1 “Ad imsar, mařa tesřid mliḥ i tmijja n SIDI, AREBBI nnek, ad teḥḍid marra tiweṣṣa nnes nni x d ac ttumureɣ ass-a ḥima ad tent tegged, xenni ad cek issuɛřa SIDI, AREBBI nnek, x marra řegnus n temmurt. ^■   2 Marra lbarakat-ad xak dd-asent, ad ac-dd awḍent, mařa tesřid i tmijja n SIDI, AREBBI nnek.

3 Ad tᵉttwabarked di tendint u ad tᵉttwabarked deg iyyar.

4 Ad tᵉttwabarek řɣiǧet n uɛeddis nnek d řɣiǧet n temmurt nnek d řɣiǧet n řebhayem nnek d twarura n tfunasin nnek d imeẓyanen n wuǧi nnek.

5 Ad tᵉttwabarek tsuǧet nnek d tebqect nnek.

6 Ad tᵉttwabarked ɣar wadaf nnek, ad tᵉttwabarked deg wuffuɣ nnek.

7 SIDI ad isellem řɛedyan nnek nni xak i ɣa ikkaren d ibarḥaḍ zzat i wudem nnek. Ad xak dd-ffɣen deg webrid d ijj uca ad arewřen zzat i wudem nnek x sebɛa n ibriden.

8 SIDI ad ac yumur s lbaraka di tesrafin nnek u x marra min igga ufus nnek. Netta ad cek ibarek di temmurt nni d ac i ɣa iwc SIDI, AREBBI nnek.

9 SIDI ad cek yarr ad tekkared am ijj n řgens iqeddsen i Yixef nnes am mammec i d ac ijjuǧ, xmi i ɣa teḥḍid tiweṣṣa n SIDI, AREBBI nnek, uca ad tuyured deg ibriden nnes.

10 Marra řegnus n temmurt ad ẓaren belli Isem n SIDI ittwadenna xak uca ad zzayek ggʷeden.

11 SIDI ad ac iwc řxar s ufeyyeḍ di řɣiǧet n uɛeddis nnek u di řɣiǧet n řebhayem nnek u di řɣiǧet n temmurt nnek, di temmurt nni ijjuǧ SIDI ad ac tt-i-dd-iwc. ^■  

12 SIDI ad ac yarzem tawwart n wexxam n txubay iṣeřḥen, ijenwan, ḥima ad iwc anẓar i temmurt nnek di řweqt nnes u ḥima ad ibarek marra řxedmet n ufus nnek. Ad tarḍřed i waṭṭas n řegnus, maca cek war xasen areṭṭeř.

13 SIDI ad cek yarr d azeǧif, war iǧi d unewwar, uca cek waha ad tiřid sennej, war tᵉttiřid swadday, mařa tesřid i tweṣṣa n SIDI, AREBBI nnek, nni i d ac ttumureɣ ass-a ḥima ad tent teḥḍid uca ad zzaysent tegged.

14 War ttḥeyyid ca ɣar yeffus uřa ɣar uzeřmaḍ x marra awařen nni d ac umureɣ ass-a ařami i ɣa teḍfared irebbiten nneɣni, ad xasen tsexxared.

15 Maca ad imsar, mařa war tesřid i wawař n SIDI, AREBBI nnek, ḥima ad teḥḍid marra řumurat d tweṣṣa nnes i x d ac ttumureɣ ass-a, ḥima ad zzaysent tegged, xenni marra nnɛaři aya ad xak dd-hwant u ad cek řeqfent. ^■  

16 Ad tiřid d amenɛuř di tendint u ad tiřid d amenɛuř deg iyyar.

17 Tasuǧet nnek d tebqect nnek ad iřint ttwaneɛřent.

18 D tamenɛuřt i ɣa tiři řɣiǧet n uɛeddis nnek d řɣiǧet n temmurt nnek u twarura n tfunasin nnek d umarni n wuǧi nnek.

19 Ad tiřid d amenɛuř ɣar wadaf nnek u ad tiřid d amenɛuř deg uffuɣ nnek.

20 Ad ac dd-issekk SIDI nneɛřet d uxarweḍ d uheddi ɣar marra mani isswiẓẓed ufus nnek, ař ɣa tᵉttwamḥid u ad tefnid deɣya zzat i wudem inu di ssibbet n řexdayem nnek tiɛeffanin tinni x d ayi tejjid. 21 SIDI ad dayek isseřṣeq ṭṭaɛun ař cek i ɣa iqḍa zi temmurt nni ɣar i ɣa tadfed ḥima ad tt teksid d řwart.

