1 Xenni igeɛɛed Musa zi řewḍat n Mu’ab ɣar wedrar n Nabu, ɣar tqiccet n Fisja nni iǧan nican zzat n wudem n Ariḥa uca isscen as SIDI marra tammurt, zi Jilɛad ař Dan, ^■   2 marra Naftali d temmurt n Ifrayim d Manassa d marra tammurt n Yahuda ɣares ař řebḥar d min din awarni as. 3 d Temmurt n Ljanub d udewwar n řewḍa n Ariḥa, tandint n tcejjura n tini ař Ṣuɣar. 4 Uca inna as SIDI: “Ta d tammurt nni x jjuǧeɣ i Ibrahim, i Isḥaq d Yaɛqub, nniɣ: ‘I zzariɛet nnek, ad tt wceɣ!” Jjiɣ cek ad tt tẓared s tiṭṭawin nnek, maca war tẓekkʷid ca diha.” ^■  

5 Ammu immut dinni Musa, amsexxar n SIDI, di temmurt n Mu’ab, am mammec awař i dd-iffɣen zeg uqemmum n SIDI. 6 Uca Netta inḍeř i-t di teɣzurt di temmurt n Mu’ab qibač i Bayt-Faɣur uca uřa d ijj ma issen amcan n wenḍeř nnes ař ass-a. 7 Tuɣa Musa ɣares mya u-ɛicrin n iseggʷusa umi immut. Tiṭṭ nnes war teɣri ca, war d as iruḥ řemɛezz. 8 Sɣuyyen ayt n Israil x Musa di řewḍat n Mu’ab třatin n wussan uca ammu i ttwakemmřen ussan n iɣuyyan d wecḍan n Musa.

9 Yacuwa, mmis n Nun, tuɣa iccur s buḥbeř n tiɣit, minzi Musa tuɣa issars xas ifassen nnes u ayt n Israil sřin ɣares uca ggin am mammec t yumur SIDI i Musa. ^■  

10 Ɛemmarṣ ɛad war dd-ikkar anabi di Israil amecnaw Musa, wenni i tuɣa issnen SIDI udem ɣar wudem,

11 s marra řeɛřamat nni zi t issekk SIDI ḥima ad tent igg di temmurt n Miṣra, zzat i Firɛun d marra imsexxaren nnes d marra tammurt nnes,

12 u s marra afus nni ijehden u s marra timegga imɣaren issaggʷaden, tinni igga Musa zzat i tiṭṭawin n marra Israil.