1 D ta d lbaraka nni zi ibarek, Musa, aryaz n SIDI, ayt n Israil qbeř řmewt nnes. 2 Inna: “SIDI yusa-dd zeg wedrar n Sina, igeɛɛed-dd ittwesseg arendad nsen zi Saɛir, tuɣa ittissiq umi dd-iban zeg wedrar n Faran uca yusa-dd zi jar ɛecra-ařaf n Zzawect Iqeddsen. Zeg ufus nnes afusi issberbic s wassamen arendad nsen i nitni. ^■  

3 Wah, Netta ittexs řegnus! Marra imqeddasen iǧan deg ufus nnek, aqa aten ɣar iḍaren nnek, wah ad ikkar řgens i wawařen nnek.”

4 Musa yumur aneɣ x Ccariɛa, aqa-tt d řwart n tmesmunt n Yaɛqub.

5 Tuɣa Netta d Ajeǧid di Yacurun umi nyarwen izeǧifen n řgens, jmiɛ ak-d tqebbař n Israil.

6 “Iři ad iddar Rubin u war ittmetti uca iři war ttiřin iryazen nnes udrusen!”

7 D man aya i inna x Yahuda: “A SIDI, seř ɣar tmijja n Yahuda uca yarr i-t ɣar řgens nnes. S ifassen nnes imneɣ di ṭṭweɛ nnes uca iři Cek ad as iwc afus ḍidd n yinni d as iḥṣaren!” ^□  

8 U x Lawi inna: “Tummim nnek d Urim nnek ad iřin i weryaz nni d ameddukkeř amtiqqi nnek, wenni tqeǧbed di Massa, ak-d wi tqacḥed ɣar waman n Mariba,

9 wenni innan x babas d yemmas: ‘War ten ttwiřiɣ!’, d wenni war issɛizz x yaytmas niɣ war ixs ad issen iḥenjiren nnes, minzi nitni ṭṭfen di min tennid Cek uca ḥḍan Řɛahd nnek.

10 Nitni ad ssřemden lfarayiḍ nnek i Yaɛqub u Ccariɛa nnek i Israil. Ad ssuyusen řebxur zzat i wenzaren nnek uřa d taɣarṣt n wecmaḍ ikemmřen x uɛalṭar nnek.

11 Barek tizemmar nnes di min igga, a SIDI, uca ṭṭef arḍa s řxedmet n ifassen nnes, ɣḍeř timeṣṣaḍin n yinni akides ittemɛařan d n yinni t icarrhen ḥima ɛemmarṣ war ttbeddin ɛad!”

12 U x Binyamin inna: “Amɛizz n SIDI, netta ad ɣares izdeɣ di řaman, ass marra ad t ideř uca ad izdeɣ jar tiɣarḍin nnes!” ^□  

13 U x Yusuf inna: “Ad ibarek SIDI tammurt nnes s min iǧan iɣřan qaɛ zeg ujenna, s nnda, u s waman yuǧɣen nni din iǧan swadday. ^■  

14 u s řɣiǧet iɣřan n tfuct u s min iǧan iɣřan i ittic uyur

15 u s tqiccatin n idurar tiqdimin u s řqimet n tewririn n řebda

16 u s min iǧan iɣřan aṭṭas n temmurt d uɛemmar nnes u s tcuni n wenni tuɣa izeddɣen di cbarq ak-d isennanen. Iři ad dd-yas x uzeǧif n Yusuf u x tuccent n ucewwaf n wenni ittwaɛezzřen x aytmas s temrist. ^■  

17 Amenzu n ufunas nnes d ucewwar nnes u accawen nnes amecnaw accawen n ufunas n řexřa, ad zzaysen iwwet řegnus marra jmiɛ ař tineggura n ddunect. Ina d ɛecra n řuřuf n Ifrayim u ina d řuřuf n Manassa!”

18 U x Zabulun inna: “Farḥ, a Zabulun, s wuffuɣ nnek, u cek, a Isakkar!, farḥ s iqiḍan nnek.

19 Ad řaɣan i řegnus ɣar wedrar. Din i ɣa ɣarṣen tiɣarṣa n tsegda, minzi ad ẓemmen afeyyeḍ n řebḥur d txubay innufaren deg ijdi.”

20 U x Jad inna: “Ad ittwabarek wenni iggin ttasiɛ i Jad! Netta izeddeɣ amecnaw tayradt uca icarreg as aɣiř ak-d uceqquf n uzeǧif. 21 Iksi tammurt icnan i yixef nnes, minzi aqa din tᵉttwaḥḍa tesɣart n umgewwad s weḍman. Yusa-dd ak-d izeǧifen n řgens, ikemmeř tasegda n SIDI d řeḥkamat nnes, jmiɛ ak-d Israil.”

22 U x Dan inna: “Dan d ijj n mmis n wayrad nni i ineggzen ɣar zzat zi Bacan.”

23 U x Naftali inna: “A Naftali, iři tejjiwned s tcuni u teccured s lbaraka n SIDI. Ksi lɣarb d ljanub d řwart.”

24 U x Acir inna: “Acir aqa ittwabarek ak-d iḥenjiren nnes. Iři ad yaf arḍa zeg aytmas uca ad issur aḍar nnes di zzect. 25 Zzekrunat nnek aqa aten zeg wuzzař d nnḥas, ad yiři jjehd nnek amecnaw ussan nnek!”

26 “War din iǧi amecnaw AREBBI, a Yacurun, wenni innayen x ujenna ḥima ad ac iwc afus u wenni innayen x iseynuten s lɛaḍama nnes. ^■  

27 AREBBI n řebda d tazeddiɣt i udurri, u swadday ttɛawanen iɣaǧen nnes n řebda. Netta ad yaẓẓeř x řeɛdu zzat i wudem nnek, ad yini: ‘Aredeǧ!’ 28 Israil ad izdeɣ weḥḥḍes di řaman. Ad yiři wanu n Yaɛqub deg ict n temmurt iccuren n irden d binu n jdid, wah, ijenwan nnes ad udmen s nnda. ^■  

29 Sseɛd nnek, a Israil! Wi iǧan amecnaw cek? Ijj n řgens ittwasnejmen zi SIDI. Aqa Netta d aseřqi i uɛawen uřa d ijj n ssif n lɛaḍama nnek. Řɛedyan nnek ad ssniɛmiřen ad sswaḍɛen i cek uca cek ad tdarrced x idemrawen nsen!”