1 Ayt n Israil ɣeccen ak-d min iǧan ittwaḥarrmen i uteḥḥi. Ɛaxan, mmis n Karmi, mmis n Zabdi, mmis n Zaraḥ, zi teqbič n Yahuda, iksi zi min iǧan d řeḥram. Xenni yarɣa weɣḍab n SIDI x ayt n Israil. ^■  

2 Yacuwa issekk iryazen zi Ariḥa ɣar Ɛay i iǧan ɣar Bayt-Awin, ɣar ccarq n Bayt-Il. Netta issiweř akidsen, inna: “Gaɛɛdem, bergagem tammurt!” Iryazen ffɣen u bergagen x Ɛay. 3 Umi dd-ɛeqben ɣar Yacuwa, nnan as: “Nhřa ma igeɛɛed din marra řgens. Ejj ad geɛɛden din ɛřaḥař ařfayen niɣ teřt-ařaf n yeryazen ḥima ad ɣeřben x Ɛay. War dd-ttiwyed ca dinni marra řgens, minzi nitni aqa aten di drus. 4 Ammu i geɛɛden zi řgens ɛřaḥař teřt-ařaf n yeryazen, maca nitni arewřen zzat i wudem n yeryazen n Ɛay. 5 Iryazen n Ɛay nɣin zzaysen setta u-třatin n yeryazen uca ḍfaren ten zi zzat n wudem n tewwart ař Cabarim uca ɣeřben xasen deg uhekkʷu. Xenni ifsiy wuř n řgens, idweř amecnaw aman.

6 Yacuwa icarreg arruḍ nnes, iwḍa x uɣembub nnes ɣar temmurt zzat i Ttabut n SIDI, ař ǧiřet, netta d imɣaren n Israil, uca nitni ssuyusen ucař x uzeǧif nsen. 7 Yacuwa inna: “A Sidi inu, SIDI, mayemmi tejjid řgens-a ad iẓwa L'Urdun? Ma ḥima ad aneɣ tegged deg ufus n ayt n Imuriyyen, maḥend ad aneɣ teḥḥan? Iři, negga ad neqbeř ad nezdeɣ ɣar ujemmaḍ n L'Urdun.” 8 A Sidi, min ɣa iniɣ, awarni i umi yarra Israil aɛrur ɣar wudem n řɛedyan nnes maḥend ad yarweř? 9 Mařa ad t sřen ayt n Kenɛan d marra imezdaɣ n temmurt, ad aneɣ qewwaren, ad qeḍɛen isem nneɣ zi tammurt. Min i ɣa tegged xenni i Yisem nnek ameqqran?”

10 Xenni inna SIDI i Yacuwa: “Kkar, mayemmi da tmedded ammu x uɣembub nnek ɣar temmurt?

11 Aqa Israil ixḍa uca nitni ɛeddan Řɛahd inu nni x d asen umureɣ. Ksin ɛawed zi min iǧan ittwaḥarrmen i lḥukm, uca ucaren ɛawed, ssxarrqen ɛawed uřa ssarsen aya ɣar řeqcuɛ nsen.

12 X uya war zemmaren ayt n Israil ad qqimen bedden zzat i wudem n řɛedyan nsen. Ad arrin aɛrur ɣar wudem n řɛedyan nsen maḥend ad arewřen, minzi nitni dewřen ttwaḥarrmen qaɛ i lḥukm. Necc war kiwem ttiřiɣ ɛad, mařa war tekksem min iǧan d řeḥram zi řwest nwem.

13 Kkar, qeddes řgens, ad tinid: ‘Qeddsem ixef nwem i tiwecca, minzi ammu i iqqar SIDI, AREBBI n Israil: Aqa din ca d řeḥram di řwest nwem, Israil! War tzemmared ad tessbedded řɛedyan nnek, ař ɣa tekksem min iǧan d řeḥram zi řwest nwem.