22 SIDI ad cek iwwet s bu-deǧis, s tmessi n arwaḥ d ugeyyeḥ, s řeḥmu d řaẓaɣ, s imendi ittwascemḍen zeg usemmiḍ uřa d jjriḥect n tcejjart. Ina ad cek ḍfaren ař ɣa thellked. ^■   23 Ajenna nni iǧan tiwa i uzeǧif nnek ad yiři d nnḥas u tammurt nni iǧan sadu nnek d uzzař. ^■  

24 Ad yarr SIDI, AREBBI nnek, anẓar n temmurt nnek d ijj n useynu n řeɛjaj d ibquqen n řeɛjaj. Man aya ad xak dd-ihwa ař ɣa tᵉttwateḥḥid.

25 SIDI ad cek yarr tᵉttwaɣeřbed zzat i wudem n řɛedyan nnek. Deg ijj n webrid ad ɣares dd-teffɣed uca ad tarewřed zzat i wudem nnes x sebɛa n ibriden uca marra tigeldiwin n ddunect ad xak aẓẓrent. 26 Řxecbet nnek ad tiři d macca i ijḍaḍ n ujenna u i marra řmař x temmurt uca uřa d ijj war izemmar ad ten issiggʷed.

27 SIDI ad cek iwwet s tḥebba n Miṣra, s iɛebbuzen, s jdam, s wajjiḍ ař ɣa taf war tzemmared ad teggenfid. ^■  

28 SIDI ad cek iwwet s tubbuheřya, s tuddarɣeč u s arjef n wuř. 29 Deg wezyen n uziř ad tḥadid amecnaw aḥadi n udarɣař di taǧest. Ibriden nnek war ttiřin ṣeřḥen, wah, ad tiřid tᵉttwaḥṣared u tᵉttwakeccḍed marra ussan n tudart nnek uca war ittiři wi cek i ɣa issenjmen.

30 Ad txeḍbed ict n temɣart uca ijj n weryaz nneɣni ad tt issnuqqeb, ad tebnid taddart i yixef nnek uca war dayes tzeddɣed, ad teggid ijj n umarjuɛ n uḍiř ad dayes teẓẓud tizayarin maca war zzaysent testenfiɛed. 31 Afunas nnek ad ittwaɣarṣ zzat i tiṭṭawin nnek uca war zzayes tᵉttetted, aɣyuř nnek ad t ucaren zzat i wudem nnek uca war d ac dd-ittɛiqqib. Uǧi nnek ad t wcen i řɛedyan nnek uca war ɣarek ittiři wi i ɣa issenjmen. 32 Ad mmewcen iḥenjiren nnek d tḥenjirin nnek i yijj n řgens nneɣni. Tiṭṭawin nnek ad twařant uca ad daysen temmeẓred ass ikmeř uca war ittiři jjehd deg ufus nnek. 33 Řɣiǧet n temmurt nnek d marra řxedmet nnek ad t icc ijj n řgens i war tessined uca ad tiřid teḥṣared u ad třebzed waha marra ussan n tudart nnek. 34 Ad tdewřed d abuhaři zi ssibbet n min ɣa tẓared s tiṭṭawin nnek.

35 SIDI ad cek iwwet s tḥebba tiɛeffanin ɣar ifadden u ɣar iḍaren i zi war tzemmared ad zzaysen teggenfid, zi třeqqa n uḍar nnek ař aceqquf n uzeǧif nnek.

36 SIDI ad cek yarr jmiɛ ak-d ujeǧid nnek, wenni cek i ɣa tegged x yixef nnek, ad traḥed ɣar ijj n řgens nni war tessined ca uřa d ibabaten nnek uca din i ɣa tsexxared i irebbiten nneɣni n ukeccuḍ d weẓru. 37 Ad tiřid d ijj n řexyař n tiggʷudi, d ijj n umedya d ict n řqecɛet n ustehzi iqesḥen jar marra řegnus mani cek i ɣa indeh SIDI.

