1 Xenni inna SIDI i Yacuwa: “War tteggʷed u war tejjed ad iɛgez wuř nnek. Ksi akidek marra řgens n řɛeskar, kkar, tuyured ɣar Ɛay! Xzar, Necc ggiɣ ajeǧid n Ɛay d řgens nnes d tendint nnes d temmurt nnes deg ufus nnek. ^■   2 Cek ad tegged ak-d Ɛay u ak-d ujeǧid nnes am mammec teggid ak-d Ariḥa u ak-d ujeǧid nnes, ad teksim mɣir takeccaḍt d řebhayem waha i yixef nwem. Egg deg weɛrur n tendint ict n texceft.” ^■  

3 Uca ikkar Yacuwa ak-d marra řgens n řɛeskar ḥima ad igeɛɛed ɣar Ɛay. Ixḍar Yacuwa teřt-ařaf n yeryazen, ayt n bu-teɣruḍt imeḥḍen, uca issekk i-ten s ǧiřet 4 uca yumur i-ten, inna: “Xzarem, ad teggem taxceft ɣar weɛřuř n tendint. War tiggʷejem aṭṭas x tendint u iřim tḥezzmem. 5 Necc ad dd-qarrbeɣ ɣar tendint ak-d marra řgens. Ad imsar mařa ffɣen i umsagar akidneɣ am twařat tamezwarut, xenni ad zzaysen narweř zzat i wudem nsen. 6 Nitni ad aneɣ dd-ḍfaren ɣares ař ten-dd-nessiggʷej x tendint, minzi nitni ad inin: ‘Nitni arewřen zzat i wudem nneɣ am twařat tamezwarut.’ Ammu i zzaysen ɣa narweř zzat i wudem nsen. 7 Xenni kenniw ad tekkarem zeg wecbar, ad tᵉṭṭfem tandint, minzi SIDI, AREBBI nwem, ad tt iwc deg ufus nwem. 8 Uca ad imsar x minni i ɣa tiři tᵉṭṭfem tandint, ad tessarɣem tandint s tmessi. Ittxeṣṣa ad teggem ɛlaḥsab awař n SIDI. Xzarem, necc aqa umureɣ kenniw.”

9 Xenni issekk i-ten Yacuwa uca nitni ggin taxceft uca qqimen jar Bayt-Il d Ɛay, ɣar řɣarb x Ɛay. Yacuwa issens ǧiřet nni di řwest n řgens.

10 Tiwecca zic ikkar Yacuwa. Iḥseb řgens uca igeɛɛed ak-d imɣaren n Israil zzat i wudem n řgens ɣar Ɛay.

11 Marra řgens n řɛeskar, inni kis iǧan, iffeɣ-dd uca nitni qarrben-dd uca iwḍen ɣares ař qibač i tendint. Nitni wtin iqiḍan nsen ɣar ccamal n Ɛay. Tuɣa din ict n teɣzurt jar as-dd d Ɛay.

12 Iksi netta ɛřaḥař xemsa-ařaf n yeryazen uca igga asen taxceft jar Bayt-Il d Ɛay, ɣar řɣarb n tendint.

13 Ssbedden řgens, zeɛma marra řɛeskar ɣar ccamal n tendint, uca aɣezdis aneggaru n řɛeskar ɣar řɣarb n tendint. Yacuwa iruḥ ǧiřet nni ɣar řwest n řewḍa n teɣzurt.

14 Umi iẓra aya ujeǧid n Ɛay, qeǧqen uca kkaren zic. Ffɣen iryazen n tendint i umsagar ak-d Israil, i umenɣi, netta ak-d marra řgens nnes, ɣar wazzay n umenɣi zzat i wudem n Řewḍa. Maca netta war issin belli tuɣa ggin as ict n texceft ɣar weɛrur n tendint.

15 Yacuwa d marra Israil ggin axmi jjin ixef nsen ad ttwawten qibač nsen uca arewřen x webrid n řexřa.

16 Marra řgens i tuɣa iǧan di tendint řaɣan ten ḥima ad ten ḍfaren. Ḍfaren Yacuwa uca dewřen iggʷejen x tendint.

17 Uřa d ijj n weryaz war iqqim di Ɛay niɣ di Bayt-Il, wenni war dd-iffiɣen ca awarni i Israil, uca nitni jjin tandint tarzem uca qqimen ḍeffaren ayt n Israil.

