1 “Sřem, a ijenwan, ad ssiwřeɣ!

Ejj tammurt ad tseř i wawařen n uqemmum inu!

2 Ejj taɣuri inu ad tudem amecnaw anẓar,

ad hwant tiwařin inu amecnaw nnda,

amecnaw ict n thiḍurt x uɣemmuy aziza

u amecnaw tinecnacin x wefsu,

3 minzi necc ad barrḥeɣ Isem n SIDI,

arrem-dd řemɣaret i AREBBI nneɣ!

4 Netta d Taṣḍart, řxedmet nnes nican,

minzi marra ibriden nnes ttwaseggden,

ijj n Arebbi d amtiqqi břa řɣecc,

aqa-t d amsegged d nican i yeǧa.

5 Řgens aqa issefsed ixef nnes,

nitni war ǧin ca d iḥenjiren nnes,

řɛib aqa-t xasen,

aqa-t d ijj n jjiř ifarɣ u ixnunnes.

6 Ma texsem ad teggem aya i SIDI,

a řgens abuhaři d wefɣur!

Ma war iǧi Netta d Babac nni cek isɣin,

d wenni cek iggin u d wenni cek ikewwnen?

7 Idarem ussan iɛdun,

xemmem iseggʷusa n jjiř ař jjiř nneɣni,

seqsa babac u netta ad ac t iɛawed

u seqsa imɣaren u nitni ad ac t inin.

8 Umi iwca Umɛuǧi x kuřci tasɣart nnes i marra řegnus,

umi ibḍa iḥenjiren n Adam, issgeɛɛed iymiren n řegnus

ɛlaḥsab řqedd n ayt n Israil.

9 Minzi tasɣart n SIDI d řgens nnes,

Yaɛqub d afiřu n řeɛbar n tesɣart nnes.

10 Yufa i-t di temmurt n řexřa,

di tnezruft ixřan ak-d řewḥuc i ittzun,

inneḍ as-dd, isseřmed i-t,

iḥḍa i-t amecnaw mummu n tiṭṭ nnes.

11 Amecnaw agider nni issfaqen řɛucc nnes,

iṭṭaw sennej i warrud nnes zi ssa ɣar da,

ittbezzeɛ afriwen nnes,

iksi i-t uca yarebbu t x wafriwen nnes,

12 ammu indeh i-t SIDI waha

uca war tuɣi din akides ca n arebbi d aɣrib.

13 Issenya i-t x tɛuřař n temmurt

uca icca řɣiǧet n yeyyar.

Ijja i-t ad iẓemm tamment zi jjarf,

d zzect zeg weẓru n teṣḍart, ^■  

14 třussi n tfunasin d uɣi n wuǧi,

s tadunt n izmaren d icarriyyen,

inni iǧan amecnaw tarwa n Bacan, d iɣayḍen,

s mummu n waren n irden.

Ɛawed cek teswid zeg idammen n uḍiř, binu iṣfan.

15 Idweř Yacurun iqbubbez uca iẓẓeɛbeḍ

- ‘Aqa tmesřed u teqbubbzed, wah, s tadunt tᵉttwadřed!’ -

uca ismeḥ di Arebbi nni t dd-ixeřqen

uca isseḥqar Taṣḍart n usenjem nnes.

16 S irebbiten iɣriben ssekkaren tusmi nnes,

s jjɛayef sɛaren t.

17 Nitni qeddmen tiɣarṣa i ccwaṭen, war iǧi i Arebbi,

i irebbiten nni war ssinen,

irebbiten n jdid, inni dd-yusin ɛad mammec,

war zzaysen ttarjijjen ibabaten nwem.

18 Taṣḍart nni cek dd-yejjin, tsemḥed dayes

u tᵉttud Arebbi nni i cek dd-yurwen s řewjeɛ.

19 Iẓra SIDI man aya uca issehqar i-ten,

zi ssibbet n usduqqez n iḥenjiren nnes d yessis.

20 Netta inna: ‘Ad zzaysen ffareɣ udem inu,

ad ẓareɣ mammec i ɣa yiři zman uneggaru nsen,

minzi nitni d ijj n jjiř ittneqřab,

d tarwa i di war iǧi řmanet.

21 Nitni ssekkaren tusmi inu s min war iǧin d Arebbi,

sɛaren ayi s řexyařat nsen ibeṭṭiřen.

Necc ad ssekkareɣ tusmi nsen s min war iǧin d řgens,

s yijj n řgens d abuhaři ad ten sɛareɣ. ^■  

22 Minzi s weɣḍab inu tekkar tmessi,

ad tecmeḍ ař řaxart din swadday

uca ad tecc tammurt d řɣiǧet nnes

u ad tessecmeḍ tisi n idurar. ^■  

23 Necc ad asen arniɣ iceřwawen,

ad xasen neyyceɣ fřitcat inu.

24 Ad ttwaheyyfen s řaẓ

uca ad ttwaṣarḍen s ṭṭaɛun u s wareddeǧ amerzag

u Necc ad daysen ssekkeɣ tiɣmas n řmař

s ssem ineqqen n ifiɣran inni ittmuǧuɣen di tɛejjajt.

25 Zi barra ad ikkes ssif tarrawt

u zeg wexxam n daxeř ad teřqef tiggʷudi:

am ubřiɣ am taɛzarect, aseymi ak-d umeccaybu.