38 Ad tessuffɣed aṭṭas n zzariɛet ɣar yeyyar uca ad třeqḍed drus, minzi tamurɣi ad tt teḥřuw. ^■   39 Ad teggid imarjaɛen n uḍiř ad daysen teẓẓud tizayarin uca ad tent tɛarrṣed, maca war tsessed binu uca war třeqqḍed walu, minzi ad tent icc ukecca. 40 Ad ɣarek iřin izemmuren di marra tammurt nnek, maca war tdehhned ixef nnek s zzect, minzi ad iwḍa zzitun zeg uzemmur nnek qbeř řweqt. 41 Ad dd-tejjed iḥenjiren d tḥenjirin, maca war ttiřin ca nnek, minzi ad ruḥen di tmeḥbast. 42 Marra ticejjura d řɣiǧet n temmurt nnek ad tent tᵉṭṭef tmurɣi d tasɣart nnes.

43 Abarrani nni iǧan di řwest nnek, ad xak issuɛřa ixef nnes, sennej u sennej ɛad, uca cek ad tᵉttwassehwid ɣar temmurt, swadday ɣar wadday.

44 Netta ad ac yarḍeř, maca cek war d as tareṭṭřed. Netta ad yiři d azeǧif, cek ad tiřid d anewwar. 45 Uca ad xak dd-hwant marra nnɛaři aya, ad cek ḍfarent, ad cek řeqfent ař ɣa tᵉttwamḥid, umi war tesřid i tmijja n SIDI, AREBBI nnek, ḥima ad teḥḍid řumurat nnes d tiweṣṣa nnes, inni d ac yumur Netta. 46 Ad iřint d ict n řeɛřamet d ict lmuɛjiza i cek u i zzariɛet nnek i řebda.

47 Minzi war tsexxared i SIDI, AREBBI nnek s řefraḥet d tcuni n wuř zi ssibbet n ufeyyeḍ n marra min din iǧan, 48 ad tsexxared i řɛedyan, inni xak i ɣa issekk SIDI, s řaẓ d ufadi, s tuɛɛaryent d řexṣeṣ n marra timesřayin uca Netta ad igg azayřu n wuzzař x yiri nnek, ař cek i ɣa imḥa. 49 SIDI ad xak dd-issgeɛɛed ijj n řgens iggʷej, zeg uneggaru n temmurt, amecnaw ijj n ugider iṭṭawen, ijj n řgens i umi war tzemmared ad tfehmed iřes nnes, ^□   50 ijj n řgens ɣares udem iqḍeɛ, war ittweqqar awessar, war yareḥḥem x uḥenjir. 51 Ad yecc řɣiǧet n řebhayem nnek d řɣiǧet n temmurt nnek, ař ɣa tᵉttwamḥid, minzi war d ac ittejji irden, niɣ binu n jdid, niɣ zzect n ṭṭri, niɣ twarura n tfunasin nnek niɣ amarni n wuǧi, ař cek i ɣa yareddeǧ. 52 Ad cek iḥṣar jar marra tewwura nnek, ař ɣa wḍan řeḥyuḍ yuɛřan imetnen, inni x tuɣa tᵉttecřed di marra tammurt nnek. Ad cek iḥṣar jar marra tewwura nnek di marra tammurt nni d ac iwca SIDI, AREBBI nnek. 53 Xmi i d ak-dd ɣa innḍen u di řeḥṣaret i zi cek i ɣa iḥṣaren řɛedyan nnek, ad tecced řɣiǧet n uɛeddis nnek d weysum n iḥenjiren nnek d tḥenjirin nnek nni d ac i ɣa iwc SIDI, AREBBI nnek. ^■   54 Aryaz nni i yareḍben u wenni iḍebɛen aṭṭas ad tiři tamuɣři nnes d taɛeffant ɣar umas u ɣar temɣart n wuř nnes u ɣar min d as iqqimen zeg iḥenjiren nnes, 55 maḥend war ittic uřa i yijj zzaysen ca n weysum n iḥenjiren nnes, inni i ɣa yecc umi war d as iqqim ca zi marra man aya di řeḥṣaret u di ḍḍiqa i zi xak i ɣa ibezzez řeɛdu nnek di marra tiwwura nnek. 56 Tamɣart i yařeḍben u tenni iḍebɛen aṭṭas, ɛemmarṣ war teggi třeqqa n uḍar nnes x temmurt di ssibbet n wařḍab u n weḍbeɛ nnes, ad tiři tmuɣři nnes d taɛeffant ɣar weryaz n wuř nnes u ɣar mmis d yeǧis, 57 di ssibbet n llufan nni dd-iffɣen jar iḍaren nnes u di ssibbet n iḥenjiren nni turuw, minzi ad ten tecc s tnuffra di ssibbet n řexṣeṣ n marra di řeḥṣaret u di ḍḍiqa i xak i ɣa ibezzez řeɛdu nnek di marra tiwwura nnek.

