek ma zzayneɣ niɣ zeg iɣrimen nneɣ?” ^■  

14 Netta yarra-dd: “Lla, minzi Necc d akumandar ameqqran n řɛeskar n SIDI. Necc řexxu i dd-usiɣ!” Uca iwḍa Yacuwa x uɣembub nnes ɣar temmurt uca iɣnes, inna as: “Min inna Sidi inu i umsexxar nnes?”

15 Xenni inna akumandar ameqqran n řɛeskar n SIDI i Yacuwa: “Kkes tisiřa nnek zeg iḍaren nnek, minzi amcan mani tbedded d amqeddas i iǧa.” Uca amenni i igga Yacuwa.