1 “Xmi xak i-dd ɣa yasent marra tmesřayin-a, lbaraka d nneɛřet nni ggiɣ zzatek, uca ad tent tarred ɣar wuř nnek jar marra řegnus ɣar mani SIDI, AREBBI nnek, xak yuẓẓeř, 2 uca ad tɛeqbed ɣar SIDI, AREBBI nnek, ad tesřed i tmijja nnes s marra uř nnek u s marra řeɛmar nnek anect n marra min x cek umureɣ ass-a, cek jmiɛ ak-d iḥenjiren nnek, 3 xenni SIDI, AREBBI nnek, ad ibḍeř aḥebbes nnek uca ad xak yarḥem uca ad cek issmun zi jar marra řegnus ɣar mani cek ibezzeɛ SIDI, AREBBI nnek. ^■   4 Waxxa inni x yuẓẓřen zzayek tuɣa aten ɣar uneggaru n ujenna, aqa SIDI, AREBBI nnek, ad cek issmun uca ad cek indeh ssenni. ^■   5 SIDI, AREBBI nnek, ad cek issidef ɣar temmurt nni warten ibabaten nnek uca ad tt teksid ɛawed d řwart. Netta ad dayek igg tcuni u ad dayek yarni ɛad ktar zi ibabaten nnek. 6 SIDI, AREBBI nnek, ad ixten uř nnek d wuř n tarwa nnek ḥima ad texsed SIDI, AREBBI nnek, s marra uř nnek d marra řeɛmar nnek, ḥima ad teddared.^■   7 SIDI, AREBBI nnek, ad yarr marra nnɛaři nni x řɛedyan nnek d x yenni cek icarrhen, inni xak dd-idarrcen ɛawed. 8 Ad tɛeqbed, ad tesřed i tmijja n SIDI uca ad tegged marra řumurat nni x d ac ttumureɣ ass-a. 9 SIDI, AREBBI nnek, ad ac iwc afeyyeḍ di marra řxedmet n ifassen nnek, di řɣiǧet n uɛeddis nnek, di řɣiǧet n řebhayem nnek u di řɣiǧet n temmurt nnek, aya ad yiři i řxar nnek, minzi SIDI ad iɛqeb ḥima ad zzayek ifarḥ i řxar nnek, am mammec tuɣa ifarḥ i ibabaten nnek, ^■  

10 Xmi i ɣa tesřed i tmijja n SIDI, AREBBI nnek ḥima ad teḥḍid řumurat nnes d tweṣṣa nnes nni yurin deg wedlis-a ittwannḍen n Ccariɛa uca xmi dd ɣa tdewřed ɣar SIDI, AREBBI nnek, s marra uř nnek, s marra řeɛmar nnek.

11 Minzi řumur-a i x cek ttumureɣ necc ass-a, war iǧi yuɛřa xak uřa war iggʷij ca.

12 War iǧi deg ujenna, ḥima ad tinid: ‘Wi i ɣa igeɛɛden ɣar ujenna di ṭṭweɛ nneɣ ḥima ad aneɣ t-i-dd yawi i neccin uca ad as nseř ḥima ad nzemmar ad zzayes negg?’ ^■  

13 War iǧi x ujemmaḍ n řebḥar, ařami i ɣa tzemmared ad tinid: ‘Wi i ɣa iẓwan ɣar ujemmaḍ n řebḥar ḥima ad aneɣ t-i-dd yawi i neccin uca ad as nseř ḥima ad nzemmar ad zzayes negg?’

14 minzi awař-a yudes i cek aṭṭas, aqa-t deg uqemmum nnek, aqa-t deg wuř nnek, ḥima ad zzayes tegged.

15 Xzar, necc ggiɣ zzatek ass-a tudart d řxar uřa d řmewt d řɣar,

16 minzi necc ttumureɣ cek ass-a ḥima ad texsed SIDI, AREBBI nnek, ad tuyured deg ibriden nnes uca ad teḥḍid řumurat nnes d tweṣṣa nnes d lfarayiḍ nnes maḥend ad teddared u ad tᵉttwammarnid, uca SIDI, AREBBI nnek, ad ac ibarek di temmurt nni ɣar i ɣa tadfed ḥima ad tt tᵉṭṭfed d řwart.

17 Maca mařa uř nnek ittaggʷej uca war tᵉttesřid uca ad tᵉttwasuffɣed zeg webrid, ad tuḍared zzat i irebbiten nneɣni uca ad asen tsexxared,

18 xenni necc ttbarrḥeɣ awem ass-a belli s tidett ad temmtem. War tarennyed ca ussan nnek x temmurt mani i ɣa tadfed awarni řami teẓwid L'Urdun, ḥima ad tt tᵉṭṭfed d řwart.

19 Ass-a necc řaɣiɣ i ujenna d temmurt d řechud xawem: ggiɣ zzatek tudart d řmewt, lbaraka d nneɛřet! Ixḍar xenni tudart, ḥima ad teddared, cek d zzariɛet nnek, ^■   20 maḥend ad texsed SIDI, AREBBI nnek, uca ad tesřed i tmijja nnes, ad as třeṣqed, minzi Netta d tudart nnek uřa d tuzzegart n wussan nnek, ḥima ad tzemmared ad tzedɣed x temmurt nni x ijjuǧ SIDI i ibabaten nnek ad asen tt-i-dd-iwc, i Ibrahim d Isḥaq d Yaɛqub.”