1 Iřaɣa-dd Musa x marra Israil, inna asen: “Kenniw aqa teẓrim marra min igga SIDI di temmurt n Miṣra zzat i tiṭṭawin nwem di Firɛun d marra imsexxaren nnes d marra temmurt nnes, ^■   2 tiqeǧuba timeqqranin, tinni teẓrim s tiṭṭawin nnek, řeɛřamat d lmuɛjizat nni imɣaren. ^■   3 Ař ass-a SIDI war d awem iwci uř ḥima ad tfehmem uřa d tiṭṭawin ḥima ad tẓarem uřa d imezzuɣen ḥima ad tesřem. 4 Uyureɣ akidwem di řexřa arebɛin n iseggʷusa. Arruḍ nwem war idwiř d řbaři u tisiřa nwem war dduysarent x iḍaren nwem. 5 War teccim aɣrum, war teswim binu uřa d ccrab, ḥima ad tessnem belli Necc d SIDI, AREBBI nwem.

6 Řami treḥḥgem ɣar wemcan-a, iffeɣ-dd Siḥun, ajeǧid n Ḥacbun, ak-d Ɛuj, ajeǧid n Bacan, ḥima ad kidneɣ imsagar i umenɣi uca neɣřeb i-ten ^■   7 uca neṭṭef tammurt nnes uca newc i-tt d řwart i Irubiniyyen d Ijadiyyen u i wezyen n teqbič n Manassa. ^■  

8 Ḥḍam awařen n Řɛahd-a, teggem ten, ḥima ad tawḍem s řeɛqeř ɣar marra min ɣa teggem. 9 Ass-a marra kenniw tbeddem zzat i wudem n SIDI, AREBBI nwem - izeǧifen n tqebbař nwem d imɣaren nwem d iweqqafen nwem, marra iryazen n Israil,

10 d imeẓyanen nwem, d temɣarin nwem, d ibarraniyyen nni izeddɣen di řwest n řmargeḥ n řɛeskar nwem - zeg wenni ittqessen akeccuḍ ař wi i d ittaymen aman -

11 ḥima ad tadfem ɣar Řɛahd n SIDI, AREBBI nnek, u ɣar tjaǧit nnes, tenni ad kik iwta SIDI, AREBBI nnek, ass-a,

12 ḥima ad ac yegg ass-a ad tekkared amecnaw řgens nnes uca Netta ad ac yiři d AREBBI, am mammec i d ac inna u am mammec ijjuǧ i řejdud nnek Ibrahim d Isḥaq d Yaɛqub. ^■  

13 Maci kiwem waha i ɣa ggeɣ Řɛahd-a d tjaǧit-a,

14 maca ak-d yenni da ɣarneɣ iḥḍaren ass-a zzat i wudem n SIDI, AREBBI nneɣ, am ak-d yenni war da ɣarneɣ iǧin ass-a.

15 Minzi kenniw tessnem mammec tuɣa nzeddeɣ di temmurt n Miṣra u mammec neẓwa di řwest n řegnus nni x dd-tekkem uřa d kenniw,

16 uca teẓrim nnɛawat nsen n ṣṣanam d imeyḍa n l’aṣnam nsen n weẓru d ukeccuḍ d nnuqart d wureɣ, nni ɣarsen.

17 War ittiři jar awem aryaz niɣ tamɣart niɣ řaǧ niɣ taqbič nni uř nnes ad yaggʷej ass-a x SIDI, AREBBI nwem, ḥima ad isexxar i irebbiten n řegnus nni u war ittiři jar awem aẓwar nni i ɣa ittarwen afyum niɣ cciḥ, ^■  

18 uca ad imsar, umi ɣa iseř awařen n nneɛřet-a, aqa netta ad iseggem ixef nnes deg wuř nnes, ad yini: ‘Ad ɣari yiři řehna, waxxa ggureɣ di řeqsaḥet n wuř inu, ař i ɣa ihellek min issun ak-d min iffuden.’

19 SIDI war d as isemmeḥ, maca aɣḍab n SIDI d tusmi nnes ad dduxxnen deg weryaz nni, u marra nneɛřet nni yurin deg wedlis-a ittwannḍen ad xas tiři uca SIDI ad imḥa isem nnes zi sadu ujenna. 20 SIDI ad t iḥuz x marra tiqebbař n Israil i řɣar, ɛlaḥsab marra nnɛaři n Řɛahd nni yurin deg wedlis-a ittwannḍen n Ccariɛa aya. 21 Xenni jjiř i dd ɣa yasen, iḥenjiren nwem nni i ɣa igeɛɛden awarni awem d ubarrani nni i dd ɣa yasen zeg ict n temmurt tiggʷej, ad inin xmi i ɣa ẓaren jjrayeḥ n temmurt-a d řehřacat i zi issehřec SIDI tammurt: 22 ‘Řecbariyyet d tmeǧaḥt, aqa tecmeḍ marra tammurt, war ttiři tᵉttwaẓẓu niɣ tessɣemmi ɛad u war tessgiɛɛid afsu aziza, am mammec imsar deg uneqřeb n Sadum d Ɛamurra d Adma d Ṣabuyim nni issneqřeb SIDI deg weɣḍab nnes d wesɛar nnes!’ 23 uca ɛawed marra řegnus ad inin: ‘Mayemmi igga SIDI man aya i temmurt-a? Mana řḥaduq n weɣḍab-a imɣaren?’^■   24 Xenni ad arren: ‘Minzi nitni jjin Řɛahd n SIDI, AREBBI n ibabaten nsen, řɛahd nni qqnen akides umi ten dd-issuffeɣ zi temmurt n Miṣra. 25 Uyuren sexxaren i irebbiten nneɣni uca uḍaren ɣarsen, i irebbiten nni war ssinen nitni, war d asen tent-i-dd-iwci Netta. 26 Aɣḍab n SIDI yarɣa x temmurt-a maḥend ad ɣares indeh marra nneɛřet nni yurin deg wedlis-a ittwannḍen. 27 SIDI iqřeɛ i-ten zi temmurt deg weɣḍab d wesɛar d uduqqez n weɣḍab imɣar uca inḍar i-ten ɣar temmurt nneɣni, am teǧa ass-a.’ 28 Timesřayin innufaren aqa tent i SIDI, AREBBI nneɣ, maca timesřayin ttwasaregbent aqa tent i neccin u i iḥenjiren nneɣ i řebda, maḥend ad ttwaggen marra awařen n Ccariɛa aya.”