14 Tiwecca ad dd-tqarrbem ɛlaḥsab tiqebbař nwem uca xenni ad dd-tqarreb teqbič nni iɛeǧem SIDI ɛlaḥsab řaǧat nnes u řaǧ i ɣa iɛeǧem SIDI ad dd-iqarreb ɛlaḥsab řaǧat n tudrin nnes uca řaǧ nni i ɣa iɛeǧem SIDI ad dd-iqarreb ɛlaḥsab iryazen ibřiɣen nnes.

15 Uca ad imsar, aqa wenni iksin min iǧan d řeḥram ad ittwasecmeḍ s tmessi ak-d marra min ɣares iǧan, minzi netta iɛedda x Řɛahd n SIDI u igga řefḍiḥet di Israil.’ ”

16 Ikkar Yacuwa zic uca ijja ad dd-isqarreb Israil taqbič taqbič uca tᵉttwaɛeǧem teqbič n Yahuda.

17 Ijja ad dd-tqarreb řaǧ n Yahuda uca tᵉttwaɛeǧem řaǧ n Izaraḥiyyen. Xenni ijja ad dd-tqarreb řaǧ n Izaraḥiyyen, tᵉttwasettef ɛlaḥsab iryazen ibřiɣen nnes uca ittwaɛeǧem Zabdi.

18 Netta ijja ad dd-iqarreb řaǧ n taddart nnes, ttwasettfen ɛlaḥsab iryazen ibřiɣen nnes uca ittwaɛeǧem Ɛaxan, mmis n Karmi, mmis n Zabdi, mmis n Zaraḥ, zi teqbič n Yahuda.

19 Yacuwa inna i Ɛaxan: “A mmi, ewc řɛezz i SIDI, AREBBI n Israil, u qada i-t! Ini ayi, min teggid cek, war xafi snuffar ca” 20 Ɛaxan yarra-dd x Yacuwa, inna: “Aqa s tidett, necc xḍiɣ ak-d SIDI, AREBBI n Israil, necc ggiɣ ta d ta. 21 Necc ẓriɣ jar tkeccaḍt ijj n upartessu izewwqen zi Cinar d mitayen n iciqlen n nnuqart d ict n tbarrat n wureɣ tewzen xemsin n iciqlen. Necc meẓreɣ daysen uca iwyeɣ ten-dd ɣari, aqa aten nnufaren di temmurt, di řwest n uqiḍun inu, d nnuqart swadday.” 22 Yacuwa issekk ireqqasen. Nitni uzzřen ɣar uqiḍun, xzar, řeḥwayej tuɣa aten nuffaren deg uqiḍun, d nnuqart swadday. 23 Ksin nitni řeḥwayej nni zi řwest n uqiḍun uca iwyen ten ɣar Yacuwa u ɣar marra ayt n Israil uca ssarsen ten zzat i wudem n SIDI. ^□  

24 Yacuwa, d marra Israil akides, iksi Ɛaxan, mmis n Zaraḥ, uřa d nnuqart d upartessu izewwqen d tbarrat n wureɣ d iḥenjiren nnes d yessis nnes d ifunasen nnes d iɣyař nnes d wuǧi nnes d uqiḍun nnes d marra min ɣares uca iwyen ten ɣar teɣzurt n Axur. 25 Inna Yacuwa: “Mayemmi i d aneɣ teggid di arrẓiyet? SIDI ad cek yegg di arrẓiyet ass-a!” D marra Israil yarjem i-t s iẓra uca sscemḍen ten s tmessi uca nḍaren xasen iẓra. 26 Ssbedden xas ijj n uɛurric d ameqqran n iẓra wenni din iǧan ař ass-a. Uca SIDI igga ad dd-iɛqeb řḥaduq n weɣḍab nnes. S uyenni qqaren as i temmurt nni: ‘Taɣzurt n Axur’ ɣares ař ass-a. ^□