1 Iruḥ Musa uca issiweř s wawařen-a ak-d marra Israil, 2 inna asen: “Ass-a necc ɣari mya u-ɛicrin n iseggʷusa. War zemmareɣ ɛad ad ffɣeɣ uřa ad adfeɣ uca SIDI inna ayi: ‘War tẓekkʷid iɣzar-a n L'Urdun!’ ^■   3 SIDI, AREBBI nnek, ad iẓwa zzat i wudem nnek. Netta ad yareddeǧ řegnus-a zzat i wudem nnek uca ad tᵉṭṭfed řwart nsen. Yacuwa, d wenni i ɣa iẓwan zzat i wudem nnek, am mammec inna SIDI. ^■   4 SIDI ad kisen igg am mammec igga ak-d Siḥun d Ɛuj, ijeǧiden n Imuriyyen, u ak-d temmurt nsen. Netta yareddeǧ i-ten. ^■   5 Xmi ten i ɣa isellem SIDI zzat i wudem nwem, ad kisen teggem ɛlaḥsab marra tawṣeyyet nni zi kenniw weṣṣiɣ^■   6 Iřim d iryazen u iřim tmeḥḍem, war tteggʷedem, war ttarjijjem ca zzat i wudem nsen, minzi SIDI, AREBBI nnek, d wenni akidek igguren. Netta war dayek isemmeḥ niɣ cek ittejji.” ^■  

7 Uca Musa iřaɣa i Yacuwa, inna as zzat i tiṭṭawin n marra Israil: “Iři d aryaz u iři tmeḥḍed, minzi ad tadfed ak-d řgens-a ɣar temmurt nni ijjuǧ SIDI i ibabaten nsen ad asen tt-i-dd-iwc uca cek ad ten tejjed ad tt ṭṭfen d řwart. 8 SIDI d wenni yuyuren zzat i wudem nnek, d Netta i ɣa yiřin akidek, war cek ittettu ca niɣ ad dayek ismeḥ. War tteggʷed u war ttarjijji.” ^■  

9 Yura Musa Ccariɛa aya uca iwca i-tt i ikehhanen, ayt n Lawi, inni yarbun Ttabut n Řɛahd n SIDI, u i marra imɣaren n Israil.

10 Musa yumur i-ten, inna: “Awarni i sebɛa n iseggʷusa, di řweqt ittwaggen n useggʷas n ufekki n imerwusen di Řɛid n Iɛuccuten,

11 xmi i ɣa imun marra Israil maḥend ad iḥḍar zzat i wudem n SIDI, AREBBI nnek, deg wemcan nni i ɣa ixḍar Netta, ad tɣared s jjehd Ccariɛa aya zzat i marra Israil deg imezzuɣen nsen. ^■  

12 Ejj ad imun řgens, iryazen d temɣarin d iḥenjiren d ibarraniyyen nni iǧan ɣar daxeř n tewwura nnek ḥima ad sřen u ḥima ad řemden ad ggʷeden SIDI, AREBBI nwem uca ad ḥḍan marra awařen n Ccariɛa aya

13 u ḥima iḥenjiren nsen nni war tt issinen, ad sřen uca ad řemden ad ggʷeden SIDI, AREBBI nwem marra ussan nni i ɣa teddarem x temmurt nni ɣar i ɣa teẓwam x L'Urdun maḥend ad tt tᵉṭṭfem d řwart.”

14 SIDI inna i Musa: “Aqa iwḍen-dd wussan nnek i di ɣa temmted. Řaɣa i Yacuwa u ssbeddem ixef nwem deg Uqiḍun n Umsagar ḥima ad t umureɣ.” Musa d Yacuwa ruḥen, bedden deg Uqiḍun n Umsagar.

15 Xenni iban-dd SIDI deg Uqiḍun, deg ijj n uqellij n useynu, uca ibedd uqellij n useynu sennej i wadaf n Uqiḍun.

16 SIDI inna i Musa: “Aqa cek ad tᵉttwasmuned ak-d řejdud nnek uca xenni řgens-a ad ikkar ad issefsed ixef nnes am i ɣa yuyur awarni i irebbiten n ibarraniyyen n temmurt nni ɣar i ɣa yadef ař řwest nnes uca řgens ad dayi ismeḥ, ad yarẓ Řɛahd inu wenni kidsen ggiɣ.