18 Xenni issiweř SIDI ak-d Yacuwa: “Swiẓẓeḍ aḥric nni deg ufus nnek ɣar Ɛay, minzi Necc ad wceɣ tandint deg ufus nnek.” Xenni isswiẓẓeḍ Yacuwa aḥric nni deg ufus nnes ɣar tendint. ^□  

19 Xenni ikkar uɣezdis aneggaru n řɛeskar deɣya uca umi isarreḥ Yacuɛa afus nnes, bdan ad azzřen uca iwḍen ɣar tendint uca ṭṭfen tt. Ggin t s tazřa uca ssekkaren timessi di tendint. 20 Iryazen n Ɛay nnqeřben uca ẓrin ddexxan yuři ɣar ujenna zi tendint. Nitni war zemmaren ad arewřen ɣar da uřa ɣar din, minzi řgens i tuɣa yarewřen ɣar řexřa, inneqřeb-dd i umenɣi x wenni ten iḍeffaren. 21 Yacuwa d marra ayt n Israil ẓrin belli inni tuɣa rajan di texceft ṭṭfen tandint uca yuři ddexxan zi tendint. Nitni ɛeqben-dd, wtin iryazen n Ɛay. 22 Inni dd-iffɣen zi tendint, ruḥen i umsagar akidsen, ařami nitni, iryazen n Ɛay, dewřen di řwest n Israiliyyen, ina ɣar uɣezdis d ina ɣar uɣezdis nneɣni, uca nitni ɣeřben xasen ařami war zzaysen iqqim uřa d ijjen iddar niɣ izemmar ad yarweř. ^■   23 Menɛen ajeǧid n Ɛay am iddar ɛad u iwyen t ɣar Yacuwa.

24 Umi ayt n Israil kemmřen ad nɣen marra imezdaɣ n Ɛay, am deg iyyar am di řexřa mani tuɣa ten dd-ḍfaren uca ttwanɣen marra s řeqḍeɛ n ssif, xenni iɛqeb Israil ɣar Ɛay uca wtin tt s řeqḍeɛ n ssif. 25 Marra inni ittwanɣen deg wass nni, iryazen d temɣarin, tuɣa aten di tenɛac-ařaf, dayes marra iryazen n Ɛay. 26 Yacuwa war issehwi afus nnes i isswiẓẓḍen s uḥric ařami tuɣa iḥarrem marra imezdaɣ n Ɛay i uteḥḥi. 27 Ksin Israiliyyen mɣir řebhayem d tkeccaḍt n tendint nni i yixef nsen ɛlaḥsab awař n SIDI, awař nni yumur Netta i Yacuwa. ^■   28 Issecmeḍ Yacuwa tandint n Ɛay uca yarra i-tt d ict n arwina i řebda, d ict n řxarbet, ař ass-a. 29 Netta yuyeř ajeǧid n Ɛay ɣar ict n teḥnact ař tameddit u umi teɣři tfuct, yumur Yacuwa ad kksen řxecbet nnes zi teḥnact. Nḍaren tt ɣar wadaf n tewwart n tendint u ssbedden xas ijj n uɛurric d ameqqran n yeẓra, i din iǧan ɛad ař ass-a. ^■  

30 Xenni ibna Yacuwa ijj n uɛalṭar i SIDI, AREBBI n Israil, x wedrar n Ɛibal, 31 am mammec t yumur Musa, amsexxar n SIDI, i ayt n Israil, ɛlaḥsab min yuran deg wedlis ittwannḍen n Ccariɛa n Musa: ijj n uɛalṭar n weẓru qaɛ, war xas imeyyeř s ijj n dduzan n wuzzař zi ssa ɣar da. Nitni bexxaren xas tiɣarṣa n tmessi i SIDI. Ɣarṣen ɛawed tiɣarṣa n řehna. ^■   32 X yeẓra igga netta ict n tiřemt n tira n Ccariɛa n Musa, tenni yura zzat i wudem n ayt n Israil. ^■   33 Marra ayt n Israil d imɣaren d iweqqafen d řquḍat bedden ɣar uɣezdis-a u ɣar uɣezdis nneɣni n Ttabut qibač i ikehhanen zi ayt n Lawi inni yarbun Ttabut n Řɛahd n SIDI, am ubarrani am aytbab n temmurt. Azyen zzaysen tuɣa zzat n wedrar n Jirizim u azyen nneɣni ɣar zzat n wedrar n Ɛibal, am mammec tuɣa yumur Musa, amsexxar n SIDI zic, i ubarek n ayt n Israil. 34 Awarni i uya iɣra marra awařen n Ccariɛa, lbaraka d nneɛřet, ɛlaḥsab marra min yuran deg wedlis ittwannḍen n Ccariɛa. 35 Zi marra min tuɣa yumur Musa, war iǧi uřa d ijj n wawař, war t iɣri Yacuwa i marra agraw n řgens n Israil, uřa d timɣarin d iḥenjiren imeẓyanen d ubarrani wenni akidsen iruḥen, tuɣa aten din. ^■