58 Mařa war teḥḍid marra awařen n Ccariɛa aya nni yuran deg wedlis-a ittwannḍen maḥend ad teggʷeded Isem-a iɛuǧan, issaggʷaden, SIDI, AREBBI nnek, 59 xenni ad yarr SIDI jjrayeḥ nnek d jjrayeḥ jar zzariɛet nnek d ijj n arjef ař ṭṭarf. Ad iřint d jjrayeḥ mɣarent, ad dument, uca ad iřin řehřacat iɛeffnen i ɣa iqqimen ɣar zzat. 60 Netta ad ɣarek dd-yarr marra řehřacat n Miṣra i zi tuɣa teggʷded uca ad dayek řeṣqent. 61 Amenni ad ɣarek dd-yarr SIDI marra řehřacat d marra jjrayeḥ nni war yurin deg wedlis ittwannḍen n Ccariɛa-ya, ař ɣa tᵉttwamḥid. 62 Ad teqqimed ak-d ijj n wuru n yeryazen deg wemcan i di i ɣa tiřim amecnaw itran n ujenna deg waṭṭas, umi war tesřid i tmijja n SIDI, AREBBI nnek. 63 Am mammec zzaywem ifarḥ SIDI ḥima ad daywem igg tcuni u ad awem ittmarni, ammu zzaywem i ɣa ifarḥ SIDI maḥend ad kenniw ihellek u maḥend ad kenniw iteḥḥa uca kenniw ad tᵉttwaqeřɛem zi temmurt nni ɣar i ɣa tadfed ḥima ad tt teksid d řwart. ^■   64 SIDI ad ac ibezzeɛ x marra řegnus, zeg ujemmaḍ n ddunect ař ujemmaḍ nneɣni n ddunect uca din ad tsexxared i irebbiten nneɣni n ukeccuḍ d weẓru nni war tessined cek niɣ ibabaten nnek. ^■   65 War tᵉttifed řhudnet jar řegnus-a uca tařeqqa n uḍar nnek war tᵉttif areyyaḥ, minzi SIDI ad ac iwc din uř yarjfen d tmuɣři txessi d ijj n řeɛmar isřawen. 66 Tudart nnek ad ac tiři amecnaw tuyeř zzat nnek, ad tiřid teggʷeded ǧiřet d wass uca war ittiři weḍman x tudart nnek. 67 Ƴar ṣṣbeḥ ad tinid ‘A, iři ad tiři d ǧiřet!’ u di ǧiřet ad tinid: ‘A, iři ad yiři d ṣṣbeḥ!’ zi ssibbet n tiggʷudi deg wuř nnek nni d ac issiggʷiden u zi ssibbet n min ɣa twařint tiṭṭawin nnek. 68 SIDI ad cek yarr ɣar Miṣra deg iɣurruba x webrid min xef d ac nniɣ: ‘War t tẓarred ɛemmarṣ!’, uca din ad tezzenzem ixef nwem i řɛedyan nnek d isemɣan d tsemɣin uca war ittiři wi kenniw i ɣa isɣen.”

69 Ina d awařen n Řɛahd nni yumur SIDI i Musa ḥima ad t igg ak-d ayt n Israil di temmurt n Mu’ab, sennej i Řɛahd i kidsen igga ɣar Ḥurib.