17 Deg wass nni ad yareɣ weɣḍab inu x řgens uca ad ten jjeɣ, ad zzaysen ffareɣ udem inu uca ad ittwaṣṣarḍ řgens uca ad xas dd-asen waṭṭas n iceřwawen d řeḥṣarat, ař ɣa yini deg wass nni: ‘Ma war xafi dd-usin iceřwawen-a, minzi AREBBI war kidi iǧi?’ ^□  

18 Deg wass nni ad ffareɣ udem inu marra di ssibbet n řɣar nni igga umi idweř ɣar irebbiten nneɣni.

19 Řexxu xenni, ari tizřit-a i yixef nwem uca seřmed i-tt i ayt n Israil, egg i-tt deg uqemmum nsen, ḥima tizřit-a ad tiři d acehhad di ṭṭweɛ inu ḍidd i Israil, 20 minzi Necc ad ssidfeɣ řgens-a ɣar temmurt nni x jjuǧeɣ i ibabaten nsen ad asen tt wceɣ, ict n temmurt nni ifeyyḍen s uɣi d tamment, uca ad ccen, ad jjiwnen, ad dewřen qbubbzen. Xenni ad dewřen ɣar irebbiten nneɣni, ad xasen sexxaren uca ad ayi ssduqzen, ad arẓen Řɛahd inu. 21 Uca ad imsar umi d as dd-usin i řgens-a aṭṭas n iceřwawen d řeḥṣarat, aqa xenni tizřit-a ad dd-tarr deg wudem nnes amecnaw ijj n ucehhad, minzi war tᵉttiři tᵉttwattu zeg uqemmum n tarwa nnes, minzi Necc ssneɣ axarreṣ nni ɛad iḥeṭṭa ass-a, qbeř ma ad t ssidfeɣ di temmurt nni x jjuǧeɣ ad asen tt wceɣ.” ^□  

22 Deg wass nni, yura Musa tizřit-a uca isseřmed i-tt i ayt n Israil. 23 Uca Netta yumur i Yacuwa, mmis n Nun, inna: “Iři d aryaz u iři tmeḥḍed, minzi ad tessidfed ayt n Israil di temmurt nni x d asen jjuǧeɣ maḥend ad asen tt wceɣ uca Necc ad akidek iřiɣ.” ^■  

24 Uca imsar umi ikemmeř Musa tira n wawařen n Ccariɛa aya deg ijj n wedlis ittwannḍen, ař aneggar nsen, 25 aqa Musa yumur Ilawiyyen nni yarbun Ttabut n Řɛahd n SIDI, inna: 26 “Ksim adlis-a n Ccariɛa ittwannḍen uca teggem t zzat i Ttabut n Řɛahd n SIDI, AREBBI nwem, maḥend ad din yiři d acehhad ḍidd nwem, ^■   27 minzi necc ssneɣ aɣewweɣ nwem d tɣennant nwem. Xzar, umi necc ddareɣ ɛad akidwem ass-a, kenniw aqa tɣewwɣem x SIDI, mecḥař ɛad ktar i ɣa teggem awarni i řmewt inu! 28 Smunem-dd ɣari marra imɣaren n tqebbař nwem d iweqqafen nwem, xenni ad ssiwřeɣ awařen-a deg imezzuɣen nsen uca ggiɣ xasen ijenwan d temmurt d řechud ḍidd nsen, 29 minzi necc ssneɣ aqa awarni řmewt inu ad tfesdem nican uca ad teffɣem x webrid nni x kenniw umureɣ. Deg uneggar n wussan, ad teggem řɣar di tiṭṭawin n SIDI ař ɣa t tesɛarem s řxedmet i teggim s ifassen nwem.”

30 Xenni issiweř Musa deg imezzuɣen n marra agraw n řgens n Israil s wawařen n tizřit-a ařami ten ikemmeř.