Adrar n Ɛibal d wedrar n Jirizim
27
1 Musa, ak-d imɣaren n Israil, yumur řgens, inna: “Ḥḍam marra tiweṣṣa aya nni d awem umureɣ necc ass-a. 2 Ad imsar deg wass umi ɣa teẓwam iɣzar n L'Urdun ɣar temmurt nni d ac i ɣa iwc SIDI, AREBBI nnek, aqa ad tessbedded iẓra imeqqranen uca ad ten tḥennced s jjar. ■ 3 Ad dayes tarid marra awařen n Ccariɛa-ya, xmi i ɣa teẓwid ḥima ad tadfed ɣar temmurt nni d ac i ɣa iwca SIDI, AREBBI nnek, ict n temmurt ifeyyḍen s uɣi d tamment, am mammec i d ac inna SIDI, AREBBI n ibabaten nnek. 4 Xmi i ɣa teẓwam iɣzar n L'Urdun, ad tessbeddem iẓra, inni x d awem umureɣ ass-a x wedrar n Ɛibal uca ad ten tḥennced s jjar. 5 Ad din tebnid ijj n uɛalṭar i SIDI, AREBBI nnek, ijj n uɛalṭar n yeẓra. War xas tessiřiyed dduzan n wuzzař zi ssa ɣar da. ■ 6 Ittxeṣṣa ad tebnid aɛalṭar n SIDI, AREBBI nnek, s yeẓra kemřen waha uca ad xas tessbexxared tiɣarṣa n wecmaḍ i SIDI, AREBBI nnek. 7 Ɛawed ad as tqeddmed tiɣarṣi nnek n řehna. Ad din tecced uca ad tfarḥed zzat i wudem n SIDI, AREBBI nnek. 8 Ad tarid marra awařen n Ccariɛa aya deg yeẓra s wenqac icewwaren.”
9 Tuɣa Musa issawař ak-d ikehhanen, Ilawiyyen, ɣar marra Israil, inna:
“Sqar, sḥess, a Israil! Ass-a tiwḍed ad tiřid d ijj n řgens i SIDI, AREBBI nnek.
10 Ad tesřed i tmijja n SIDI, AREBBI nnek, uca ad tegged zi řumurat nnes d tweṣṣa nnes nni x cek umureɣ ass-a.”
11 Iweṣṣa Musa řgens deg wass nni, inna:
12 “Xmi i ɣa teẓwam L'Urdun ad bedden yina x wedrar n Jirizim ḥima ad barken řgens: Cimɛun d Lawi d Yahuda d Issakar d Yusuf d Binyamin. ■
13 Uca ina ad bedden x wedrar n Ɛibal ḥima ad neɛřen: Rubin, Jad d Ɛacir d Zabulun, Dan d Naftali.
14 Ad barrḥen Ilawiyyen uca ad inin s tmijja ijehden i marra arraw n Israil:
15 ‘D amenɛuř aryaz nni i ɣa iggen ijj n řexyař ineqcen niɣ ifesyen,
- aqa-t d jjɛifect i SIDI, ict n řxedmet n ifassen n uḥrayfi -,
uca ad tt igg deg ijj n wemcan innuffar.’
Uca marra řgens ad dd-yarr ad yini: ‘Amin!’
16 ‘D amenɛuř wi i ɣa isseḥqaren babas niɣ yemmas!’
Uca marra řgens ad yini: ‘Amin!’
17 ‘D amenɛuř wi i ɣa issmuṭṭyen aymir n umqarreb nnes!’
Uca marra řgens ad yini: ‘Amin!’
18 ‘D amenɛuř wi i ɣa issweddaren adarɣař deg webrid!”
Uca marra řgens ad yini: ‘Amin!’
19 ‘D amenɛuř wi i ɣa issfarrɣen tasɣart n ubarrani,
n uyujiř u n tajjač!’
Uca marra řgens ad yini: ‘Amin!’
20 ‘D amenɛuř wi i ɣa iṭṭṣen ak-d temɣart n babas,
minzi ittɛarra babas’
Uca marra řgens ad yini: ‘Amin!”
21 ‘D amenɛuř wi i ɣa iṭṭṣen ak-d ca n umuddar!’
Uca marra řgens ad yini: ‘Amin!’
22 ‘D amenɛuř wi i ɣa iṭṭṣen ak-d učmas,
yeǧis n babas niɣ yeǧis n yemmas!’
Uca marra řgens ad yini: ‘Amin!’
23 ‘D amenɛuř wi i ɣa iṭṭṣen ak-d tadeggʷač nnes!’
Uca marra řgens ad yini: ‘Amin!’
24 ‘D amenɛuř wi i ɣa inɣen amqarreb nnes s tnuffra!’
Uca marra řgens ad yini: ‘Amin!’
25 ‘D amenɛuř wi i ɣa iṭṭfen arrecwet
maḥend ad inɣa ijj n bnadem,
mahend ad issizzeř idammen imezdagen!’
Uca marra řgens ad yini: ‘Amin!’
26 ‘D amenɛuř wi war ittqarran awařen n Ccariɛa aya maḥend ad zzaysen igg nnadi!’
Uca marra řgens ad yini: ‘Amin!’ ”■