26 Tuɣa xseɣ ad iniɣ: ‘Am usemmiḍ ad ten faretkeɣ,

ggur ad ssbeddeɣ řidaret nsen jar iwdan’,

27 mři war ggʷideɣ zeg wesɛar n řeɛdu,

ḥima iɣrimen nsen war t nekkaren uca ad inin:

‘Ifassen nneɣ, inni ittwasgeɛɛden ammu s jjehd,

ggin aya marra, war iǧi d SIDI.’

28 Minzi nitni d ijj n řgens břa array

u war daysen d řefhamet.

29 Mři ggin tiɣit, xenni iggur ad fehmen aya

u ad wcen taynit i uneggar nsen.

30 Mammec izemmar ad iḍfar ijj n bnadem ařef n iwdan

u mammec zemmaren tnayen ad arren ɛecra-ařef ad arewřen

mařa war d asen temmenz Teṣḍart nsen

uca war d asen isellem SIDI i nitni?

31 Minzi taṣḍart nsen maci amecnaw Taṣḍart nneɣ.

Ejj ad ḥekmen řɛedyan nneɣ s ixef nsen.

32 Minzi tazayart nsen teǧa zi tzayart n Sadum

u zeg iyyaren n Ɛamurra

u aḍiř nsen d aḍiř n ssem

u ɣarsen izekkunen ccuren s tarzugi. ^□  

33 Binu nsen amecnaw aṣudi n tmessi n řhaycat

u amecnaw ssem ineqqen n třefsiwin.

34 Ma marra aya war ɣari ittwaxzen,

ittwacemmeɛ deg ixxamen n txubay inu?

35 D Necc i yeǧan x nneqmet d řexřaṣ,

xmi i ɣa iḥřuǧeḍ uḍar nsen.

Ass n uḍeyyeɛ nsen aqa yudes

uca min igguren ad xasen dd-yiři, ad imsar deɣya. ^■  

36 Minzi SIDI ad igg tasegda i řgens nnes,

uca ad iḥenn x imsexxaren nnes xmi i ɣa iẓar belli jjehd immeksi

uca war din iqqim ɛad wenni ittwaṭṭfen d wenni ijjin. ^□  

37 Xenni ad yini: ‘Mani iǧan irebbiten nsen,

taṣḍart nni di nnufaren,

38 irebbiten nni zi ccin tadunt n tɣarṣa nsen,

inni zi sessen binu n tewhibin n useyyeb nsen?

Ejj i-ten ad kkaren, ad cek ɛawnen

u ejj i-t ad xawem issduři.’

39 Xzarem řexxu, belli NECC d NECC i ǧiɣ,

u war din ca uřa d ijj n arebbi akidi.

Necc neqqeɣ u Necc sseddareɣ,

Necc tteḥḥiɣ u ssgenfiɣ

u war din wi i ɣa inejmen zeg ufus inu. ^■  

40 Minzi Necc ad sswiẓẓḍeɣ afus inu ɣar ujenna,

ad iniɣ: ‘Necc aqa ddareɣ i řebda!’

41 Mařa ssqeḍɛeɣ ssif inu ittwessgen

uca afus inu ad iṭṭef di řḥukm,

xenni Necc ad ntaqmeɣ zi řɛedyan inu

u zeg inni d ayi icarrhen.

42 Ad sscareɣ fřitcat n řqews inu s idammen

uca ssif inu ad iṣarḍ aysum

n idammen n wenni ittwanɣen u n wenni ittwaḥebbsen

u zeg uzeǧif n řeɛdu ak-d ijeṭṭayen n ucewwaf nnes. ^□  ■  

43 Sřiwřewem, a řegnus!, ak-d řgens nnes,

minzi Netta ad intaqem i idammen n imsexxaren nnes

uca ad dd-ittarri nneqmet x řeɛdu nnes

uca ad ifdi x temmurt nnes d řgens nnes.” ^□  ■  

44 Yusa-dd Musa uca issiweř marra awařen n tizřit-a x imezzuɣen n řgens, netta d Huciɛa, mmis n Nun. ^□   45 Umi ikemmeř Musa marra awařen-a i zi issiweř ɣar marra Israil, 46 inna asen: “Arrem marra awařen-a nni x d awem nniɣ ass-a ɣar wuř nwem, ḥima ad ten tumurem i iḥenjiren nwem maḥend ad ḥḍan marra awařen n Ccariɛa aya ad zzaysen ggen, 47 minzi war iǧi d awař n baṭeř i kenniw, maca d tudart nwem. S wawař-a ad tezzuggartem ussan nwem x temmurt i ɣar i ɣa teẓwim x L'Urdun maḥend ad tt tᵉṭṭfem d řwart.”

48 Issiweř SIDI ak-d Musa deg wass nni, inna:

49 “Gaɛɛed adrar n Abarim, aqa-t d adrar n Nabu nni iǧan di temmurt n Mu’ab arendad n Ariḥa, uca xzar tammurt n Kenɛan nni i ɣa wceɣ d řwart i ayt n Israil, ^■   50 uca mmet x wedrar nni ɣar i ɣa tgeɛɛded, ttwasmun ɣar řejdud nnek, am mammec immut umac Harun x wedrar n Hur uca ittwasmun ɣar řejdud nnes, ^■   51 minzi kenniw teɣdařem zzayi di řwest n ayt n Israil ɣar waman n Mariba-Qadac di řexřa n Ṣin, minzi kenniw war d ayi tessqeddsem di řwest n ayt n Israil. ^■   52 Xenni řexxu ad ṭẓared tammurt zzatek, maca war ttidfed ca ɣar temmurt nni i ɣa wceɣ i ayt n Israil.”