1 Ariḥa tuɣa teqqen tiwwura nnes nican zzat i wudem n ayt n Israil. Uřa d ijj war izemmar ad iffeɣ, uřa d ijj war izemmar ad din yadef. 2 Xenni inna SIDI i Yacuwa: “Xzar, Necc ggiɣ ac Ariḥa d ujeǧid nnes, ayt n bu-teɣruḍt imeḥḍen, deg ufus nnek. 3 Ittxeṣṣa kenniw ad tennḍem i tendint. Marra iɛeskariyyen ad nnḍen i tendint ict n twařa. Amya i ɣa teggem setta n wussan. 4 Sebɛa n ikehhanen ad izwaren zzat i Ttabut ad arbun sebɛa n waccawen n icarri i usřiwřew. Deg wass wiss sebɛa ad tennḍem i tendint sebɛa n twařawin u xenni ad ṣuḍen ikehhanen deg waccawen n icarri. 5 Xmi i ɣa yiři ijj n uṣuḍi d azirar deg yicc n usřiwřew u kenniw ad tesřem řḥess n uṣuḍi deg uyicc n icarri, xenni ad yarreẓ řgens imun s tɣuyyit deg ujenna. Xas uca ad iwḍa řḥiḍ n tendint uca ad xas iẓwa řgens, kuř ijj n weryaz ad yuyur nican ɣar zzat.”

6 Xenni iřaɣa Yacuwa, mmis n Nun, x ikehhanen, inna asen: “Ksim kenniw Ttabut n Řɛahd u tejjem sebɛa n ikehhanen ad izwaren ɣar zzat i wudem n Ttabut n SIDI ad arbun sebɛa n waccawen n icarri i usřiwřew.” 7 Nnan i řgens: “Ẓwam u tennḍem i tendint. Jjem iɛeskariyyen s řesnaḥ ad ẓwan zzat i wudem n Ttabut n SIDI.”

8 Imsar am mammec tuɣa inna Yacuwa i řgens. Sebɛa n ikehhanen tuɣa arebbun sebɛa n waccawen n icarri i usřiwřew uca ẓwan zzat i wudem n SIDI, ṣuḍen deg waccawen n icarri uca Ttabut n Řɛahd n SIDI teggur awarni asen. 9 Iryazen iḥezzmen s řesnaḥ izwaren zzat i wudem n ikehhanen nni iṣuḍen deg waccawen n icarri u x ḍeffar n Ttabut yusa-dd uɣezdis aneggaru n řɛeskar, am gguren, ttṣuḍen nitni deg waccawen n icarri.

10 Yacuwa aqa yumur řgens, inna “War ttesɣuyyum, war ttejjim tmijja nwem ad as iseř ḥed, war dd-itteffeɣ uřa d ijj n wawař zeg uqemmum nwem ař ass mani i d awem ɣa iniɣ: ‘Sɣuyyem!’ Xenni ad tesɣuyyem i umenɣi.”

11 Xas uca yejja Ttabut n SIDI ad tenneḍ i tendint, ict n twařa tenneḍ as-dd. Xenni dewřen ɣar řmargeḥ n řɛeskar, ssensen di řmargeḥ.

12 Tiwecca nnes ɣar tuffut n zic ikkar Yacuwa uca arbun ikehhanen Ttabut n SIDI.

13 Sebɛa n ikehhanen nni tuɣa yarebbun sebɛa n waccawen n icarri i usřiwřew zzat i wudem n Ttabut n SIDI, qqimen gguren, ṣuḍen deg waccawen n icarri u iryazen iḥezzmen s řesnaḥ izwaren ɣar zzat u x ḍeffar n Ttabut n SIDI iḍfar uɣezdis aneggaru n řɛeskar, am qqimen gguren am ttṣuḍen deg waccawen n icarri.

14 Deg wass wiss tnayen nnḍen ɛawed ict n twařa i tendint uca dewřen ɣar řmargeḥ n řɛeskar. Ammu i ggin setta n wussan.

15 Deg wass wiss sebɛa, imsar, aqa kkaren zic, umi iṣbeḥ řḥař, uca nnḍen ammu sebɛa n twařawin i tendint. Deg wass nni waha nnḍen i tendint sebɛa n twařawin.

16 Uca imsar ɣar twařa wiss sebɛa umi ṣuḍen ikehhanen deg waccawen n icarri, aqa Yacuwa inna i řgens: “Sɣuyyem, minzi SIDI igga awem tandint deg ufus!

17 Tandint ad tᵉttwaḥarrem i SIDI, tandint d marra min dayes. Mɣir tamɣart n farq-ccɣeř Raḥab waha d marra inni i ɣares iǧan di taddart nnes ad qqimen ddaren, minzi nettat tessnuffar x ireqqasen nni tuɣa nessekk.

18 Ḥḍam ixef nwem zi marra min ittwaḥarrmen, maḥend kenniw war teddikkwiřem d ayt n řeḥram am teksim ca n min iǧan d řeḥram u ad tarrem řmargeḥ n řɛeskar n Israil d řeḥram u ad t tɣeḍřem d arrẓiyet.

19 Marra nnuqart d wureɣ d řeqcuɛ n nnḥas d wuzzař, marra aya d amqeddas i SIDI uca ad t tessidfem deg wexxam n txubay n SIDI.” ^■   20 Xas uca isɣuyy řgens i umenɣi uca ṣuḍen deg waccawen n icarri. Uca imsar umi isřa řgens řḥess n uṣuḍi deg uyicc n icarri, aqa řgens yarreẓ deg ict n tɣuyyit deg ujenna u řḥiḍ n tendint ihdem u řgens yudef xas ɣar tendint, kuř ijj n weryaz yuyur nican ɣar zzat, uca ṭṭfen nitni tandint. ^■   21 Ḥarrmen marra min iǧan di tendint i řḥukm s řeqḍeɛ n ssif, iryazen, timɣarin, iḥramen d iwessura, afunas, uǧi d weɣyuř. 22 Inna Yacuwa i tnayen n yeryazen nni tuɣa ittbergagen tammurt: “Adfem ɣar taddart n temɣart n farq-ccɣeř, u ssuffɣem tamɣart nni ak-d marra min ɣares, am mammec kenniw i d as tejjuǧem.” ^■   23 Xenni udfen ibřiɣen, ibergagen, uca ssuffɣen-dd Raḥab ak-d babas d yemmas d aytmas d marra min iǧan nnes. Ssuffɣen marra řaǧ nnes uca ggin asen mani i ɣa qqimen barra i řmargeḥ n řɛeskar n Israil. 24 Sscemḍen tandint d marra min dayes s tmessi. Mɣir nnuqart d wureɣ d řeqcuɛ n nnḥas d wuzzař, ssidfen ten ɣar wexxam n txubay di Taddart n SIDI. 25 Raḥab, tamɣart n farq-ccɣeř d řaǧ n taddart n babas d marra min iǧan nnes, ijja i-ten Yacuwa ad ddaren. U nettat tzeddeɣ di řwest n Israil ař ass-a, minzi tuɣa tessnuffar x ireqqasen i tuɣa issekk Yacuwa, ḥima ad bergen tammurt. 26 Di řweqt nni ijjuǧ Yacuwa, inna: “Aryaz nni i ɣa issbedd Ariḥa ɛawed ad yiři ittwanɛeř zzat i wudem n SIDI. Ad as yegg dsas nnes di tareẓẓit n umenzu nnes, ad issbedd tiwwura nnes di tareẓẓit n mmis amaẓuẓ.” ^■   27 Ammu i tuɣa SIDI ak-d Yacuwa, uca řexbar ikka marra tammurt.